Еліміз егемендік алғаннан бері ежелгі ескерткіштер еңсе көтере қайта жаңғыртылып, тау тұлғалар тас тұғырларға асқақтай көтерілгендігі баршаға аян. Бағзы замандарда жазылған көне қолжазбалар алыс-жақын шетелдердің мұрағаттарынан әкелініп, киелі қорғандардан іздестіріліп алынған асыл жәдігерлер ұлт руханиятының қазынасын толықтыра түсті. Ресей патшалығына қараған тұста көне жәдігерлер сұраусыз алынып кеткендігі мәлім. Бұған кеңес кезінде жүргізілген археологиялық қазбалардан табылған Шіліктінің алтын жауһарлары дәлел. Сол заманда көрмеге әкетілген қасиетті тайқазан да Эрмитаж қорында қаншама жылдар шаң басып жатты. Ел тәуелсіздігінің басталар тұсында ұлт зиялыларының пәрменімен осы аса құнды жәдігер қасиетті Түркістанға қайта оралды. Түркі мәдениетінің асыл қазынасы Күлтегін ескерткішінің көшірмесі Астана төріне әкелінді. Ұлттық руханияттың дәуірлеуіне Елбасынан бастап қоғам қайраткерлері мен зиялы қауым өкілдерінің «Мәдени мұра» мемлекеттік бағдарламасын жүзеге асырудағы зор үлесін халық бағалап отыр. Осындай өркениет үрдісі Мәдениет министрлігіне қарасты еліміздің барлық мәдениет ошақтарында жалғасын табуда.
2000 жылы Мәдениетті қолдау жылы Шығыс Қазақстандағы Тарбағатай тарихи-өлкетану мұражайында кешенді мәдени шаралар жүзеге асырылды. Соның бірі, мұражайдан тыс жұмыстар ретінде ұйым жоспарымен белгіленген осы өңірдің ұлы бабасы, қазақ шежіресіндегі белгілі тұлға Төлегетай Сүйінішұлының Сыр бойындағы көне кесенесін ғылыми тұрғыдағы зерттеу болды. Тарихи тұлға моңғол шапқыншылығы заманында Алтайдан Тарбағатай, Жетісуға ауған жұртты Сыр бойына қоныстандырып, кейіннен Жошы иеленген ұлыстың Өзгент өңірін билегені қытай жазба деректерінде сақталған. Сыр өңіріне ислам дінінің таралуына Қылышты Атамен иықтаса қолдау көрсеткені жөнінде аңыздар бар. Олардың кесенелерінің қатар тұрғызылуының сыры осыдан болса керек. Осындай тарихи деректер мен әпсаналарды ғылыми танымдылықпен зерделеу өлкетану еншісіндегі міндеттер.
2000 жылдың мамыр айының басында осы мақала авторларының бірі Қызылорда облысы Жаңақорған ауданындағы тарихи кешенге іссапармен барып, ескерткіштің жай-күйімен танысып, деректер жинақтап қайтты. Алыстан барған зерттеушіні қарсы алған жергілікті әкімдік басшылары қарт өлкетанушы Шайдарбек Әшімовті жанына қосып, көлікпен қамтамасыз етіп, үлкен қолдау көрсетті. Дегенмен, ескерткіштердің сақталуы сын көтермейтін жағдайда еді. Елге оралған өлкетанушы, яғни осы мақала авторларының бірі зерттеу жазбаларын мұражай қорына өткізіп, бұған дейінгі жазылған тарихи дәйектерді іздестіріп, қайта жаңғырту мәселесін көтерді. Бұл игі бастамаға бірінші болып Шығыс Қазақстан облыстық мәдениет басқармасының басшылығы қолдау көрсетіп, жылдық жоспарға енгізді. Ежелгі Өзгент шаһарына жақын Жібек жолының бойына тұрғызылған Төлегетай-Қылышты көне кесенелерінің қабырғалары 1970 жылға дейін сақталып тұрған. Бұл ескерткішті осы жылдары белгілі сәулетші-ғалым Ескендір Бәйтенов зерттеп, бастапқы көрінісін қалпына келтірген сызбасын жасаған. Бұл деректі сәулетші Шығыс Қазақстан өңіріндегі кесенелерді зерттей жүріп, 1993 жылы мұражайға келген кезінде айтқан. Жоғарыда аталған іссапарға да осы дерек себеп болған. Мәдениетті қолдау жылы мүмкіндігімен басталған осы зерттеу, кейіннен көне кесенені жаңғырту бастамасына ұласты.
