«Келін» дегенде көз алдыңа жүзінен нұры төгілген, ізетті де инабатты, өн бойынан кішілік пен мейірімділік есіп тұратын, талшыбықтай майысқан сүйкімді жан елестейді. Ежелден, сона-а -ау ықылым заманнан жаңа табалдырықты имене аттаған сәтінен-ақ жас келін сол отбасы мүшелерінің жүректеріне шырақ жағып, өмірлерінің көкжиегін кеңейтетін-ді. Қиялдарына қанат бітіріп, үйдің қуыс-қуысының бәрін қуанышқа толтырады. «Жаңа түскен келіннің аяғымен» осылай әр шаңыраққа құт-береке енетін еді. Байқап қарасаң, қазір де солай.
Жасырып қайтеміз, бірақ біз бойымызға кеңестік тәрбиені мол сіңіреміз деп, осы үрдісімізден жаңылып қала жаздадық. Қазір, жаңадан түскен келіннің ертесіне үлкен адамдарға ізет көрсетіп, мөлдіреп отырып шай құйып беретіні біздің Балқаш ауданында сирек.
Қандастарының өз ана тілінен жерінгендей орыс тіліне көбірек көңіл бөліп кеткенін байқаған, көзі тірісінде-ақ аты аңызға айналып, халықтың өзі батыр атағын беріп қойған, жүз жылда бір туар ардақты атамыз Бауыржан Момышұлы кезінде: «Қазақтың тамыры ауылда жатыр, бүгінде бүкіл Қазақстанды қазақ етіп отырған оңтүстік облыстарының қазақтары» деп, батыл айтқан еді. Халық қаһарманы айтқан пікірге бұл күнде ешкім таласа алмайды. Қазақы қасиеттің қаймағы бұзылмаған өңір оңтүстік екенін жұрттың бәрі де біледі.
Жақында, Балқаш ауданының бұрынғы әкімі Ерғазы Қошанбеков көрнекті қоғам және мемлекет қайраткері Д.А. Қонаевтың қайтқан күніне орай құран бағыштатып, отбасы атынан ауызашар берді. Осы ауызашар дастарқаны үстінде тірісінде-ақ халықтың ақ батасына ие болған атамыздың көзін көрген, ол кісіге өз қолынан шай құйып берген бір құрметті апамыз: «Қонаев атамызға Шымкенттің келіндерінше иіліп отырып талай рет шай құйып бердім, – деп айтып қалды. Жәй күндері ондай сөз арасында айтыла салатын тіркестерге аса мән бермейсің ғой. Бірақ осы бір ауыз сөз маған үлкен ой салды. Мақаланы жазуыма да түрткі болған осы бір ауыз сөз.
Бәлкім, апамыз: «Қазір мен де қартайып қалдым, ол кезде жас едім. Әдемілігім, көркемдігім Шымкенттің келіндерінен бір де кем емес болатын дегенді айтқысы келген болар. Дегенмен және ең бастысы, апамыз данагөй қартқа өз қолымен шай құйып бергенін мақтанышпен айтты.
Жақсы өнеге алған барша қазақтың келіндері ата-бабамыздан қалған салт бойынша шайды үлкендер алдында иіліп, майысып отырып құяды. Бұл сыйлағаны, құрмет көрсеткені.
Жаңа түскен келіннің шайын ішу – қуанышқа ортақтасудың, оны мақұл көрудің, ауызбірлігімізді дәлелдеудің бір түрі. Ол – ғасырларды көктей өтіп, сона-ау ежелден, ата-бабамызбен бірге жасап келе жатқан дәстүріміз.
Бұрындары да, қазір де бүкіл қазақтың келіндері, той өткеннен кейін ертесіне жүзінен нұры төгіліп отырып, шай құйып береді. Ол келін үшін үлкен сын. Сын болғанда қандай?! Осы алғашқы сынақтан сүрінбей өтсе, бүкіл ауыл қарттарының ақ батасын алады. Көсегесі көгергенін ойлаған келін шай құюға бар өнерін салады. Шайды тобылғы күрең етіп құйып, дастарқан басында-ақ жақсы тәрбие алғанын, өнегелі отбасынан шыққанын паш етеді. Жас келін үшін мұндай әдемі көрініс саналы ғұмырында бір-ақ рет қайталанады. Жіті назар салсаңыз, қазақы тәрбие, сыпайы қимылы үйлесіп, жас келінге ерекше нәзіктік, әсемдік береді. Сүйкімді, биязы етіп көрсететін де осы дәстүріміз. Осы сұлулықты көзіңмен емес, жаныңмен, жүрегіңмен көре алсаң, ғажап рахатқа бөленесің...
Шайды жақсылап құя білу де өнер. Өнер болғанда қандай, нағыз төресі.
Мәселен, жоғарыда біз сөз еткен апамыз иіліп отырып, Дінмұхамед атамызға шай құйып берді. Сөйтіп, үлкен адам алдында инабатты, әдепті әрі тәрбиелі келін болып көрінді. Иә, ізеттілігін, тәрбиелілігін көрсетті. Жүз жылда бір туар қарияның көңілін тауып, бүкіл ауылдың абыройын асқақтатты.
