Өзге жұрт қаржы саласынан нәсіп тапқандардың жұмысын оңай деп ойлайтын секілді. Бұрын шотты тарсылдатып соғып отырады деуші еді. Енді бүгін барлық есеп-қисапты калькулятормен тез есептейді дейді. Шындығында дәл солай емес. Әсіресе, бюджеттің кірісі мен шығысын, нақтыланған бюджеттің орындалысын қадағалау үшін біліктілік, тіпті тәжірибе де қажет. Мұны Атырау облыстық қаржы басқармасының бастығы Бауыржан Жантеміровтің күнделікті атқаратын жұмысына ерекше құштарлықпен кірісетініне байланысты айтып отырмыз.
Бауыржан Ересұлымен әкімдікте өтетін түрлі басқосуларда бас изесіп қана амандасатынымыз болмаса, жақын араластығымыз жоқ. Бірақ бұл кісінің үлкенге – құрмет, кішіге – ізет танытатын қарапайымдылығы сырт көзге байқалып-ақ тұрады. Қарсы жолыққан адамға құдды күнде көретін танысын, не туысын кездестіргендей жылыұшырай қарайтын дөңгелек жүзінен бір шуақ шашылып тұратындай. Бұл бәлкім, ата-анасының өнегелік тәрбиесінің жемісі болар деп топшылаймыз.
– Әкем Ұлы Отан соғысының ардагері болатын, – деп еске алады ол. – 1943 жылдың басында Орал өңіріндегі Бұлан ауылынан майданға аттанған ғой. Содан Балтық теңізі жағалауындағы портты қала – Кенигсбергке дейінгі майдан жолында жауға қарсы шайқасқан. Бұл қаланы кеңес әскерлері 1945 жылғы 6 сәуірде азат еткен. Әкеміз елге 1946 жылдың күзіне таман оралыпты.
Ерес қария елге оралысымен соғыс жылдарында әбден күйзелген халық шаруашылығын өркендетуге бел шеше кірісіпті. Әуелі Орал өңірінде, кейіннен Ақтөбе облысында абыройлы еңбек етіпті. Мәреш жарымен 8 ұл-қыз тәрбиелеген Ерес қария балаларына: «Ешкімнің ала жібін аттамаңдар. Әрқашан адал болыңдар», дегенді ұдайы өсиет етеді екен. Балаларының бәрі де жоғары білім алып, әке өсиетіне адалдықтан шалт басқан кезі жоқ. Қазір жасы сексеннің сеңгірінен асқан анасы Мәреш өзінен өрбіген балаларының жапырақ жайып, абыройлы еңбек етіп жүргеніне тәубе, дейді.
Әкесінің өзгеге мейірімділік таныту, өз жұмысын құштарлықпен атқару секілді қасиеттері Баукеңе де жұғысты болғандай. Емен есіктің арғы жағында шіреніп отыратын, біреу кірсе сыздана қалатын кей шенеуніктердей емес, Бауыржан Ересұлы қабылдауына келген адамды жылы шыраймен қарсы алады. Өтінішін мұқият тыңдайды. Ол тек сырттан келушілерге ғана емес, өзі басқаратын ұжым қызметкерлеріне дәл солай ілтипат көрсетеді. Әсіресе, жас мамандардың қаржы саласының ұңғыл-шұңғылына қанығуына баса мән береді. Басқаша айтқанда, шәкірт қолына алғаш қалам ұстатқан ұстаздай тәрбиелейді.
– Өйткені, кезінде өзім де Мұхамеджан Нұрпейісов, Сердіғали Бердешов, Үкітай Байжомартов секілді қаржы саласының білгірлерінен тәлім-тәрбие алдым, – дейді облыстық қаржы басқармасының бастығы Бауыржан Ересұлы сонау 70-ші жылдарға ойша шолу жасап. – Міне, осы ұстаздарым: «Қаржыгер алғыр, адал, өзгеден жауапкершілікті талап ету үшін алдымен, өзі тәртіпті болуы керек», деп отыратын. «Талабы бар жастарды көрсең, ізіңді басар шәкірт ретінде тәрбиеле», дегенді үнемі айтушы еді. Қырық жылдай осы салада еңбек етіп, жемісін көрдім десем, бұл – маған сенім артқан ұстаздарымның өнегесі.
