Алматы театрының елордаға гастрольдік сапары оны тағы да айқын байқатты
Ғ.Мүсірепов атындағы Қазақ мемлекеттік академиялық балалар мен жасөспірімдер театрының Астанаға арнайы гастрольдік сапармен келе жатқаны жайлы біз осыдан біраз бұрын жұртшылыққа хабарлаған болатынбыз. Ондағы мақсат – талай-талай алыптардың ізі қалған киелі сахнаның өнерін тамашалауға мүмкіндік барын елорда тұрғындары біле жүрсін деген ой еді. Әрине, бүгінде елордаға келіп-кетіп жататын түрлі өнер ұжымдарының қатары аз емес. Және олардың қай-қайсысы болса да өздерін осал санамайды. Ендеше, солардың арасынан бұл өнер ұжымы жайында неге бөле-жара айтты екен дегенге келсек, ең алдымен ол бүгінде еліміздегі барша сахна өнері үшін тәлім мектебі болып отырған екі театрдың бірі. Әрі бұл театрда жастыққа тән жалын бар. Сондықтан да олар басқа өнер ұжымдары тәуекел ете бермейтін тың ізденістерге қорқасоқтамай, батыл бара алатын, өздерінің шығармашылық мүмкіндіктеріне сеніммен қарайтын, көпшілік көңілін алдамайтын театр. Ал мұндай өнер ұжымының Астанаға келуі елорда жұртшылығы үшін көктен іздегені жерден табылғандай қуаныш емес пе?! Әрине, театр ұжымы да күткен үдеден көріне білді деуге болады. Алғашқы күні олар жұртшылық назарына Ғабит Мүсіреповтің «Қозы Көрпеш – Баян сұлу» трагедиясын ұсынған. Рас бұл қойылымды еліміздің барлық театрлары репертуарларынан дерлік кездестіруге болады. Содан да шығар, бірқатар көрерменнің «Ау, бұл сахнадан көрсетіле-көрсетіле жауыр болған дүние ғой. Әкелуге басқа дүние таппағаны ма?» дегендей көңіл-күйде болғанын да жасырғымыз келмейді. Алайда, театр бұл шешімге кездейсоқ келмегенін, өздерінде бұрыннан қалыптасқан дәстүрге құрметпен қарайтынын, өткен аға буын өнегесіне адалдықтан жазбайтынын дәлелдей білді. Иә, бұл шешім өздері атын иеленіп отырған Ғабеңнің, жастар театрына кезінде хас сұлудың көз жасындай мөлдіреген деп сүйсінген сөз зергерінің аруағына құрмет деп білген жөн. Оның үстіне бұл спектакль бұған дейін көріп жүрген дәл осы аттас сахналық қойылымдардан әлдеқайда шоқтығы биік дүние екендігіне көп ұзамай көрерменнің де көзі жетті. Өркениетті елдерде, оның ішінде көршілес Ресей елінде сахналық қойылымды бір емес, бірнеше рет арнайы барып көретін, әр суреткердің өзіндік ізденісін саралап, салыстыра қарайтын дәстүр кең өріс алған десек, бұл әдет соңғы кезеңде біздің елдегі өнерсүйер қауымға да жұғысты бола бастаған сияқты. Яғни, бүгінде бізде де өзіндік қолтаңбасымен көрерменді тәнті етіп жүрген өнер иелерінің еңбегін көруге аңсары ауып тұратындар қатары қалыптасып келеді. Міне, осындай көрермен көңілінен шығып жүрген өнер иесінің бірі, бірі ғана емес бірегейі, осы спектакльді сахналаған режиссер Жанат Хаджиев екендігі елордалықтарды қызықтыра түскен. Әрине, бұл спектакльді көруге өнер жанашыры, қала әкімі Иманғали Тасмағамбетовтің келуі де көп көңіліндегі әсерді еселей түскені анық.
Сондай-ақ, Фридрих Шиллердің «Махаббат пен ғадауат», Ермек Аманшаевтың «Балкон» атты туындылары да жастар театрына ғана жарасатын жалынымен есте қалғанына дау жоқ. Әйтсе де осы арада Мар Байджиевтің «Тұншыққан сезім» атты сахналық туындысына бөле-жара тоқтала кетсек дейміз. Неге десеңіз, бұл спектакльдің режиссері кинода да, театр сахнасында да талай-талай сүйекті рөлдерді ойнап жүрген көрнекті актерлеріміздің бірі Балтабай Сейітмамытов екен. Әр рөлі жұрттың көз алдында қалып қойған дарын иесінің жерортасына келгенде өзін режиссурада сынай бастағанынан да хабарымыз бар еді. Алайда, ол сахнаға қойған дүниелерді көзіміз көрмеген соң, режиссер Балтабай актер Балтабайдан олқы соғып жатпаса етті деген де ойға келгенбіз. Алайда, бұл қаупіміз бекер болып шықты. Дарынды адам қай істе де дарын иесі екенін ол тағы да дәлелдей білді. Дәл қазір ол сахналаған туындыны таратып айтуға мүмкіндік болмағандықтан, біз оны бір ғана сөзбен түйіп, көпшілік үшін бұл да бір ұмытылмас күн болды демекпіз.
