Отырысқа Мәжіліс басшысы Нұрлан Нығматулин төрағалық етті. Оның ішінде қызу талқыланғаны Ұлттық экономика министрі Тимур Сүлейменов таныстырған «Қазақстан Республикасының кейбір заңнамалық актілеріне жарнама мәселелері бойынша өзгерістер мен толықтырулар енгізу туралы» заң жобасы болды.
Депутаттар жалпы отырыс аясында талқылап, бірінші оқылымда мақұлдаған құжаттың бірі – «Мемлекеттік аудит және қаржылық бақылау туралы» Заңға өзгерістер мен толықтырулар енгізу туралы» заң жобасы болды. Тақырыпқа қатысты негізгі баяндаманы Мәжіліс депутаты Омархан Өксікбаев, ал қосымша баяндаманы Қаржы және бюджет комитетінің мүшесі Қожахан Жабағиев жасады. Бұл құжат мемлекеттік аудит жүйесін одан әрі жетілдіруді көздейді.
«Мемлекеттік органдардың және квазимемлекеттік сектор субъектілерінің қызметін бағалау негізінде мемлекет қаражаты мен мемлекеттің активтерін пайдалану мен басқарудың тиімділігін одан әрі арттыруға ықпал ететін құқықтық тетік жақсарды. Жүргізілген тексерулердің қорытындылары бойынша жауаптылық күшейтілді және ұсынымдар институты енгізілді. Бұлар мемлекеттік аудиторларды кәсібилендірудің келесі кезеңі болып табылады», деді депутат О.Өксікбаев.
Баяндамашының сөзіне қарағанда, заң жобасын әзірлеушілердің жұмыс тобына 40-тан астам ұсыныс келіп түскен. Оның бәрі де мүдделі министрліктер мен тиісті ведомстволар арасында қызу талқыланып, лайықты шешімдер қабылданған.
Отырыста «Қазақстан Республикасының кейбір заңнамалық актілеріне жарнама мәселелері бойынша өзгерістер мен толықтырулар енгізу туралы» заң жобасы бірінші оқылымда қызу әрі ұзақ талқыланып, мақұлданды. Себебі, Мәжіліс Төрағасының айтуынша, еліміздегі жарнама қызметі саласында шешімін таппаған мәселелер шаш етектен көрінеді.
«Бүгінгі таңда біздің елімізде жарнама орналастырудың тәртібі 17 нормативтік акт арқылы реттелуі көп нәрсені аңғартса керек. Осыған сүйенген жергілікті атқарушы органдардың әрқайсысы өз бетімен әрекет ете отырып, түйінді тиімді шешіп жатқандай көрінеді. Алайда, іс жүзінде олай емес. Мәселен, салықшылар LED-экран мен жарнамалық баннердің айырмасы жоқ деп санап, төлемді тең есептейді. Сол сияқты республикалық маңызы бар жол жиегіндегі жарнамалардың барлығында мемлекеттік сипатқа тән маңыз жоқ, жүйесіз орналастырылған. Сондықтан да бұл салаға ауқымды жаңашылдықтар мен темірдей тәртіп орнату сөзсіз қажет», деді Н.Нығматулин.
Ұлттық экономика министрі таныстырған заң жобасы жарнама қызметін мемлекеттік реттеуді жүйелеуге және жарнама саласындағы, оның ішінде түрлі заң бұзушылықтарға жол бермеу бөлігіндегі заңнаманы жетілдіруге бағытталған екен. Министрдің түсіндіруінше, жарнама қызметін мемлекеттік реттеуді жүйелеу шеңберінде жарнама саласындағы уәкілетті орган мен жарнама саласындағы реттеуші мемлекеттік органдарды анықтау көзделуде.
«Сондықтан да, заң жобасында аумақтарды абаттандыру тәртібіне ұқсас жарнама саласындағы уәкілетті органның сыртқы (көрнекі) жарнаманы елді мекендерде ашық кеңістікте орналастырудың үлгілік қағидаларын бекітуді мақсат етіп отырмыз. Сондай-ақ, әлеуметтік жарнаманы кеңінен тарату арқылы қоғамның адамгершілік-мәдени тәрбиесінің деңгейін арттыру, елдің имидждік саясатын ілгерілету үшін оны күшейту мақсатында, заң жобасында міндетті теле-радио арналар үшін бір ай ішінде берілетін хабарлардың жалпы көлемінің кемінде 1 пайызы мөлшерінде өтеусіз негізде әлеуметтік жарнаманы орналастыру бойынша талап енгізілетін болады», деді Т.Сүлейменов.
Айта кетейік, дауысқа салу нәтижесінде бірауыздан мақұлданған аталған заң жобасында Қазақстан Республикасының 5 кодексі мен 9 заңына өзгерістер мен толықтырулар енгізу көзделеді.
Нұрлыбек ДОСЫБАЙ,
«Егемен Қазақстан»
