32 200 000 000
ӨТКЕН 9 АЙДА ӨНДІРІЛГЕН МАЛ ӨНІМДЕРІ ОСЫНШАМА ТЕҢГЕНІ ҚҰРАҒАН
Еліміздегі азық-түлік «кәрзеңкесінің» басым бөлігін мал өнімдері құрайтыны белгілі. Сондықтан болар, осы аса маңызды өнімдерді өндіруде облыс шаруа қожалықтары биыл айтарлықтай табысқа қол жеткізді.
Атап айтсақ, өткен жылдың осы кезеңімен салыстырсақ, қой-ешкінің, жылқының, түйенің, шошқаның саны 1-3%, ал ет, сүт, жүн және жұмыртқа өндіру 1-3%-ға артқан. Ал теңгеге шаққанда өткен жылдың 9 айында өндірілген мал өнімдерінің жалпы көлемі 26, 5 миллиард теңге болса, ол биылғы дәл осы кезеңде 32, 2 миллиард теңгеге жеткен.
Облыс малшыларының мұндай зор табысын ауыл шаруашылығы мамандары өңірдегі асыл тұқымды мал өсіретін субъектілердің арта түсуіне байланыстырып отыр. Мысалы, 2001 жылы облыс бойынша 17 асыл тұқымды мал шаруашылығы болса, қазір олардың саны 104-ке жетіпті.
Көсемәлі СӘТТІБАЙҰЛЫ. Жамбыл облысы.
___________
1 230 000 000
АҚТӨБЕДЕГІ АЙНАЛМА ЖОЛҒА РЕСПУБЛИКАЛЫҚ БЮДЖЕТТЕН ОСЫНШАМА ТЕҢГЕ ҚАРЖЫ БӨЛІНЕТІН БОЛДЫ
Бұл туралы облыс активімен республикалық ақпараттық-насихаттық топтың кездесуінде ҚР Көлік және коммуникация вице-министрі Асылбек Дүйсебаев жиналғандарды хабардар етті. Үстіміздегі жылы облыстың автомобиль жолдарын дамытуға республикалық бюджеттен 15 млрд. теңге бөлінген, оның 14,7 млрд. теңгесі республикалық маңыздағы автожолдарға қаралған. Бөлінген қаржыға ұзындығы 489 шақырым 6 жол учаскесін қайта жарақтандыру жұмыстары жүргізілуде. 2012 жылы жалпы пайдаланылатын облыс жолдарын дамытуға 18,5 млрд. теңге қаралған. Оның 17,4 млрд. теңгесі республикалық желі жолдарына бөлінеді деп күтілуде. Қаланың оңтүстік айналма жолының қашан басталатыны «Батыс Еуропа – Батыс Қытай» халықаралық көлік дәлізі құрылысы аяқталған соң белгілі болмақ.
Сатыбалды СӘУІРБАЙ. Ақтөбе облысы.
_________
22 000 000
ҚАЗІРГІ КЕЗДЕ ОБЛЫСТЫҢ ЖЕР ҚОРЫ ОСЫНШАМА ГЕКТАРДАН АСТАМ
Жер – асыраушымыз. Демек, оған ерекше күтім, қамқорлық қажеттігі белгілі. Сондықтан да еліміздің өңірлерінде жылдар бойы қараусыз қалған ауыл шаруашылығы мақсатындағы жер телімдерін анықтау мен заң ауқымында мемлекетке қайтару қолға алынып отыр. Нәтижесінде ауыл шаруашылығы алқаптары 16 млн. 400 мың гектар, тыңайған жері 127,1 мың гектар, шабындық 470,7 мың және 14,7 мың гектар жайылымдық бар екені анықталған. Ал бақша мен қызметтік үлес жерлерінің аумағы 6,9 мың гектарды құрайды.
Өңірдегі 913 ауыл шаруашылығы тауарын өндірушілер мен 60227 шаруа қожалықтары 2 млн. 24,4 мың гектар, орта және шағын кәсіпкерлікпен айналысатындар 97,5 мың гектар жерді тиімді пайдалануда. Десек те әлі де қолдағы жерлерін мақсатты пайдаланбай отырғандардың да кездесетіні анықталуда. Мұндай жердің жалпы аумағы – 381,6 мың гектар. Пайдаланылмай жатқан жерлерді мемлекетке қайтару жалғасуда.
Қазіргі кезде облыстық жер қоры 22 млн. 400 мың гектарды құраса, жылдан-жылға оны игеру мен ел игілігіне айналдыру жұмыстары нәтижелі жүргізіліп келеді.
Күмісжан БАЙЖАН. Алматы облысы.