Техника өзімізде шығарылса игі

Қазақстандық «СемАЗ» мәшине құ­растыру кәсіпорны өзі жұмыс істеген күннен бастап 1500-ден астам «Беларусь» тракторын құрас­ты­рып шы­ғар­ды. Бұл елімізде ауылшаруа­шылық техника­ларын шығаруды қаржылан­дыру­дың нәтижесінде жүзеге асып отыр. «ҚазАгроҚаржы» компаниясы 2009 жылы ауылшаруашылық техникаларын құ­растыру өндірісін ұйымдастыру бағытын­да құны 1,03 млрд.теңге тұратын инвести­циялық жобаны қаржыландырған болатын. Ал жобаның жал­пы құны 1,2 млрд.теңге. Бұдан өзге лизингтік компания отандық өндірушілерге қолдау жасау аясында «СемАЗдан» Қазақстан­ның шаруашы­лықтары мен агроқұрылымдарына кейін лизингке табыстау үшін оның өнімдерін сатып алады. Сатып алынатын техника көлемі отандық ірі жер иеленушілердің мүдделері мен сұранысына байланысты болмақ. 2009 жылдың наурыз айынан бастап «Қаз­АгроҚаржы» Семейдің мәшине құрас­ты­рушыларынан барлығы 873 бірлік «Беларусь» тракторын сатып алған болатын. Ал биылғы жылдың басынан бастап, «СемАЗдан» жалпы сомасы 1,6 млрд. теңгеге 462 трактор, сондай-­ақ 118 млн.теңгеге 64 пішен тайлағыш сатып алды. Елбасы Солтүстік Қазақстан облысына бар­ған  сапарында ел аумағында ауылша­руа­­шы­лық техникаларын шығару мен құрас­тыра­тын кәсіпорындар құру қажеттігін айтып өт­кен болатын. Егер біз шетелдік техникаларды сатып ала отырып, оларды Қазақстанда құрас­тыруға міндеттесек, құны 30% арзанға түседі. 2000 жылдан бастап «ҚазАгроҚаржы» ел аграрлық секторына 160 млрд. теңгеден астам қаржыға 18 мың бірлікке жуық ауылшаруа­шылық техника­ла­рын сатып алып, табыс етті. Шаруа­лардың қалауы бойынша, отандық өнді­ріс техникалары және жабдықтарымен қатар алыс­-жақын шетелдік өндірістен де сатылып алынады. Алайда отандық лизингтік компания өтініштерді қарау кезінде отандық техника­ларға басымдық береді. Оларды жеңілдікпен сатып алуға талаптар да қаржыландырылады. Бүгінде компанияның алдында тұрған басты міндеттердің бірі – Қазақстанда техника шығаруды ұйымдастыру. Осы мақсат­та компания инвестициялық жобаларды іске асыру аясында жылына 6 %­-бен екі жыл жеңілдікті өтеу кезеңімен қаражат қарас­тырып отыр. Индустрия және жаңа технологиялар ми­нистрлігінің деректеріне сәйкес, Қазақ­станның ауылшаруашылық мәшинелерін жасау өндірі­сіне 120 кәсіпорын жұмыл­дырылған.  Оның 50­-інде әртүрлі топырақ өңдеу құралдары (қоп­сыт­қыштар, сыдыра жыртқыштар, соқа­лар, тырмалар), сонымен қатар дестелегіштер мен тұқымсепкіштер шығару өндірісі ретке келтірілген. Бұдан өзге, жем­шөп дайындауға арнал­ған техникалар, өсімдіктерді қорғауға арнал­ған мәшинелер және ауылшаруашылық мақ­сат­тарға арналған басқа да құрал­-жаб­дықтар, олардың қосалқы бөлшектерін бірге шыға­рады. Ал 15-ке жуық кәсіпорын түпкі өнім өндіруші болып саналады. Сонымен қатар, «АгромашХолдинг» АҚ Қостанай қаласында «Есіл» астық жинау комбайндарын шығару бойынша қолда­ныстағы өндірістік қуатты ұлғайтпақшы. Венера ТҮГЕЛБАЙ.