Осылайша, өздерінің бүгінгі бет-бейнесін, ізденісін жұртшылыққа таныстырып өткен театр ұжымы гастрольдік сапардың аяқталуына да өзгеше сый әзірлеп, көпшілікті тұщынған дәмі аузынан кетпестей тамсандыруды да ұмытпаған екен. Яғни, бұл күні жастар театры заманымыздың заңғар жазушысы Шыңғыс Айтматовтың «Теңіз жағалай жүгірген тарғыл төбет» хикаятының негізінде қойылған туындыны сахнаға шығарды. Жазушының бұл шығармасын оқыған әр адамның, сөз жоқ, бұл дүниенің сахналық шешімі қалай болды екен деп қызыққаны анық. Өйткені, суреткердің әр еңбегі, әсіресе осы туындысы кез келген режиссер тәуекел ете бермейтін, тіпті тісі бата қоймайтын, күрмеулі, күрделі дүние. Сондықтан да шығар, біз де бұл шығарманың сахналық нұсқасында айтар ойдың реңкі солғын тартып қалмаса етті деген ойда болдық. Алайда, спектакльдің режиссері Талғат Теменов екенін естігеннен кейін бұл күдігіміз сейіліп сала берген. Өйткені, бұл қазақ өнеріне қомақты олжа салып жүрген талант иесінің Шыңғыс Айтматовтың шығармасын алғаш сахналауы емес. Бұған дейін ол «Шынарым менің, шырайлым менің» хикаятын сахналап, қазақ өнеріне өнегесі өзгеше тың дүние қосқаны да есте. Жалпы, Талғат өзінің қай еңбегінде болса да кейіпкерлерінің ішкі әлемін тереңірек ашуға баса мән беретін режиссер. Ал адами сезімдердің алға шығып, салтанат құруы кімге болса да жылы жаңбырдай жайлы тиетіні сондай, көпке дейін жаныңды бір сәулелі сезім кезіп жүреді. Талант құдіреті деген де, бәлкім, осы шығар.
Ендігі айтайын дегеніміз сол, Талғат бұл еңбегімен де көпшілікті тәнті етті. Ең ғажабы, ол жазушы шығармасын тұтастай қамтимын деп қара терге түспеген, негізгі ойдың өзегін үзбей, өзіне керегін теріп алып, бас-аяғы біртұтас дүниені құраған. Адам ата мен Хауа анадан бері жалғасып келе жатқан басты мұрат – ұрпақ өсіру, соның амандығын көксеу екендігін айтуды мақсат тұтқан жазушы көкейіндегі ойға да селкеу түспеген. Қайта сахна құдіреті осы ойды айшықтай түскен. Содан да болар, бүгінде өзі үшін ғана өмір сүретін өркөкіректердің айналаңда толып жүргенін, солардың кесірінен көзі жасты, көңілі қаяу тірі жетімдердің көбейіп бара жатқанын еріксіз есіңе аласың. Әу баста Жаратқан ие бойға дарытқан ұрпақ алдындағы жауапкершіліктен бүгінгі замандастың ажырап бара жатқаны қалай деген ой толқынына малтығып, біразға дейін шыға алмайсың.
Әне, көк теңіздің төсінде қалқыған қайықтағы үш буын өкілі жандарын шүберекке түйіп, тау-тау толқынмен арпалысып келе жатыр. Екі күн бойы үздіксіз соққан дауыл бағдардан айырған. Бәрі ындыны кеуіп, бір жұтым суды аңсайды. Қанша жерден шөл буса да, ыдыстың түбінде ғана қалған суды ішу баланың еншісі деп білген ата мен аға, әке бәрі бірінен соң бірі өз еріктерімен көк теңіздің қойнауына кете барады. Сөйтіп, олар ұрпағының, келешегінің жағаға аман-есен жетуі үшін өздерін құрбандыққа шалады. Ең ғажабы, бұл сахналық туынды кезінде жазушы шығармасынан алған әсеріңді бәсеңдетпейді, қайта бояуын қалыңдата түседі. Өмірдің бар мәні – бала сүю, ұрпақ жалғастығы екенін жүрегіңе жазып береді.
Әдетте, киноға қарағанда, театр өнерінің мүмкіндігі шектеулі дейміз. Алайда, қалауын тапса қар жанады деген сөз рас екен. Олай дейтінім, сахна төріне жайылған көк мата көз алдыңда жал-жал толқынға айналып, қалтылдаған жалғыз қайықты қақпақыл қақтырғанда сіз де бей-жай қала алмайсыз. Тіпті, осы көбігі көкке шапшыған толқындар Айвазовскийдің «Тоғызыншы вал» картинасын еріксіз көз алдыңа әкеледі. Сол толқынмен арпалыс шын мәнінде, тап қасыңда жүріп жатқандай біртүрлі үрей құшағында отырасың. Құр сүлдері қалған әлжуаз баланың қайығы жағаға іліккенде ғана барып уһ деп дем алғаныңды сезбей де қаласың. Біз бүгін бұл спектакльді ойнаған актерлердің ойынына, олардың кәсіби шеберлігіне әдейі тоқталмай отырмыз. Өйткені, мұның бәрі кеңінен толғап айтатын әңгіме. Ал бүгінгі сөз кезегінде режиссер ізденісі жайында ғана аз-кем айтып өтуді мақсат тұттық. Оның үстіне бұл қойылымның сахнаға шығуына бастан-аяқ тер төккен, инцинировкасын жазған да, жалпы сценографиясын құраған да Талғаттың бір өзі екенін біле тұра ол туралы айтпай кету оның өнеріне деген қиянат болар еді.
Бір айта кететін жәйт, алматылық театрдың гастрольдік сапарын қорытындылаған бұл туындыны Мәдениет министрі Мұхтар Құл-Мұхаммед келіп тамашалады. Министр спектакль соңынан сахнаға көтеріліп, театр ұжымымен жүздесіп, оларға өнерді өркендетуге қосқан үлестері, бүгінгідей ғаламат көңіл-күй сыйлағаны үшін ризашылығын білдірді.
Жұмагүл ҚУАНЫШБЕКҚЫЗЫ.