2001 жылы қазан айында мақала авторларының соңғысының құрылтайшылығымен «Төлегетай ұрпақтары» жеке қоры ұйымдастырылды (ШҚО Әділет басқармасы заңды тұлғаны мемлекеттік тіркеу туралы Куәлік, №13433-1917Қ-Р). 2002 жылы 18 мамыр – Халықаралық мұражай күні «Туған жер тарихына тағзым» мерекелік бағдарламасында қор тұсаукесері өткізіліп, жиынға шақырылған қонақтар мен аудан тұрғындары, барлығы бес жүзге жуық адам қатысты. Сол жылдың 9 желтоқсанында өткен қордың кезекті мәжілісінде Қамқоршылық кеңесінің қолдауымен көне кесененің қайта жаңғыртылу мәселесі жолға қойылды. Қор құрылтайшысының ұйғаруымен бастаманың алғашқы кезеңінде Қызылорда облысы Жаңақорған ауданына барып, ауданның сол кездегі әкімі Нәжімеддин Мұсабаевқа жолығып, ескерткішті қайта жаңғырту жөнінде қолдау алынды. Астанадағы бір топ азаматтардың басқосуында Жаңақорғанда ас өткізу белгіленді. 2002 жылғы асқа дайындық барысында «Төлегетай ұрпақтары» жеке қорының құрылтайшысының ұйғаруымен Жаңақорғанда өкілдік ашып, жаңғырту жұмысын бастау жоспарланды. Қордың Жарғысына сәйкес өкілдік Ережесі әзірленді. 2002 жылы 18 желтоқсанда Жаңақорғанда өткен асқа жүз елудей Төлегетай ұрпақтары еліміздің әр түпкірінен келіп қатысты. Астан кейінгі бір топ азаматтар жиналған отырыста қызылордалық Олжабай Сапарбайұлы өзгеше «белсенділік» танытты. Өзінің екіұшты пікірін айта келе, өкілдікті Қызылорда қаласында ашуды ұсынды. Отырыс барысында өзімен бірге заңгер, қаржыгер ертіп келгенін мәлімдеп, мәселені шешуді жергілікті жерге бұра тартып отырды. Осы себептермен отырыс нәтижесіз аяқталып, асқа жиналған қаржыны Олжабай ақсақал көпшіліктің көзінше жанындағы Серік Тәшімбетовке газетке оратып алып кетті. Бұл қаражат Жаңақорғанда ашылмақ болған өкілдіктің есеп-шотына «Төлегетай ұрпақтары» қоры тарапынан орналастырылуы тиіс болатын. Осылайша шығысқазақстандық мәдениет қызметкері көтерген игі бастаманы қызылордалық ішкі істер қызметінің ардагері «меншіктеп» алды. Алғашқы астан жиналған қаржының демеуімен бірқатар қалаларды ұшақпен аралап жиын өткізе бастаған арынды ақсақалдың жолын бөгемедік. Біз ата-бабамыздан қалған жөн-жосықты сақтап, өзіміз құрған үкіметтік емес ұйымның қызметін тоқтатып, жергілікті азаматтарға жол бердік. Өйткені, ол 2003 жылы наурыз айында Қызылорда қаласында «Төлегетай» қоғамдық қорын құрып алған болатын. Артынан емін-еркін екі жыл жүрген Олжабай Сапарбайұлы бастаманы қайранға қалдырғанын естіп-білдік. Олжабай Сапарбайұлының осындай әрекеттері салдарынан бастама, яғни кесенелерді жаңғырту ісі екі жарым жылға кешіктірілді. Сондықтан, 2005 жылы сәуір айында ақсақалды қолдаушыларымен бірге Жаңақорғанға отырысқа шақырып, ұзақ дау-дамайдан кейін, бергісі келмесе де алғашқы бастамамыздың тізгінін қайта қолымызға алдық. Кейінгі айғақта дерек болуы үшін түркістандық ағайындар отырысты бейнетаспаға түсіріп алды, қазірде қолымызда сақтаулы.
