ТҮЙРЕГІШ ТҮЙІНДЕР
Қылдан да көлеңке түседі.
* * *
Өтірікшінің қоңызы –
Доңыздан да үлкен.
* * *
Тентектің бәрі – долы.
* * *
Ішкіштің – иіні түскіш.
* * *
Ақымақпен достасқан,
Ақылымен қоштасқан.
* * *
Кіжінгеннің қыжылы көбейеді.
* * *
Шалқақтағанның шаруасы шатқаяқ.
* * *
Шала оқыған – шамданғыш.
* * *
Шатағына қарай – шапалақ.
* * *
Үлкені миғұла болса,
Кішісі сұңғыла болмас.
* * *
Тантыма таңдана білмейді.
* * *
Талапсыздардың бәрі – тартыншақ.
* * *
Тұйыққа тірелгендер тыпырлайды.
* * *
Түңілген тұншығып өледі.
* * *
Озбырдың бәрі ұрынғыш.
* * *
Өркөкіректің шын аты – көркөкірек.
Мұзафар ӘЛІМБАЕВ, Қазақстанның халық жазушысы.
_____________________
ЖЕМ...ҚОРЛЫҚ
Дағдарыстан аман өту үшін,
Өркениеттілікке жету үшін,
Шылқып баюымыз,
Былқып тоюымыз керек.
Сосын дамуды
Жолға қоюымыз керек, –
Деп бәріміз дүрлігіп,
Сүрініп-қабынып сүрлігіп,
Кедейшілікке қарсы
Майдан ашып,
Кірістік жеуге ашық.
Арамза алпауыттар асап,
Арсыздар жеңгетайлық жасап,
Алаяқтар жұртты алдап,
Суайттар жанын жалдап,
Ұрылар бір жерден жымқырып,
Жымқыра алмаса, қымқырып.
Сыбайластар ұйымдасып,
Айлакерлер жалған ұйым ашып,
Жалақорлар жала жауып,
Делдалдар пайда тауып,
Парақорлар пара алып,
Тоқетері – жемқорлықтың түр-түрі
Бара жатыр таралып...
О тоба!
Еңбек етпей ішіп-жеу,
Болмай қалды жаңалық.
* * *
Оу, ағайын!
Адалдап асымызды
Жейік те талғап-талмап.
Әйтпесе ақырында,
Өзімізді өзіміз
Қоярмыз бір күн жалмап.
_____________________
МҰНДАЙ ДА БОЛАДЫ...
Елімізде алдағы уақытта тек «Жарнама» берумен айналысатын телеканал құрылмақшы.
Сөйтіп, жарнаманы жанындай жақсы көретін ел-жұрт, онысын арасындағы жаңалықтар мен көркем фильмдерсіз-ақ айызы қана көре алуына мүмкіндік жасалып отыр.
* * *
Әлемге танымал шахматист Гарри Каспаровтың цыған шахматисімен ойнаймын деп, бесінші жүрісте-ақ бақандай екі атынан айырылып тығырыққа тірелгені бар.
* * *
Зерттеулер бойынша әйелдердің 40 пайызы қыс мезгілін ұнатады екен де, ал 60-ына қыс онша ұнай қоймайтын көрінеді. Өйткені, олардың 40 пайызында әсем де қымбат тон бар екен де, ал 60-ында ол қолжетпес қыс киім жоқ көрінеді.
* * *
Жұмыстан ерте кетудің аяғы жақсылыққа апарып соқпайды. Бізде біреу кете қалып еді, көп өтпей ажырасып тынды.
* * *
– Арман ауруханаға түсіп қалыпты!
– Мәссаған! Кеше ғана оны орталық саябақта бір әдемі қызбен қыдырып жүргенін көріп ем...
– Сен ғана емес, әйелі де көріп қалыпты...
______________________
ТІЛЕМІЗІК
Орысша сөйлегеннен
Мүйіз шықса,
Қазаққа шығар еді...
Бірақ әлі шыққан жоқ
Сонда да мұны
Көкелеріміз ұққан жоқ.
Сондықтан бара жатыр
үніміз өшіп,
Пұшаймандықпен күніміз өтіп.
Жоғарыда
Оны ойлар адам жоқ,
Өз ұлтының арқасында
Жүргені адам боп.
Бірінің де қаперіне кірмейді,
Анасының тілін көзіне ілмейді.
