Ресейде өзінің ойын да, пікірін де жасырмайтын әсіреұлтшылдар ел астанасында, рас Мәскеудің ортасында емес, оның шетінде «Русский марш» деп аталатын шеруін өткізді. Сөз жүзінде билік оларды қолдамаймыз десе де, олардың жосықсыздау әрекеттеріне төзімділік көрсетіп отыр.
Бұл елде 4 қараша халық бірлігінің күні саналады. Дәл осы күні сол халық бірлігіне қарсы әрекет жасалып жатса, неге оған тыйым жасалмайды дейсің. Қисын бойынша осы күні халықтардың бірлігіне арналған шаралар өтуге тиіс қой. Әр ұлттың өкілдері басқосып, ынтымаққа бастайтын әңгіме айтса, жараспай ма? Жарасар еді.
Не жасыратыны бар, бұл елде ұлт мәселесі талай ғасырдан бері барынша өткір болып келді. Өткір дегенде, әсіресе, кіші халықтар үшін өткірлеу. Ұлтшылдық үстемдік құрып, елдің шенеунік қауымы басқа кіші халықтарға өктемдік жасады. Рас, елдің зиялы қауымы ішінде бұл саясатты қатты айыптағандары да кездесті.
Осынау жөнсіз саясаттың салдары КСРО күйреп, орнына тәуелсіз елдер пайда болғанда да жалғасып жатты. Ұлтшыл-патриоттар дегендер пайда болып, өз ұлттарының артықшылығын, құқы жоғарылығын айтып, шулай бастады. Шүкіршілік дейтін бір жәйт, әзірге бұл жосықсыз айқайлар мемлекеттік саясатқа айнала қойған жоқ.
Енді Мәскеудегі жағдайға оралсақ, Мәскеудің шеткі ауданы Люблиноға жиналған алашұбар ұлтшылдар (скинхэдтер, национал-социалистер, национал-демократтар, ұлтшыл фанаттар) орыс империясының қара-сары-ақ түсті туын көтеріп шығып, бір-бірін құттықтап, «Алға, орыстар!», «Ресей – орыстар үшін!», «Мәскеу – мәскеуліктер үшін!» деп ұрандатып, шуласты.
Олардың сөздеріне, ұрандарына түсініктеме беріп жатудың қажеті жоқ. Мұның астам ұлтшылдықтың көрінісі, бұрын да жер-жерде орын алған ұлтаралық қақтығыстардың жалғасы екендігі даусыз.
Орыс ұлтшылдарының шеруіне әртүрлі баға беріліп жатыр. Біраз сарапшылар елде қалыптасып отырған әлеуметтік мәселелерден жұртшылық назарын басқаға бұру үшін Ресей басшылығы осынау әсіреұлтшылдардың әрекеттерін қатты шектемеу арқылы оларға қолдау көрсетіп отыр дегенге тоқтайды. Әсіресе, ашық ұлтшылдық арандатуларды айтпағанда, «фашистік ойындарға» жол бермеуге болар еді ғой дейді олар.
Біраздан бері бұл елде биліктегілердің түсініксіздеу ұлттық саясаты ұлтаралық, этносаралық қарым-қатынастарды ушықтырып отырғаны белгілі. Футбол фанаттарының арасындағы қақтығысқа да этностық сипат беру жастар арасында ұлтшылдық көңіл-күйді қоздырғаны болатын. Ел басшыларының ел халқын аймақтарға бөлгендей әңгімелері отқа май құйғандай болған. Әсіресе, әсіреұлтшылдардың кавказдықтарға, таяу шетелдерден келгендерге қыр көрсету әрекеттері жиілегені шындық. Осындайда ел басшылығы осынау жосықсыздыққа қарсы пәрменді шаралар қолдануға тиіс қой дейсің. Бірақ оның аңғарыла қоймайтыны өкіндіреді.
