Қазақстандықтардың бүгінгі өмір сүру деңгейі мына бір нәрсені анық аңғартады: Қазақстан – нарықтық экономикалық дамуды бетке алған, әлемдік экономикалық жүйемен барынша ықпалдасқан демократиялық мемлекет. Расында, бүгінгі күні жасампаздыққа толы әр жылымыз егемендіктің елең-алаңындағы қысыл-таяң шақты артқа тастап, дамудың даңғылына түсті.
Шығыс халықтарында: «Құдайым өзгерістер кезеңінде өмір сүруден сақтасын», деген сөз бар. Шындығында, бұл тіпті қарғыспен қатар айтылатын тіркес іспетті. Десек те, мен барлық қазақстандықтар секілді өткен ғасырдың 90 жылдарындағы қиындықтарды еңсеріп, өзіміздің ұлттық мемлекетіміздің қалыптасып, қарышты дамуына бірқанша үлес қосқанымды әркез мақтанышпен еске аламын.
Сол жылдары тәуелсіз елдің тұңғыш сайланған Парламентінің барынша ынталы жұмысын еске ала отырып, елдің бүгінгі жетістігін нақты сезінуге болады. Расында, тәуелсіздіктің алғашқы жылында қалыптасқан егемен елдің заң шығару билігі күні бүгін ұлттық нормативтік актілерді халықаралық стандарттарға сәйкестендіруді табысты жаңғыртып отырған базаның іргетасы ретінде қаланды. Сол жылдары елдің Тұңғыш Президенті Нұрсұлтан Назарбаевпен қоян-қолтық жұмыс істеген депутаттар жасампаздықтың ауқымды үдерісіне өздерінің сүбелі үлестерін қосты.
Тәуелсіздіктің алғашқы жылдары қабылданған заңдардың әлеуеті әлі күнге сезіліп келеді. Мәселен, алғашқы жылдары «Қазақстан Республикасының ұлттық қауіпсіздігі туралы», «Мемлекеттік қызмет туралы», «Білім беру туралы», «Неке және отбасы туралы», «Зейнетақымен қамсыздандыру туралы» және басқа да өміршең заңдар қабылданғаны есімде. Бұдан бөлек, бірқатар халықаралық келісімдер, оның ішінде әйелдердің саяси құқықтары туралы конвенция алғашқылар қатарында қабылданды. Тоқтала кететін жәйт, дәл осы құжаттың еліміз үшін мүлдем керексіз болмағаны айдан анық. Бұл ретте Мемлекет басшысының қазақстандық әйелдер ісі туралы сара саясаты Қазақстан Президенті жанындағы Отбасы және әйелдер ісі жөніндегі ұлттық комиссияны құрумен астасты. 1998 жылдың соңына таман қызметке кіріскен Ұлттық комиссияға жетекшілік етуді Мемлекет басшысы маған министр қызметімен қоса атқаруды жүктеп, үлкен сенім білдірген еді.
Ұлттық комиссиядағы бірінші кезектегі міндет ұлттық заңнамалар топтамасын қалыптастыру еді. Сол жылдары Сара Назарбаеваның бастамасымен комиссия елімізде тұңғыш рет «Қазақстан Республикасындағы балалар құқы туралы», жетім балаларға арналған «Отбасы түріндегі балалар ауылдары және жасөспірімдер үйлері туралы» заңдарды қабылдауға мұрындық болды. Сонымен қатар, Мемлекет басшысы халықаралық қалыптасқан құқықтық актілерді зерделей отырып, Қазақстандағы әйелдердің жағдайын жақсарта түсетін заңнама нормаларын қалыптастыру туралы тапсырма жүктеген-ді. Олардың арасында 1995 жылғы Бүкілдүниежүзілік әйелдер форумында қабылданған Бейжің іс-қимылдар тұғырнамасы да бар болатын. Аталған форумдағы іскерлік ахуал, оған қатысушы біздерге Ұлттық комиссияның жұмысын тиянақты ұйымдастыруға, әйелдердің жағдайын жақсартуға бағытталған Ұлттық іс-қимыл жоспарын әзірлеуге жігерлендіріп те жіберді (1999 жылы). Кейіннен өз тарапымыздан Қылмыстық және қылмыстық-процессуалды кодекстерге гендерлік сараптама жасауды бастама етіп көтердік.
Нәтижесінде, ұлттық заңнамада әйелдерге қарсы зорлық-зомбылық әрекеттері үшін тағайындалатын жаза қатайтылды. Бұдан бөлек, Ұлттық комиссиясының жұмысы арқасында әйелдер мен балаларды саудаға салатын трафиктер туралы мәселе көтеріліп, Қылмыстық кодекске, сондай-ақ «Қазақстан Республикасындағы туристік қызмет туралы» Заңға әйелдер мен балаларды сексуалдық, сондай ақ басқа да мәжбүрлі зорлық шараларға тарту мақсатында елден заңсыз әкетулердің жолы кесілді. Зорлықтан жапа шеккен әйелдерге, балаларға арналған дағдарыс орталықтары біртіндеп ашыла бастады. Мұндай орталықтар Елбасының тапсырмасы бойынша ішкі істер органдары құрылымында жасақталған арнайы бөлімшелермен әлі күнге тығыз байланыста.
