Тәуелсіздік сарайында белгілі қоғам қайраткері, этнограф ғалым Өзбекәлі Жәнібековтің 80 жылдық мерейтойына арналған этнографиялық көрме өтті.
Өзағаңның қолының табы қалған асыл мұраларының бәрін бірдей сөрелерге қою мүмкін болмағанмен, тұлғамен кезінде қызмет істеген, тәлім-тәрбиесін көрген шәкірттерінің еңбектерін көпшілікке таныстырған бұл көрме жастарға халқымыздың салт-дәстүрі мен әдет-ғұрпы туралы мол мағлұмат беруімен тағылымды. Оның тікелей атсалысуымен құрылған Ықылас атындағы халық музыка аспаптары мұражайы мен Орталық мемлекеттік музейінде ғалым есімін тарихтан өшірмейтін құнды дүниелер жеткілікті десек, этнографиялық мұражайдағы алғашқы көрменің осындай ғажап тұлғаға арналуының өзінде үлкен мән бар. Тәуелсіздік сарайының қолданбалы өнер және этнография галереясының жетекшісі Тілеукеш Жаубасова кейінгі жас буын Ө.Жәнібеков еңбектерімен сусындап өсуі тиістігін тілге тиек етсе, ғалыммен бес жыл бірге жұмыс істеген шәкірттерінің бірі, суретші, ағаш шебері Мәраш Ғабділмәжитқызы 1978-1982 жылдар аралығында «Қазмузейреставрация» мамандары қалпына келтірген тарихи жәдігерлермен таныстырды. Олардың ішінде Қызылорда музейінде сақтаулы қымыз ыдыстарының жиынтығы, Алматыдағы демалыс паркінен орын тепкен «Түлкі мен күлше» ертегісінің көшірмесі, Арыстанбаб кесенесіндегі XV ғасырдан қалған діңгек, суретші Николай Хлудовтың орындығы, Жәнібек батырдың қымыз ішкен саптыаяғы, Әлібек Жангелдинге сыйланған домбыра, Ш.Уәлихановтың інісі Мақы жасаған қымыз ожау сияқты бірталай аса бағалы бұйымдар бар.
Этнограф ғалымның қазақ сахна өнеріне қосқан үлесі ұшан-теңіз екенін осындағы ұлттық киімдер үлгісінен, музыкалық аспаптардан көруге болады. Ел аузында сақталған халық әндерінің сирек нұсқаларын қайта жаңғыртуда да өлшеусіз тер төккеніне «Шертер», «Сазген», «Адырна», «Алтынай», «Арқас» секілді өзі дүниеге әкелген фольклорлық-этнографиялық ансамбльдері дәлел. Он саусағынан өнер тамған шебер-реставраторларды, зергерлер мен қолөнершілерді музей істеріне көптеп тартқаны осы саланың бүгінгі майталмандары атқарып жатқан қыруар істерден де айқын аңғарылып тұратынын айта кету керек.
Қарашаш ТОҚСАНБАЙ.