Жаман болды ма? Әрине, жақсы. Бұдан артық тамаша бола ма?! Дінмұхамед Ахметұлы шай құйып берген бір келіннің тәрбиелілігі, инабаттылығы арқылы-ақ бүкіл ауыл халқы, тіпті барша қазақ келіндері туралы жылы пікірде кетті. Ер адамдардың абыройы да асқақтады сол сәтте. Міне, осы бір қарым-қатынастан-ақ ата-бабамыздан қалған дәстүріміздің қадір-қасиетін байқауға болады.
Жалпы, жаңадан түскен келіннің шайын ішу дәстүрі, әсіресе оңтүстік облыстарда жақсы сақталған. Осындай жарасымды көрініске басқа елдің адамдары куә болса, еріксіз таңғалар еді. Сөзсіз қызығары анық.
Шай құю дәстүрінен ерекше сыйластық пен татулықты, ауызбірлікті байқауға болады. Көзге көрінбейтін, жүрек қылымен жіпсіз байланған нәзік, елдік құрмет сонадайдан есіп тұрады... халықтық болмыс, бітіміміміз де айырықша паш етіледі.
... Қандай қыз болмасын келін болып түскенде, оның ойында барған елім жақсы қабылдаса, жылы шырай танытса екен деген ниетте болары хақ. Бөтен табалдырықты алғаш аттаған сәттен-ақ әрбір отбасы мүшесіне, туған-туыстарына, ауыл-аймаққа ұнағысы келетіні де заңдылық. Өйткені, басқа отбасында тәрбие алып, танымайтын, бөтен ортаға келіп, бірден балдай батып, судай сіңіп кету, әрине, кімге болса да оңай болмайды. Осындай сын сағатта ата-баба дәстүрін берік ұстанып, әдептен озбаса жас келін ешқашан жаңылмайды. Тал бойынан алған өнегелі тәрбиесі есіп тұрса, ол түскен елінің бағы болғаны. Басына орамал салған үйдің отбасы мүшелері де жылы қабақ танытып, білмегенін аялай үйрететін болса тәтті сыйластықтың жібі ешқашан үзілмейді... Осындай бір-бірімізге көрсеткен шынайы құрмет арқылы-ақ арамызға ғажайып татулық орнар еді. Қаймағы бұзылмаған ынтымақ бірін-бірі қас-қабағынан ұғатын нәзік түсіністікке ұласар еді.
Жалпы бұл өмірде сыйластықтан қасиетті ешнәрсе жоқ. Халқымыздың салт-дәстүрлерінің әрқайсысының алатын өзіндік орны бар. Олар біздің қазақ деген ел екенімізді білдіріп, шаңырағымыздың бір- бір уығын көтеріп тұр. Діліміз бен дінімізді де қорғап, бойымыздағы қанымызға да қуат беруде.
Иә, ата-бабамыз ұлт тәрбиесін, салт-дәстүрді ұстану арқылы-ақ өркениетке қарай бет бұрып отырған. Байқасаңыз, салт-дәстүрімізде осындай, үлкен киелі қасиеттер жатыр. Қандай ғажап!
Тәрбие, ұлт тәрбиесі – қазақта келіндеріміздің иіліп отырып, шай құю өнерінен басталады.
Бүгінгі түскен келін – ертеңгі ана. Түскен үйіне жақсы келін аяғымен құт-береке, бақыт ала келеді. Отымен кіріп, күлімен шығады. Отын жағып, ұрпағын өсіріп, отбасын жылылыққа бөлейді. Ошағында шырақ болып жанады. Үй ішінің қуыс-қуысының бәрін қуаныш кернейді. Армандарына қанат бітіреді. Өрістерін кеңейтеді.
Келіннің бойындағы ізеттілік дүниеге келген бала тәрбиесі арқылы бүкіл ұрпақтың бойына сіңіріледі. Қанатын бірте-бірте кеңге жая береді.
Менің Елеусіз Мұратов деген курстасым студент кезінде-ақ «Өмірдің мәне неде?» деген сұраққа жауап іздеп, газеттерге мақала жазып жүретін. Қазір ойлап қарасам, шынында да Елеусіз ол мәселені босқа көтермепті. Терең ойлансақ, біз бұл өмірге уақытша қонақ екенбіз. Қамшының сабындай қысқа ғұмырда бір-бірімізді сыйлап, бір-біріміздің қадірімізді біліп, өткенге не жетсін, шіркін?!.
Кім біледі, адам баласы бір-бірін қадірлеп, бағалап, түсінісуге ұмтылса – өмір сүру қашан да жеңіл әрі қызықты болар ма еді. Ойлана келе анық көз жеткізгенім, бабалар салып кеткен сара жолдан айнымасақ, елдігіміз де, бірлігіміз де анағұрлым нығая түсері анық. Тәрбие бала шыр етіп дүниеге келгеннен басталып, келін табалдырық аттағаннан одан әрі жалғасатын болса, ұлтымыз одан әрі сауыға түсер еді. Сонда ғана біз басқа халықтар қызыға әрі қызғана қарайтындай жаңа деңгейге көтерілер едік.
...Жүзінен нұры төгілген тәрбиелі де, инабатты келін осындай адами қасиеттерге бай асыл қасиеттерімен де біз үшін қымбат.
Марат ҚАШҚЫНБАЕВ.
Алматы облысы,
Балқаш ауданы,
Бақанас ауылы.