Ағылшынша үйреніңдер,
Америкалық күйге еніңдер, –
Деп тілі шықпаған баланы оқытпақшы,
Батысша былдырлатып шоқытпақшы.
Қысқасы, резеңке емізікпен емізіп,
Аузына салмақшы тілемізік.
Әй, бірақ жасандылық нәр бере ме?!
Ойы шатылып бұзылған бала,
Өскен соң әкесіне әл бере ме?!
Күләш КЕРІМБЕКҚЫЗЫ.
Қостанай.
__________________________
Шолақ мылтық
ДӘН РИЗА БОЛУ...
Бір жас жігіт супермаркетті аралап азық-түлік алып жүргенде, өзіне кірпік қақпай қарап тұрған егделеу әйелді байқайды да, оған мән бермегендей жүре береді. Есеп айырысу үшін кассаға келіп тұрса, әлгі кісі қасында тұр екен.
– Балам, бағанадан бері саған қарап тұрғанымды байқадың ба? – дейді ол.
– Иә, оқасы жоқ.
– Теріс түсінбе. Өткенде ғана қайтыс болған ұлыма өте ұқсайды екенсің.
– Апай, ұлыңыздың арты қайырлы болсын! Өте өкінішті жағдай екен. Сіз үшін қандай жақсылық жасай аламын?
– Рахмет, балам, мен дүкеннен шығарда «Пока, мама» деп қол бұлғасаң, дән риза болар едім...
Жігіт келіседі де, апай шығып бара жатқанда қол бұлғайды. Содан кейін кассаға келіп ақша төлейін десе, сатушы елу мың теңге сұрайды.
Жігіт:
– Менің алғаным: азғантай ғана. Елу мың қайдан шыққан ақша? – дегенде, сатушы:
– Жаңа ғана сіздің анаңыз: «Менің ұлым төлейді», – деген болатын, – депті.
______________________
ЖЕТІМ СӨЗ
Қилыбай кеңес заманында да ат үстінде болды. Белді қызметтерді атқарып, ауданнан әріге де барып, облыста да дүрілдеп тұрды.
Кеңес құлап «тұрымтай тұсымен» болғанда Қилекең шыққан «шыңынан» құлдилап кеп кіндік қаны тамған жерін паналап, көпті көргендігінің арқасында оң-солын білмей дағдарған ел-жұртының тізгінін қолына алып қожалық еткеніне де біраз болған.
Пәлекет, ұжымдастыра да білді, істі ілгері жылжыта да білді... Негізі, қара басының қамын қамту жағынан алдына жан салмады.
Қарсы келгенді қағып тастайды. Артынан келгенді теуіп, алдына шыққанды тістеп, жалына жан жуытпады десе де болады.
Әлқиссамды қысқартып, айтарыма көшейін.
Қилыбайға кім-кімнің де қыжылы бар, атарға оғы жоқ, іштен тынып тымсырайғандар біраз.
Солар қауқылдаса келіп, маған: «Бірден-бір айтар адам сізсіз. Сіз айтпағанда кім айтады! Сізді де талай тақырға отырғызғанын білеміз» деп тақымдап болмаған соң, өзімнің де іштегі қыжылым оянып, олардың ұсынысын қабыл алдым.
Сөзімді «Аузы қисық болса да бай баласы сөйлесін» деген мақал бар деп бастап, «Әй, Қилыбай, бері қара, біздің де айтарымыз бар!» деп алып, шешінген судан тайынбас, әйда кеп иттерісін басына қаптайын деп түйдім. Алдымен өз басыма көрсеткен қорлығын тізімдеп келіп, көпке ортақ қазынаны талан-тараж еткенін жайып салайын. «Иттен ұят кетсе қазаннан қақпақ кетеді» деп алып, білетін «майлы шелпектерін» шертіп көзіне көк шыбын үймелетейін. «Байлыққа беліңді бекем буынып көзіңді шел басты» деп тікесінен қайырып, «Дәлел ме?!. Дәлел керек болса...» деп алып, қаладағы зәулім сарайын, баласы тұрмақ кеше дүниеге келген немересінің атындағы үй-жайды... қос-қостан қаңтарылған көлік... бәр-бәрін тізіп шығып, сөзімді: «Өзің оңбадың! Адамгершіліктен жұрдай болдың! Үлкенді үлкен, кішіні кіші демедің. Аттылыға жол, ауыздыға сөз бермедің. Кедей-кепшікке құлақ аспадың. Астамшылығың алты қап, алапестігің атан түйеге жүк. Байқа Қилыбай! Мұндайда көпшілік: «Көріңде өкіргір» деп қияс кетеді» деп төтесінен тартып бірақ тоқтайын дедім.