Әйтсе де, менің ойымша, әйелдерді қорғап қана қою жеткіліксіз, олар үшін мүмкіндіктер жолы ашыла түскені игі. Бұл жайында Мемлекет басшысы өзінің бір сөзінде: «Әйелдер – бейбітшілік пен тұрақтылық негізі» деп айтқаны есте. Президенттің көрегендік пайымын басшылыққа ала отырып, біз де әуел бастан ісімізді осындай негізбен қалыптастыруға тырыстық. Соның арқасында 2001 жылы еліміздегі әйел кәсіпкерлерді қолдап, олардың ісін дамыту үшін бюджеттен 150 млн. теңге бөлінді. Бұл «2002 жылға арналған республикалық бюджет туралы» заң жобасында жеке тармақша болып жазылды әрі дәл осы мақсатқа бөлінген қаражаттың тең жартысын құрайтын еді. Ал 2003 жылы Ұлттық комиссия мен республикалық шағын кәсіпкерлікті дамыту қоры арасында жасалған меморандум арқасында әйелдердің іскерлігі үшін аталған қордан бөлінетін заемдар ставкасын 12 пайыздан 9 пайызға дейін төмендетуге қол жеткіздік. Сол жылдары «Микрокредиттік ұйымдар туралы» Заңды жетілдіру нәтижесінде кәсіпкерлердің несие алу үдерістері де жеңілдеді, оның мөлшері де айтарлықтай ұлғая түсті. Нәтижесі көзге ұрып тұр: бүгінгі күні Қазақстандағы кәсіпкерлердің 40%-ы – әйелдер.
Елбасы Н.Назарбаевтың әйелдер қауымын ел экономикасына кеңінен тарту туралы ауқымды бастамаларының арқасында 2009 жылдан бері Әйелдер кәсіпкерлігін шағын несиемен қамтамасыз ету бағдарламасы сәтті жүзеге асып келеді. Бағдарлама 2015 жылға дейін деп белгіленген. Үстіміздегі жылдың 1 қаңтарына дейін-ақ аталған бағдарлама шеңберінде әріптес банктермен жалпы сомасы 1,4 млрд. теңгені құрайтын жобалар қаржыландырылыпты. Бизнестің байыбын терең меңгерген әйел кәсіпкерлер орта есеппен 3,8 млн. теңгенің заемдарын иеленген. 2011-2012 жылдары осы бағдарлама бойынша 2,2 млрд. теңге қаражат бөлінбекші. Осылайша, біздің бастамамызбен бұдан 10 жыл бұрын қолға алынған шара осындай ауқымды деңгейге жетіп отыр.
Альберт Эйнштейн: «Өмірде бір нәрсеге болса да қол жеткізу үшін ойды өзгерту керек», деп жазады. Әйелдер құқығын қамтамасыз ету саласында қызмет ете жүріп, біз біртіндеп Гендерлік теңдік стратегиясын қабылдау қажеттігін нысанаға алдық. Мұндай тапсырманы Президент IV Әйелдер форумында 2004 жылы жүктеген еді. Кейіннен 2006 – 2016 жылдар аралығын қамтыған стратегия қазір табысты жүзеге асуда, оның шеңберіндегі барлық іс шара бюджеттік қаржымен қамтамасыз етілген.
2009 жылы Парламент Мәжілісінің депутаты ретінде мен Гендерлік теңдік стратегиясында қарастырылған екі заңды – «Ерлер мен әйелдердің теңдей құқығы мен бірдей мүмкіндіктерінің мемлекеттік кепілі туралы» және «Тұрмыс зорлық-зомбылығының алдын алу туралы» заңдарды талқылауға және қабылдауға бар ықыласыммен атсалыстым.
Бұл заңдар, бұған дейінгі Президенттің басшылығымен атқарылған басқа да жұмыстар секілді, қазақстандық заңнаманың гендерлік құрамдылығын жаңа әрі аса жоғары сапаға жетелейді. БҰҰ-да Әйелдерге қатысты кемсітушіліктің барлық түрлерін жою жөніндегі конвенцияның атқарылуы туралы Қазақстанның есебі екі жыл қатарынан тыңдалған кезде біздің ұлттық заңнамамыздың халықаралық құқық нормаларына сәйкестігі атап өтілген болатын. Мұнда да Елбасының ерен еңбегін айтпай кетуге болмайды. 2000 жылдың өзінде-ақ Ұлт көшбасшысының гендерлік теңдікке қатысты нормативтік құқықтық базаны құру, сондай ақ оның атқарылу жолдары туралы бастамасын зерделеп шыққан БҰҰ сарапшылары Қазақстанның осы салада Орталық Азия мен ТМД кеңістігінде сөзсіз көшбасшы саналуға толық құқы бар екендігін анық көрсетті.
