Инновациялық ынтымақтастық ұлғаймақ

Алматыда ТМД елдері Экономикалық кеңесінің кезекті 51-ші отырысы болып өтті. Кеңейтілген кездесудің жұмысына Премьер-Министрдің бірінші орынбасары Өмірзақ Шөкеев қатысып, сөз сөйледі. Жиында негізінен алғанда, ТМД елдерінің экономикалық ынтымақтастығын дамытып, оны одан әрі жетілдіру мәселелеріне қатысты іс-шаралар жан-жақты талқыланды. Ауқымды жүздесудегі ең басты әңгіме ТМД-ға қатысу­шы-мемлекеттердің 2020 жылға дейінгі кезеңге арналған ин­но­ва­ция­лық ынтымақтастық жө­нін­­дегі мемлекетаралық бағдар­ла­ма­сының жобасы төңірегінде өрбі­ді. Сонымен қатар, ТМД-ға қаты­сушы-мемлекеттердегі ва­люта­лық реттеу және валю­та­лық ба­қылау саласындағы сая­саттың негізгі ережелері, қағи­далары ту­ралы келісімнің жо­басы, сондай-ақ еркін сауда ай­мағы келісім-шартына қатысты жәйттер де назардан тыс қалған жоқ. ТМД елдері экономикалық ке­ңесінің 51-отырысының күн тәр­тібінде бірқатар салмақты мәсе­лелер қойылып,  қарастырылды. Мәселен, жиынға қатысушылар басқосуда ТМД Экономикалық дамуы стратегиясының (2009-2011 жылдар) алғашқы кезеңін жүзеге асыру бойынша атқа­рыл­ған іс-шаралар жоспарының орындалу барысын сараптаумен айналысуды да ұйғарып отыр. Сонымен бірге Тәуелсіз Мемлекеттер Достастығы елдері көлік дәліздерін үйлестіру комитеті тәртібінің жобасын талап дең­гейінде талқылау да ойда бар. Кеңейтілген отырыс барысында ТМД-ның нормативтік-құқықтық құжаттарына бірқатар өзгерістер де енгізілмек. Ресей Федерациясы, Украина, Беларусь, Қазақстан, Әзербай­жан, Өзбекстан, Түркіменстан, Тәжікстан, Қырғызстан, Армения, Молдова мемлекеттері деле­гациялары қатысқан Эконо­ми­калық кеңестің 51-отырысында сөз алған ТМД Атқару коми­тетінің төрағасы – атқарушы хат­шы Сергей Лебедев өз сөзінде ТМД мемлекеттерінің экономи­ка­лық өзара тығыз байланысы мен ынтымақтастығын одан әрі арттыру төңірегіндегі жәйттерге тоқталды. – Шын мәнісінде де, бүгінгі таңдағы көпшілік назарын ауда­рып отырған ең басты мәсе­ле­лер­дің бірі – ТМД елдерінің эко­но­микалық өзара іс-әрекетін үйлес­тіруді тереңдету екендігі айтпаса да түсінікті. Ал, мұндай ауқымды іс-шара әрбір мемлекеттің, ең ал­дымен, шаруашылық және ғы­лы­ми-техникалық қуатын барынша тиімді пайдалану мүмкіндігіне қол жеткізбек. Сонымен қоса, әлемдік қаржы дағдарысынан туын­дап отырған қауіп-қатер­лер­ге қарсы бірлескен күш-жігердің берері мол екендігі сөзсіз. Дос­тастыққа енетін мемлекеттердің басшылары ТМД аясындағы эко­номикалық өзара қарым-қатынас мәселелеріне тұрақты көңіл бө­луде. Мұнымен қоса Мемлекет басшылары ТМД экономикалық дамуының 2020 жылға дейінгі стратегиясы негізіндегі эконо­ми­калық ынтымақтастықты нығай­тып, тереңдету және одан әрі жетілдіруге де елеулі үлес қосуда. Достастық мемлекеттері басшы­лары биылғы жылдың қыркүйек айында ТМД-ның құрылғанына 20 жыл толуына орай мәлімдеме қабылдады, – деді Сергей Лебедев. ТМД Экономикалық кеңесінің 51-отырысында «экономикалық кеңестің қашанда көпжақты өзек­ті мәселелерінің нақты шешімін табуда және тиімді кеңестер алмасып, тәжірибе алмасу мақ­са­тындағы көмегі мол екендігі» атап көрсетілді. Премьер-Ми­нистрдің бірінші орынбасары Өмір­зақ Шөкеевтің бұл тұжы­ры­мын кеңеске қатысушылар да толықтай қолдайды. – Көпшілікке белгілі, Қазақ­станның экономикасы уақыт өт­кен сайын қарқын алып, әлеу­меттік ахуал да жақсара түсуде. Атап айтарлығы, Қазақстанда жи­ырма жылда ІЖӨ 700 доллардан-10000 долларға дейін өсті. Ал, ІЖӨ-нің көлемі 2015 жылға қарай 15000 долларға жетпек. ТМД елдерімен экономикалық ин­теграция біздің еліміздің Еуропаның дамыған елдерінің қа­тарына көтерілуіне көмек­тес­пек. Жиынның күн тәртібіне қой­ыл­ған барлық мәселелер бойын­ша тиісті шаралар қабылданды, сондай-ақ қосымша іс-шаралар да назардан тыс қалған жоқ, деді Өмірзақ Шөкеев. Бүтіндей алған­да ТМД Экономикалық кеңесінің кезекті 51-ші отырысы жұмы­сы­ның қорытындысы табысты аяқ­талды деп түйін жасауға болады. Кезекті басқосу Мәскеу қала­сын­да биылғы жылдың желтоқсан айында өткізілмек. Бақыт БАЛҒАРИНА, Алматы.