– Жегенін желкесінен шығару керек! Айғақтаймыз, тайға таңба басқандай тайқып кете алмайды, – деп жатыр келгендердің бірі.
– Қарызы шаш етектен. Ортадағы берешегі бел асып кетсе, бір менің бес жүз мыңымды бермегелі бес жылдың жүзі болды.
– Үйіп-төккен уәдесі үйме! Қаладағы қызыма үй алып беремін деп алашағын алып әдірем қаптырғаны бар мені!
– Менің де баламды бастық етемін деген пәтуасы желге ұшқалы қашан.
– Қала маңынан жер алып беремін деген сөзіне сеніп бар аша тұяғымды алдына салып берген өзіме обал жоқ!
... Ойпыр-ай, «Естімеген елде көп» деген, келгендер осы мәндегі «есепті» сөздерін ағыл-тегіл айтып, алдыдағы жиылыста менің «алғыр» сөз бастауымды өтініп, ретімен өздері де іреп-соятындарына келісіп барып тарқады.
... Содан, ажал аяқ асты... «Апаттан жол үстінде Қилыбай қаза тауыпты» деген суық хабар жетті.
... Қайтейік, ажалға амал бар ма, Қилыбайды шығарып салудың қазасында тұрмыз. Сауап үшін сапқа тұрғандар бірен-саран ғана...
Ауыл молдасы:
– Жамағат, қалың көпшілік, алпыстан асқан шағында бұл дүниеден татар дәмі таусылып Қилыбай көкеміз бақилық болып барады. Сұрарым, ол қандай адам еді? – деп еді, жым-жылас, үнсіздік...
Молдекең жаңағы сұрағына екпін тастай тағы да үш рет қайталап төңірегіне төңкеріле қарап еді:
– Жақсы адам... – деген сөз жарықшақтанып естілген болды.
– Тірісінде пендешілікпен бере алмаған қарызы бар ма марқұмның? – деп жатыр молда.
...Үнсіздік...
Молдекеңе де керегі сол, өзі өз болғалы бірінші рет іле-шала айтылатын «Қарызын өтейсіздер ме?» деген сөзді айтпаған күйі «мүрдені алып жүріңдер» деп ишарат жасады...
Менің миымды өткендегі Қилыбай туралы «жетім» сөздер өңмеңдеп алғандікі ме, басым сыздап, көзім қарауытып талықсып құлаппын...
Данияр ЖЕҢІС.
Талдықорған.
_______________
МЕКТЕПТЕГІ МЫСҚЫЛ
Самат:
– Апа, бүгін мектеп директоры менен «аға-әпкең немесе іні-қарындастарың бар ма?» деп сұрады. Мен: «Жоқ, мен жалғыз баламын» дедім.
Шешесі:
– Ал ол не деді?
– Ол: «Құдайға шүкір!» деді.
* * *
Кішкентай бала мектептегі үзіліс кезінде ойбай салып бақырса керек.
– Не боп қалды? – депті жанашыр біреу.
– Математика пәнінің мұғалімі баспалдақтан құлап түсіпті! – деп еңірейді әлгі бала.
– Ойбай-ау, оған бола уайымдамай-ақ қойсаңшы, мұғалімің аман-есен, ауруханаға бір күн жатады да шығады!
– Мен оны уайымдап жылап жатқан жоқпын! Мұғалімнің құлағанын балалардың бәрі көріпті, мен ғана буфетте болып көре алмай қалыппын!
* * *
Сабақта мұғалім оқушыға:
– Александр Македонский қашан қайтыс болды? – деп сұрақ қойғанда ол:
– Ойпыр-ай, мен ол кісінің ауырып жатқанын да естімеппін! – депті.
* * *
Мұғалім:
– Асабасов, ертең ата-анаңсыз мектепке келмей-ақ қой!
Асабасов:
– Арғы күні ше?..
__________________
Мүйісті жүргізген Берік САДЫР.