Жаман әдеттің жұққыш болатыны бар. Кешегі күні аға санаған ұлттың, халықтың, елдің басқа халықтарға қарсы жөнсіздеу әрекеттерін тәуелсіздік алған елдердегі белгілі бір топтардың да қайталағысы келетіні бар. Олар да «жетекші» ұлт болғысы келеді, біреулерді тұқыртып, олардан жоғары тұрғысы келеді. Тарих мұндай әрекеттердің болашағы жоқтығын талай дәлелдеген. Біреуді төмендету арқылы ешкім де биікке көтеріле алмайды.
НИКАРАГУА ТАҒЫ ДА ОРТЕГАНЫ ТАҢДАДЫ
Әрқашанда өздеріндегі тосын оқиғаларымен әлемдік саясатта көрініп қалатын Никарагуадағы президент сайлауында бүгінге дейін билікте болған Даниэль Ортега жеңіске жетті. Сайлаушылардың 60 пайыздан астамы оған дауыс берді.
Қай елде сайлау өтпей жатыр, онда кім президент болып сайланбай жатыр, бәрін айта беру міндет те емес. Бұл елдегі сайлауға тоқталуымыздың бірнеше себебі бар. Ең алдымен, жоғарыда айтқандай, елдің де өзгешелігі бар, ал оның президенті әлемдік саясатта көрініп жүрген адам. Біреуге жағады, біреуге жақпайды. Өзіне сөз де көп ереді. Соңғы кезде осы сайлауда жеңіледі деген сөз де біраз айтылған.
Жеңілген жоқ, айқын басымдылықпен жеңді. Оның негізгі қарсыласы, біраз адам жеңісінен үміт еткен «Тәуелсіз либералдық партия» одағының көсемі Фабио Гадеа 30 пайыздан сәл ғана асырып дауыс алды, үшінші үміткер либерал-конституциялық партияның кандидаты Арнальдо Алеман үлесіне тигені – алты-ақ пайыз.
Халыққа Ортега несімен жақты дегенде, ең алдымен, көпшілікке көп ұнаған оның солшыл-центристік экономикалық саясат жүргізгені. Ол халықтың ең әлсіз, кембағал тобына айтарлықтай материалдық көмек көрсетті. Сонымен бірге бизнестің еркін дамуына да жағдай жасады. Сөйтіп, ел экономикасы айтарлықтай биік деңгейге көтерілді, былтырғы жылы төрт пайыздық өсімге жетті.
Сөйтсе де, халық Ортеганы ел тәуелсіздігі жолында қажырлы күрес жүргізген, диктатураны жойып, демократиялық үрдістің қалыптасуына үлкен үлес қосқан қайраткер ретінде біледі. Ол негізін қалаған Сандинистік ұлттық-азаттық майданы көпшілік қолдауына ие болып отыр. Осы президенттік сайлаумен қоса өткізілген парламент сайлауында да сандинистер 61 пайыз дауыс жинап, жеңіске жетті.
Бүгінгі жеңіс – Ортеганың үшінші жеңісі. 1985-90 жылдарда да ел президенті болған. Алғашқы кезіндегі асығыстау қадамдарындағы шалыс басулары сынға да ұшырады. Соның салдарынан кезекті президент сайлауында жеңілген болатын. Сонда жеңілісті парасаттылықпен мойындап, өзінен кейін билікке келген оңшылдар мен центристерге оппозиция болып, саяси күрестің әдіс-айлаларын меңгерді. Сөйтіп, арада 16 жыл өткенде қайта билікке жетті. Енді тағы да жеңіске жетіп отыр.
Сол жеңістің тағы бір сыры – ол ел таныған тұлға. Кейде оның авторитарлық басқару стилі сынға ұшыраса да, бұқара халық оған кешіріммен қарайды. Оның Венесуэланың алыс-шалыс қадам жасайтын президенті Уго Чавеспен достығы да таңдандырады. Ресеймен де қарым-қатынасы жақсы. Абхазия мен Осетияны Ресейдің ең жақын елдері танымағанда, әлемдегі үш-төрт елдің бірі болып, Никарагуаның танығаны да тосын жай.
Сондай Даниэль Ортега жеңіске жетті. Бұрындары ұлы ойшылдар айтқандай, халық қашанда өзіне лайық басшыны таңдайды.
Мамадияр ЖАҚЫП.