Әйтсе де осы уақыт ішінде өзге көршілес елдер де қарап қалған жоқ. Қазақы ұғымға сайғанда олар да «атқа қамшы басты». Осы кезде Президент ел Үкіметінің алдына тағы бір жаңа міндет қойды. Бұл іс шетел инвестицияларын тарту ісіндегі көшбасшылықты одан әрі сақтап қалу қажеттілігінен туындады. Әрине, бұл мәселеде «Астана халықаралық қаржы орталығы» ел экономикасына қаржы ресурстарын тартуда жетекші рөл атқаратындығы ешқандай талас туғызбайды. Алайда, Елбасы бұл орталықтың мүмкіндігі де уақыт өте келе тұтас ел үшін тарлық ететінін түйсініп, шетел инвестициясын тарту ауқымын ұлғайту үшін келесі бір маңызды қадамға бет бұрды.
Бұл елімізде Елбасының тікелей тапсырмасына сәйкес құрылған «KAZAKH INVEST» ұлттық компаниясы болатын. Қазіргі кезде аталған құрылым инвестиция тарту мен еліміздегі инвестициялық ахуалды одан әрі тереңдету мәселелеріне қатысты тиісті іс-қимыл таныта бастады. Бұған шетелдік инвестициялар тарту ісінде елімізде көш бастап келе жатқан өңірлердің бірі – Ақтөбе облысынан да нақты мысалдар келтірудің орайы келіп тұр. Мысалы, аймақтағы Қазақстан-Қытай бірлескен «СНТС-Ақтөбе мұнай газ» компаниясы өткен жылы 42,2 миллиард теңге көлемінде инвестиция салыпты. Айта берсе өңірде мұндай мысалдар жеткілікті.
– Біз бұған дейінгі іс-тәжірибемізде Қазақстан Президенті Нұрсұлтан Назарбаевтың инвесторлар тарту және тұтастай ел ішінде инвестициялық ахуалды жақсарту жөніндегі саясаты аса сындарлы әрі сенімді екеніне айқын көз жеткіздік. Бір сөзбен айтқанда, Қазақстан басшысы даму мен өсіп-өркендеудің сенімді жолы, әрі басты кепілінің бірі инвестиция тарту деп түсінеді. Бұл өте дұрыс, өміршең көзқарас. Қазіргі күні Қазақстанда бұл мәселеде мемлекеттік органдар тарапынан белгіленген шаралардың тиімділігі айқын көрінуде, – деді бұл жөнінде газет тілшісіне жоғарыда аталған бірлескен компанияның бас директоры Ван Цзюньжэнь.
Ендігі кезекте «KAZAKH INVEST» Ұлттық компаниясының атқаратын қызметтерінің басты бағыттары жөнінде айта кеткеннің артықшылығы болмаса керек. Басқарма төрағасының орынбасары Біржан Кәнешовтің мәлімдеуіне қарағанда оның аясы мейлінше кең, мейлінше ауқымды. Инвесторлар тарту ісі – мемлекеттік органдар мен отандық және шетелдік инвесторлар, даму институттары және халықаралық компаниялармен, бизнес орта өкілдері қоян-қолтық,тізе қоса қимылдаған кезде ғана ойдағыдай нәтиже бере алады.
Сондай-ақ, оның айтуынша, қазіргі кезде республикамыздың түпкір-түпкірінде «KAZAKH INVEST» АҚ-тың жергілікті атқарушы органдары құрылып, іске кіріскен. «Олардың жергілікті мемлекеттік органдармен және аумақтық құрылымдармен бірлескен өзара іс-қимылдары көптеген түйінді мәселелердің кілтін қолға ұстата алады. Бір сөзбен айтқанда Ұлттық компания инвесторларға «бір терезе» қағидаты бойынша тиісті қызмет арналарын ұсына алады. «Бейнелеп айтқанда, мұны нөлдік циклдан жүзеге асқанға дейінгі жобалардың толық қызметін ұсыну деп түсінуге де болады», дейді Біржан Бисекенұлы. Расында да «KAZAKH INVEST» құрылымдық жүйелері мен жергілікті аймақтық кеңес мүшелері арасында тығыз байланыс орнаса, мұндай өзара ынтымақтастықтың тиімді нәтижелері көп күттірмесі кәміл. Әрі мұндай қарым-қатынастардың қолайлы алғышарттар қалыптастыруға жол аша алатыны да назардан тыс қалмағаны жөн.
Инвестициялық ахуал жөніндегі бүгінгі әңгімеміздің беташарын Ақтөбе аймағынан бастаған соң, оның түйінін де осы өңірге қатысты қойғанды жөн көреміз. Айталық, өткен жылдан бері елімізде «Doing Business» қосалқы ұлттық рейтингі бойынша елімізде ілкімді жоба қолға алынғаны мәлім. Мұндағы басты мақсат – іскерлік ахуалды одан әрі жақсарту және бизнес ортаның қолайлылығын анықтау болып отыр. Айтайын дегеніміз, Ақтөбе осындай баламасы жоқ жоба ойдағыдай іске аса бастаған аймақтар қатарына кіреді. Оның тағы бір ерекшелігі мен артықшылығы, жоба аясындағы зерттеулерді Дүниежүзілік банктің сарапшылары жүргізетінінде. Мысалы, олар өздері жүргізген соңғы рейтингтің қорытындысында Алматы, Ақтөбе және Қостанай қалаларының көрсеткіштері үнемі ілгерілеу үстінде екендіктерін атап көрсеткен.
Қазіргі күні өңірде «Doing Business» көрсеткен осы жетістікті одан әрі тұрақтандыру үшін тиісті шаралар қабылданған. Соның бір мысалы әкімшілік кедергілерді жою үшін, іскерлік ахуалды одан әрі тереңдету және алдағы жылдарда рұқсат беру жүйесін жетілдіру бойынша жұмыс тобы құрылғаны болып табылады. Түйіп айтқанда, Елбасы Қазақстанның өз инвестициялық стратегиясы болуы тиістігін атап көрсеткені белгілі. Осыған орай қазіргі кезде Елбасы тапсырмасына сәйкес республика Үкіметінде тиісті әзірлік жұмыстары жүргізіліп келе жатқаны баспасөзде жарияланған деректер арқылы оқырмандарға белгілі болса керек.
Инвестиция – игілік. Инвестиция – елдің дамуының басты тетігінің бірі. Соны тартудың тұғырлы тұжырымдамасын белгілеп берген Елбасы еңбегінің орны ерекше.
Темір ҚҰСАЙЫН,
«Егемен Қазақстан»
АҚТӨБЕ
