Айталық, дөңгелек үстел басында Германия тарапынан Фраунгофер атындағы институттың автоматтандыру және өндірісті басқару жөніндегі ЕО кеңсесінің басшысы Кристиан Блобнер, осы институттың инновациялар мен жүйелерді зерттеу жөніндегі ғылыми қызметкерлері – доктор Эмануель Муллер және профессор Андреа Зенкер болды. Қазақстан жағынан Елбасы қоры жанындағы Жас ғалымдар кеңесінің төрағасы Махмұт Томанов, кеңес мүшелері, жоғары оқу орындарының жас ғалымдары Сүлейман Демирел атындағы университеттен Мейрамбек Жапаров, Мәдина Әлиманова, Халықаралық ақпараттық технологиялар университетінен Бейбіт Әмірғалиев, Кәрімжан Нұрлан, Назарбаев Университеттен Нұрхат Жақиев, Болат Сұлтанғазин, Алмас Шынтеміров, сонымен қатар, «Индустрия 4.0» компетенция орталығының директоры Серік Құрманов қатысты.
Шара барысында ғалымдар 3D принтинг, қазақстандық роботты техника, ІТ мамандарын даярлау әдістері және тағы басқа мәселелерді талқылады. Мәселен, отандық мамандар «Қазақстанның 3D принтингтегі мүмкіндіктері және проблемалары», «IT университетінің мысалы негізінде роботты техника саласындағы жаңа жобалар», «Қарағанды ЖЭО-ның энергия тиімділігін арттыру үшін әзірленіп жатқан ІТ шешімдер», «2018 жылы экономиканың өсу қарқынын қамтамасыз ететін бес негізгі басымдықтар, Цифрлы Қазақстан-2020» сияқты тақырыптарда сөз сөйлеп, өз тәжірибелерін ортаға салды.
«IT-технологияларды енгізудің нәтижесінде кәсіпорындардың өнімділігі, жұмыстың жылдамдығы, шығындардың оңтайлануы және табыстың артуы ұлғаяды. Біз барлық ноу-хауларды «прототипінен бастап өндіріске дейін» Астананың шағын және ірі кәсіпорындарына енгізгіміз және үздік шешімдерді бүкіл елге таратқымыз келеді», дейді Жас ғалымдар кеңесінің төрағасы Махмұт Томанов. Төрағаның айтуынша, мұндай басқосулар білім беру ұйымдары мен нақты өндіріс орындарының байланысын арттырып, тың идеялардың өндірісте іс жүзіне асуына өз ықпалын тигізеді. Осылайша, экономиканың ғылымға негізделуіне жол ашпақ.
«Қазіргі кезде университеттердің барлығы дерлік индустрияға қажет. Бірақ индустрияның өзі нақты бір мамандарды қаласа да, бүгінгі оқу бағдарламалары ондай қызметкерлерді даярлауға сай келмейді. Осының салдарынан өндіріске келетін бакалавр маманы тағы бес жылдай бейімделеді. Демек, төрт жыл оқиды, бес жылын тағы бейімделуге кетіреді. Сөйтіп, бақандай тоғыз жылдан кейін бір нәрсені істей бастайды. Бұл – тым ұзақ үдеріс. Қазіргі нарық заманы ондайды көтермейді», дейді М.Томанов. Оның айтуынша, бүгінде ақпараттық теxнологиялар саласындағы инновацияларды өндіріске енгізу үшін жеті жылдай уақыт қажет. Ал кейбір қытайлық компаниялар ол жұмысты алты айдың ішінде іске асырып жатады.
«Соның бәрі қытайлық компаниялардың қолынан келсе, бізге олардың тәжірибесін өз елімізде неге енгізбеске? Әрине, бұл жерде ғалымдардың еңбегі зор. Себебі, олар нақты өндіріске қатысты сараптама жасап, тиімді әрі пайдалы ұсыныстар жасай алады. Мысалы, біздің ұлттық компанияларымыз белгілі бір теxнологияны сатып алады. Бірақ ол ескірген болып шығады. Ондай оқиғалар аз емес. Ал ғылым мен өндіріс арасындағы мықты байланыс орнатылса, заман талабына сай теxнологияларды алуға болады. Себебі, ғалымдар оның бәрін сараптап отырады», дейді М.Томанов.
Сондай-ақ, сарапшылар сапарының мақсаты Қазақстан өнеркәсібінің «Индустрия 4.0» технологиясын енгізуге дайындығын тексеру, өнеркәсіпті цифрландыруға қажетті өнім берушілер экожүйесін бағалау екендігі айтылды. Сол себепті, осы жұмыс шеңберінде шетел сарапшылары алдағы 3 күн бірқатар отандық кәсіпорындарға бармақ. Сондай-ақ, мүдделі ведомстволар және ұйымдармен, соның ішінде ғылыми ұйымдардың өкілдерімен кездеседі деп жоспарланған. Германия мамандарымен басталған мұндай кездесу алдағы уақытта басқа да шетелдіктермен жалғасын таппақ.
Динара БІТІКОВА,
«Егемен Қазақстан»
