– Варшавада оқыған қазақ жастарының басы мен емес қой, – деп жымияды Арыстанбек. – XX ғасырдың басында білім алуға ұмтылғандар көбіне Орал, Семей, Верный және Ташкент сияқты қалалардағы гимназияларда оқыған. Кейін алыс-жақын ірі қалалардағы институттарда білімін жалғастырған. 1910-1920 жылдары Варшавада оқыған зиялылардың арасында Қанай Боранбаев, Әбілмәжін Күшіков те болған. Қанай Боранбаев кейіннен ҚазССР-інің Әділет халық комиссары-республика прокуроры лауазымында болып, сот, прокуратура органдарының қалыптасуына, кадрларды тәрбиелеуде өзіндік қолтаңбасын қалдырды. Ал Әбілмәжін Күшіковке келсек, ауыл шаруашылығы саласына зор үлес қосқан, – дейді Арыстанбек.
Арыстанбек Орынбасаров Варшаваның «Vistula» университетінде оқып, «халықаралық экономика» бакалавры дәрежесін алды. 2015 жылы Еуропа мен Азияны Қазақстан арқылы қосуға бағытталған «Заманауи Жібек жолы жобасы» деген тақырыпта дипломдық жұмысын жазыпты.
– Дипломдық жұмысым «Қазақстанның көзімен: Жаңа Жібек жолы бастамалары» («The New Silk Road Initiatives From Kazakhstan`s Perspective») деп аталады. Онда Ұлы Жібек жолының заманындағы маңыздылығын айқындай келіп, қазіргі таңдағы Қытайдың, АҚШ-тың, Еуропа одағының және Ресейдің Азия мен Еуропаны Орталық Азия арқылы) жақындастыра түсетін жобаларының Қазақстан үшін маңыздылығы сипатталады.
Қазақстандағы «Нұрлы жол» экономикалық саясатының негізгі мақсаттарының бірі – атап өткен бастамаларды бір жерге топтастырып, елімізде шикізатқа тәуелді емес жаңа бір даму бағытын ашу екені сөз болады. Диссертациямды Гарвард университетінің түлегі, Жібек жолы саласында 40 жылға таяу тәжірибе жинақтаған поляк профессоры Войчех Хюбнердің бағыт-бағдарымен жазып шықтым. Адамгершілігі мол, білімі мен біліктілігі аса жоғары, полиглот Хюбнерден диссертация жазған 6 ай ішінде экономикалық білім ғана емес, сабырлылық пен кішіпейілділік секілді адами қасиеттерге баулу курсынан өткендеймін, – дейді Арыстанбек.
Бакалавриатты тәмамдаған кезде кейіпкерімізге Вистула университетінен және халықаралық 5-6 компаниядан жұмысқа шақырған ұсыныс түскен. Арыстанбек білімін жалғастыруды қалады. Бүгінде ол Леон Козмински атындағы университеттің магистратурасында оқиды. Бұйырса, қаржы саласын терең игеріп, инвестициялар бойынша маман болып шықпақ.
– Таңдау арасында Назарбаев Университет, Варшава университеті және Германияның бірнеше алдыңғы қатарлы университеттері болды. Көңілімнен шыққаны Леон Козмински атындағы Варшава университеті болып тұр. Бұл оқу орнында Польшаның ғана емес, басқа да елдердің ең үздік профессорлары дәріс оқиды әрі магистратурамен қоса, бұл жоғары оқу орны экономика саласында қызмет етуге мүмкіндік береді, – дейді кейіпкеріміз.
Магистратурада оқумен қатар бүгінде Арыстанбек институциялық инвесторларға қызмет көрсететін Еуропадағы ең ірі банк Варшавадағы бөлімшесінде еңбек етіп жүр.
Жыл сайын үздік студенттерді оқитын саласына қарай түрлі мекемелер мен компанияларға, конференцияларға, тәжірибеге әрі қызметке де шақырып жатады. Соңғы қатысқан конференциям – өткен жылдың 19-28 шілде аралығында Аустрияның Зальцбург қаласында Еуропа одағының бастамасымен жүзеге асқан «GLOPOLINT Salzburg» еді. Конференцияда басты талқыланған мәселелер демократия, жаһандану, адам құқықтары әрі саяси жүйелері төңірегінде өрбіді. Аустрия, Германия секілді Еуропаның озық мемлекеттерінің мамандарымен тәжірибе алмасудың әсері мол. Оның ертең елге оралып қызмет еткенде пайдалы болатынына нық сенімдімін, – дейді Арыстанбек.
Кезінде Алаш арыстары оқыған шаһарда білім алуымен қатар Арыстанбек солардың ізін жалғастырып, Қазақстанның экономикасы, өркениеті дамыған озық елдердің қатарына қосылуға өз үлесін қоспақшы. Алған білім-білігін, тәжірибесін туған елінің қажетіне жаратқаннан артық мақтаныш бар ма?!
Қазбек ҚҰТТЫМҰРАТҰЛЫ,
«Егемен Қазақстан»