Бауыржан Ересұлының өзі айтқандай, қаржы саласындағы еңбек өтілі 40 жылға таяпты. Алматыдағы халық шаруашылығы институтын бітіргелі бері осы саладан табан аударған жоқ. Көп жыл Ақтөбе облыстық қаржы басқармасында тәжірибе жинады. Басшы да болды. Ал Атырау облыстық қаржы басқармасына 2002 жылдан бері жетекшілік етеді. «Сол жылдары бізде маман жетіспейтін. Басқарма штатының 50 пайыздайы бос тұратын. Бірақ алыстан ешкімді әкелген жоқпын. Жергілікті жердегі оқу орындарын бітірген жастарды жұмысқа қабылдап, тәрбиелеп келемін», дейді ол.
Шәкірт демекші, Баукеңнің көп жылдық еңбек тәжірибесінен тәлім алғандар көп. Солардың бірі Амантай Айтбаев қалалық қаржы бөлімін басқарды, қазір қала әкімінің орынбасары. Үміт күтетіндері де аз емес. Солардың қатарындағы Шынар Мақсотқызы Елеусінованы өзіне бірінші орынбасарлыққа ұсынды. Баян Сабырғалиева мен Серік Демегенов те Баукеңнің тәрбиесінде жетіліп, бұл күндері аталған басқармада орынбасарлық лауазымына дейін көтерілді. Рас, адамның бәрі бірдей емес қой, қаржы есептеудің қиындығына төселе алмай, өзге жұмысқа ауысып кеткендері де кездесіпті. «Таудай талапты жастар аз емес. Сол жастарды тәрбиелеуден қашпаймын. Жастар қалай тәрбиелесең, солай қалыптасады. Алдымен, оларды тәртіпке, алғырлыққа, тапсырылған жұмысты уақытында орындауға үйрету парыз. Бұл мемлекеттік қызметкердің имиджіне нұқсан келтірмеу үшін басты қағида болуы тиіс», дегенді де қосып қояды әңгіме арасында Баукең.
Тәртіп дегенге байланысты мынаны баса айта алар едік. Ай сайын облыстық тәртіптік кеңестің отырысы өтеді. Осы кеңестің жұмысы жанданғаннан бергі 7-8 жылдың ішінде облыстық қаржы басқармасы қызметкерлерінің «Мемлекеттік қызмет туралы» Заң талабын бұзғанына қатысты іс қаралмапты. Сыбайлас жемқорлыққа ыңғай беретін факті де тіркелмеген. Демек, Баукең басқаратын басқармада қалыптасқан тәртіп, мемлекеттік қызметтің беделін көтеруге ұмтылыс өзгелерге үлгі-өнеге болса дейсің.
Ал Бауыржан Ересұлының өзі таңдаған мамандығына адалдығынан айнымауын үйренерлік үрдіс ретінде қабылдасақ артық па! Әйтпесе, қазір кей мамандық иелерінің үлкені де, кішісі де көбірек жалақы төлейтін жұмысқа ауысатынын жиі кездестіреміз. Тіпті, мамандығын өзгертіп жататындары да бар. Осы тұрғыдан айтқанда, қаржы саласынан мол тәжірибе жинаған, ең бастысы, өзгелер қаржы ісінің білгірі деп атайтын Баукеңнің мамандығына деген құштарлығы саябырлаған емес. Сол құштарлықтың, адалдықтың жемісі шығар, «Ерен еңбегі үшін» медалімен марапатталды. Оны қаумалайтын достары да, шәкірттері де көп.
– Ұлағатқа толы өнегелі тәрбиесін берген ата-анамның, тәлімін үйреткен ұстаздарымның абыройына дақ түсірмеу – басты қағидам. Балаларымды да, шәкірттерімді де солай тәрбиелеймін, – дейді жары Күнжәмиламен бірге ұл-қызынан өрбіген жеті немеренің бал қылығын қызықтар ата жасына жеткен Баукең.
Жолдасбек ШӨПЕҒҰЛ, Атырау облысы.