Абайлаңыз, өрт қаупі зор

Кенді Алтайда дала өрттерінің кезеңі басталды. Тәулігіне орта ес­­еп­пен өрт сөндірушілер құрғақ шөп­ті сөндіруге 40 рет шығады. Ма­мандардың айтуынша, егер адам­дар өрт қауіпсіздігі ережелерін сақтаса, бұл көрсеткішті жар­ты­лай азайтуға болатын еді. Есепке жүгінетін болсақ, дала өртте­рі­нің шығуының 90 пайызы адам­дар­дың отты абайсыз қолдануы мен нем­құ­райды қарауынан болады. Жылдың басынан ШҚО-да 22 мың гектар ауданды қамтыған 42 дала өрті тіркелген. Мамандардың айтуынша, бұл көрсеткіш әлі де өседі. Өрт қаупі кезеңі құрғақ, жы­­­лы ауа райына байланысты ұзаққа созылуы мүмкін. Құрғақ қурайлар, шөптер, бұталар нөсер жауын мен аяздар басталғанға дейін жанатыны белгілі. «Дала және орман өрттерін сөндіру оңай іс емес, – дейді об­лыстағы дала және орман өрттері жұмыстарын үйлестіру жөнін­дегі бас маман Андрей Иванов. – Өртті сөндіру бірнеше күнге, тіпті бірнеше аптаға созылуы мүмкін. Ол өрттің шыққан жері мен ауа райы жағдайына байланысты. Егер өрт таулы-құзды жерлерде болса, онда ол жерге мамандандырылған кө­ліктер бара алмайды. Ондай кезде өрт қолмен өшіріледі, соған бай­ланысты уақыт та, күш те көп жұм­салады. Ал егер өртті басқару, өз күштерімен ауыздықтау мүмкін болмаса, онда әуе күштері көмегіне жүгінуге тура келеді. Біздің басты мақсатымыз – өрттің жақын маң­да­ғы ауылға таралуына жол бермеу және табиғаттың әсемдігін сақтап қалу. Сондықтан осындай сәттерде тү­сі­ністікпен бірігіп, жұмыла әре­кет жасау қажет». Ең бастысы, орман өртінен сақтану шарт. Оңдасын ЕЛУБАЙ, Шығыс Қазақстан облысы.