Сонымен қатар, 2011 жылдың наурыз айында өткен Әйелдер съезінде Мемлекет басшысы Үкіметтің алдына жаңа міндеттер жүктеп, барлық саладағы қызметтерде әйелдердің қатысу үлесін жоғарылату туралы мәселе қойғаны белгілі. Сол тұста Министрлер Кабинеті, Президент Әкімшілігі мен Ұлттық комиссия (Қазақстан Президенті жанындағы Әйелдер ісі және отбасылық демографиялық саясат жөніндегі) «Нұр Отан» партиясымен бірлесе отырып шешімдер қабылдау деңгейіне әйелдерді тартудың 2016 жылға дейінгі Іс-қимыл жоспарын әзірлеп еді. Ал бүгінгі күні салалық министрліктердегі стратегиялық жоспарлардың өзі гендерлік индикаторларға ие: 2015 жылға дейін биліктегі әйелдер үлесін 30 пайызға жеткізуді қамту, әйелдердің орташа жалақысының ерлер жалақысына арақатынасын кемінде 70% деңгейде қамтамасыз ету.
Мінеки, Мемлекет басшысының қазақстандық әйелдер қауымына деген әрбір бастамасы түпкі нәтижесі кепілдендірілетін мұқият зерделенген жоспармен астасып жатыр. Екінші жағынан мұндай игі шараларды халықаралық қоғамдастық та мойындап отыр. Бұған тағы бір тың мысал: былтырғы жылдың соңына таман Алматы қаласында Гендерлік мәселелер және халықтарды орналастыру және дамыту жөніндегі халықаралық конференцияның іс-қимыл бағдарламасы жөніндегі орталық азиялық парламенттік кездесу болып өтті. Бұл ретте Қазақстанның үнқатысу алаңы ретінде бекерден-бекер таңдалып отырмағанын атап өткеніміз артық болмас. Вице төрайым ретінде гендерлік теңдік мәселелерін алға жылжытуда Қазақстанның жетістіктерін фактілердің өзі-ақ қуаттап беріп отырғанын атап айтсам деймін.
Тәуелсіздіктің 20 жылдығы жылында еліміздің заңды жетістігімен халықаралық қоғамдастық алдында бөліскен болатынмын. Мамыр айында Варшавада «Саяси үдерістердегі саяси партиялардың рөлі» атты тақырыпта семинар болып өтті. ЕҚЫҰ қолдауымен ұйымдастырылған осынау басқосуда Қазақстандағы саяси партияларға әйелдер мен ерлердің теңдей қатысуы туралы баяндама жасадым. Содан бір-екі мәліметті келтіре кеткім келеді. Еліміздің саяси партияларындағы әйелдердің үлес салмағы 30-55%-ды құрайды. Партия және оның жергілікті жерлеріндегі филиалдары басшыларының 19%-ы әйелдер болса, басшы орынбасарларының арасындағы әйелдер 22%-ды құрайды. Елбасының жетекшілігіндегі «Нұр Отан» ХДП тарапынан Мәжіліске партиялық тізіммен 19 әйел ұсынылды. Соның нәтижесінде, әйелдер қауымының Парламенттегі саны бұған дейінгі шақырылымдармен салыстырғанда екі есеге дерлік артты және олар депутаттардың жалпы санының 14%-ын құрап отыр.
Сөз соңында Мемлекет басшысының ағымдағы ел тәуелсіздігінің мерейлі жылын өткізуге қатысты айтқанына тоқтала кетсем, Елбасы: «Бұл тек бір ғана 2011 жылдың оқиғасы емес, тәуелсіздік жылдары өткерген, жүрген жолдарымыздың тұтастай мазмұны», деген болатын. Өз тәуелсіздігінің үшінші онжылдығы қарсаңында Отанымыз индустрияландыру толқынына шығып отыр. Үдемелі индустриялық-инновациялық даму бағдарламасы сәтті жүзеге асуда. Соның нәтижесінде көптеген жаңа кәсіпорындар құрылып, мыңдаған жаңа жұмыс орындары ашылатыны, сол арқылы халықтың өмір сүру деңгейі арта түсетіні көзделеді. Ендеше, Ұлт көшбасшысының дана басшылығындағы Қазақстанның елу жылдан кейінгі де, тіпті жүз жылдан кейінгі болашағы жарқын болады! Болашақтың баянды болуына біздің бүгінгі істеріміз дәлел!
Айткүл САМАҚОВА, Парламент Мәжілісінің депутаты, «Нұр Отан» ХДП-ның Парламент Мәжілісіндегі фракциясы жанындағы Әлеуметтік кеңес төрайымы.