Игі бастама тізгіні «Төлегетай ұрпақтары» жеке қоры ұйымдастыруына алынғаннан кейін, 2005 жылдың 1 шілдесінде жергілікті қариялардан бата алынып, көне кесенені жаңғырту үшін қызу жұмыстар басталып кетті. Ұйымдастыру жұмысы өте ауқымды болды, Түркістан, Хиуа, Шымкент, Қызылорда қалаларынан шеберлер шақырылды. Таяу жердегі Сайрам мен Созақтан жұмысшылар қамтылды. «Төлегетай ұрпақтары» қорының шотына жобаның бас демеушілері: Дәулет Тұрлыханов, Бауыржан Оспанов, Жанат Дүзбаев сынды елімізге белгілі азаматтар тарапынан көлемді қаражат түсе бастады. Осындай қаржы үлесін жүзден астам демеуші болған тікелей ұрпақтары еселей түсті. Тағы басқа абзал азаматтар белсенділік көрсетті. Кесенелерді жаңғырту кезеңінде ұлы бабалар туралы танымдық жазбалар жазу туралы зиялы қауымға ұсыныс берілді. Халық жазушысы Қабдеш Жұмаділов «Миллиондай ұрпағы бар Ұлы баба» атты мақала (Қазақ тарихы, 2004 ж.), жас тарихшы Тұрсынхан Зәкенұлы «Сыр бойындағы Төлегетай кесенесі» тақырыбында мазмұнды тарихи зерттеу жазды. Кейінгі жылы елімізге белгілі ақын Несіпбек Айтұлының «Төлегетай» поэмасы жарық көрді. Ақындар Әбубәкір Қайран, Әділғазы Қайырбеков, Жанат Әскербекқызы өз толғауларын арнады.
Біз бұл мақаланы Ұлы бабаның жер бесігін қайта жаңғыртудағы парызымызды дәріптеу үшін емес, еліміздің бас газеті – «Егемен Қазақстанда» 2011 жылы 10 қыркүйекте жарияланған Олжабай Сапарбайұлының «Баба аруағына тағзым» мақаласындағы жалған ақпараттардың ақиқатын ашуға бағыттап отырмыз. Бұл ақсақал бұдан бұрын да Қызылорда облыстық «Сыр бойы» газетіне де осы мазмұндас бет ұйымдастырған болатын. Онда да кесенелерді жаңғыртуға ұйытқы болушы деп өзін көрсетуіне мән бермеген едік. Енді, міне еліміздің бас газетінің жарнама бетіне де қол салып отыр. Белгілі халық термесінде: «Жақсылар жақсымын деп айта алмайды, жамандар жақсымын деп айқайлайды», деген сөз осындайда айтылса керек. Төрт жыл бойы еңбектенген құрылысшылардың азық-түлігін Қызылорда, Шымкент, Түркістан, Шиелі, Темірлан, Саурандағы ағайындар қамтамасыз етіп отырды. О.Сапарбайұлы бұл қайырымдылық істен жартылай ғана хабардар болғандығынан, өзінің мақаласында құрылысқа жеткізілген азық-түліктің уақытын екі жылға кем, ал құрылыстың басталуын бір жылға кейін көрсеткені – оның игілікті істің сыртында болғанының дәлелі. Демек, Олжабай Сапарбайұлының «баба аруағына тағзымы» шындықтан алыс. Біріншіден, өзін игі бастамашы қатарында көрсеткен. Екіншіден, «Семейде ашылған «Төлегетай ұрпақтары» дейтін қордың кесене тұрғызуға қауқары жоқ», – деп аталған үкіметтік емес ұйымның жарғылық мақсатына нұқсан келтірген. Дүйім елдің көз алдында көне кесенелердің қайта жаңғыртылуын ұйымдастырған «Төлегетай ұрпақтары» жеке қорының ізгілікті қызметін толық аяқтағанына үш жыл өткеннен кейін осылайша сөз саптауы О.Сапарбайұлына не пайда бермек? Үшіншіден, 2001 жылы Астанаға шақыртылып, елге танымал абзал кісі ретінде әлі ашылмаған қордың президенттігіне тағайындала салуы. Бұл халық арасында айтылатын «әлі тумаған қысырақтың қымызын ішкен» дейтін әжуаға саятын күпірлік сөз. Ал үкіметтік емес ұйымдар туралы ережеде қордың басшылық органдары сайлануының мемлекеттік тіркеуден кейін ғана жүзеге асатындығы заңдылық тұрғыда жазылған. Демек, бұл айтқаны да ешқандай қисынға жанаспайды. Ол өзін тізгінді мықты ұстайтын кісі деп көрсетуді де ұмытпаған. Осылайша өзін-өзі мадақтаудың өңін айналдырып, басқа адамның айтқаны деп сілтемелік айласын қолдана білген. Енді дәйексіз әрі жалғандықпен құралған мақаланың заң бұрмалаушылық тұсына дәлел келтірейік. О.Сапарбайұлы өз мақаласының тақырыбына қабаттастырып кесененің «Төлегетай ұрпақтары» қорының тапсырысымен әзірленген жоба көрінісін орналастырған. Бұл сурет «Төлегетай ұрпақтары» қоры 2005-2008 жылдар аралығында Төлегетай-Қылышты кесенелерін тарихи-сәулеттік кешенге айналдырып, оның салтанатты ашылу құрметіне ұлы бабалар рухына арнап 2008 жылы 25 қазанда Жаңақорған мен Түркістанда өткізілген астың шақыру-бағдарламасының мұқабасынан ұрланып алынған. О.Сапарбайұлы ешқандай шімірікпестен осы жобаның авторын Жандарбек Мәлібеков деп бадырайтып, жалған жазған. Жобаның нақты авторы кезінде Қорқыт, Абай, Қобыланды ескерткіштерін жобалаған ҚР еңбек сіңірген сәулешісі, Шығыс елдері халықаралық сәулет академиясының академигі Бек Ибраев. Осы мақаланың авторларына, яғни жоба жетекшісі мен сәулетшісіне шығармашылық туындылары үшін 2010 жылдың 3 қыркүйегінде Қазақстан Республикасы Әділет министрлігі Зияткерлік меншік құқығы комитетінің №1413 куәлігі берілген. Демек, О.Сапарбайұлы жалғандыққа барып отыр. Осылайша шындықтың ауылынан алшақтаған ішкі істер ардагеріне не жорық? Сондықтан ондай адамның жобаға ешқандай қарым-қатынасы болмаса да, ҚР Тарихи және мәдени ескерткіштерінің жергілікті маңызы бар мемлекеттік тізіміне енген ШҚО облыстық мәдениет басқармасы қолдаған және Тарбағатай тарихи-өлкетану мұражайы мен «Төлегетай ұрпақтары» жеке қоры бірлесіп атқарған қоғамдық іске заңсыз қол сұғуы заңдылық тұрғысынан айқындалуы тиіс. Кесенелердің жаңғыртылуы кезеңінде бір күн төбесін көрсетпеген, құрылысқа бір кесек кірпіш, құрылысшыларға бір түйір нан апармаған Олжабай Сапарбайұлының «дайын асқа тік қасық» болып жаһанға жар салуын, бір топ азаматтарды үгіттеп, халықаралық қор құру әрекетімен әбігерге түсуі жөнсіздіктің бір көрінісі деп түсінеміз. Ең өрескелі сол, игілікті істі иемденген ақсақал мақаласының соңында «біз мақсатымызға жеттік!» дейді. Сөйте тұра, бірге жеттік деп семейлік «Төлегетай ұрпақтары» қорын екінші қатарға қосымшалайды. Бұл жалған сөздерді тізбектеп жазғаннан жаңылғаны ма, әлде шындықтың өткір жүзінен қаймыққаны ма?.. Оны қос мақаланы салыстырып оқыған көзі қарақты оқырман көңіліне түйіп, ажыратып алар деген ойдамыз. Сексеннің сеңгіріне келсе де мемлекеттік «Мәдени мұра» бағдарламасы аясында жүзеге асқан үкіметтік емес ұйымның ісіне он жыл бойы орынсыз араласуын доғармаған ақсақалды сот төрелігіне жүгінтіп, тоқтау салынуына әрекеттенетін боламыз. Шығармашылық ісімізге орынсыз киліккендерден аулақ болуды қалаймыз. Біз мәдениет пен өнер саласындағы атқарылған игілікті іске қолдау көрсеткен ақ ниетті азаматтарға ризашылығымызды білдіреміз. Төлегетай асында таратылған «Жаңғырған жер бесік» жинағында ізгілікті істің нақты кейіпкерлері – «Төлегетай ұрпақтары» қоры демеушілерінің жасампаз үлестері туралы жарияланғаны, телеарналар мен баспасөз арқылы елге тегіс хабарланғаны мәлім. Ұлы бабалар рухына тағзым адал ниеттен болғаны абзал.
Бек ИБРАЕВ, академик, сәулетші,
Қонысбек АҚЖАСАР, Қазақстан Республикасының Мәдениет қайраткері.