Астана қаласында өткен Қазақстан Республикасы математика пәні мұғалімдерінің І съезінің шешімдерін жүзеге асыру бағытында атқарылған істердің бірі Оңтүстік Қазақстан облысы математика пәні мұғалімдері мен оқытушылары қауымдастығының құрылуы болды. М.Әуезов атындағы Оңтүстік Қазақстан мемлекеттік университетінің ұйытқысымен құрылған бұл қауымдастық өзінің алғашқы жұмысын «12 жылдық білім беру жүйесіне көшу жағдайында мектеп пен жоғары оқу орындарындағы математикалық білім беру сапасын жетілдіру мәселелері» деген тақырыпта дөңгелек үстелден бастады.
Дөңгелек үстелдің мақсаты – мектеп пен жоо-дағы математикалық білім беруді жетілдіру мәселелерін талқылау, 12 жылдық білім беру жүйесіне көшу жағдайында мектеп пен жоо-дағы математикалық білім беру мазмұнының сабақтастығын арттыру негізінде оларды шешу жолдарын анықтау. Оған Оңтүстік Қазақстан облыстық білім басқармасы, педагог кадрлардың біліктілігін арттыру және қайта даярлау институтының өкілдері мен мектеп директорлары, аудандық (қалалық) білім бөлімдерінің математика пәні әдіскерлері, магистранттар және PhD докторанттар қатысты.
Басқосуда математикалық білім берудің өзекті мәселелері көтерілді.
Олардың бірі еліміздің мектептерінің 12 жылдық білім жүйесіне көшу жағдайындағы математика пәнінен таңдау курстарын жасау мәселесі болды. 12 жылдық білім беру жүйесінде бейіндік немесе математиканы тереңдетіп оқытуға байланысты таңдау курстары мен оларды оқытуға қажетті әдістемелік материалдар, есептер мен тапсырмалар жинақтарының сапалылығы мен маңыздылығы айтылды. Қатысушылар «Ресейде 2004 жылдан бастап бейіндік және бейіналды дайындыққа арналып көптеген оқу материалдары жарық көрді. Бізде ол жоқ. Мұғалімнің өзі бейіндік курстарды жасауы үшін оған пайдаланатын казақ тілінде математикалық әдебиеттер болуы керек, ал ондай әдебиеттер жоқ десе де болады. Кейбір мектептерде элективтік курстар үшін «Анықтауыштар және матрица», «Аналитикалық геометрия» сияқты тақырыптарды таңдаған, оның мазмұны жоғары оқу орындарында оқылатын мазмұнмен бірдей. Бейіндік оқытудың мақсаты жоо материалдарын мектепте оқытып қою емес, жоо бағдарламасын еркін меңгере алатындай етіп дайындау екенін біз естен шығармауымыз керек» – десті.
М.Әуезов атындағы ОҚМУ-дың математигі, қауымдастықтың төрағасы Д. Рахымбек «біздің облыс сияқты халық саны көп облысқа оқулықтар мен оқу құралдарын шығаратын баспагерлік қызметі керек, жоо-ға арналған жоғары математика курсынан бірнеше оқу құралдары жарық көргенімен, математика мұғалімдерін дайындауға қажетті математикалық талдау, алгебра, геометрия сияқты іргелі пәндерден қазақ тіліндегі оқулықтар мен есептер жинағы осы күнге дейін жоқ, осы пәндердің оқулықтарын жазуға арнайы конкурс жарияланып, жазылса дұрыс болады» – деп өз ойын түйіндеді.
Келесі мәселе – физика-математика ғылымдарының докторы, профессор, ҚР халық ағарту ісінің озық қызметкері М. Әбенованың «Математика және өмір» атты баяндамасында сөз болды. Онда мектеп математика курсын оқытуды өмірмен байланыстыру керектігі айтылды. Ғалым ХХІ ғасырдың ұстаздарға қоятын талабы өте жоғары, себебі орта мектепте, жоо интерактивті тақтаны пайдалануда, өндірісте, ғылымда нанотехнология қолданылуда. Химия, биология, физика және компьютер бірлестігі негізінде нанотехнология жасалуда. Сол пәндердің бәрінде математика қолданылатындығын айта келіп, оның 3 құраушысына тоқталды: 1) пәні; 2) әдісі; 3) қолданылуы. Математиканың пәндері: арифметика (есеп), алгебра, геометрия, сол пәндерді оқушы жақсы игерсе, білімнің іргетасы құйылатынын ескертті. Педагогтардың айтуы бойынша «Оқушы құты емес, толтыру үшін құя беретін, оқушы жалын, жалынды тұтату керек». Ал тұтатушы – ұстаз. Ұстаз білікті болса әр тақырыпқа өз тәсілін қолданып, оқушыға түсінікті етіп санасына жеткізсе, ол сабақ түсінікті болады, оқушының есінде сақталады. Педагогикалық зерттеу бойынша естіген нәрсенің 30%-ы, көрген нәрсенің 70%-ы есте қалады, сақталады. Оқушы болса сабақта әрі естиді, әрі көреді (тақтадағы суреттер, формулалар, плакаттар, компьютердегі суреттер т.т.). Егер оқушы математиканы жақсы оқыса, ол басқа пәндерді де жақсы оқиды. Себебі, математика сабағы ойды ұшқырлайды, логиканы күшейтеді, сондықтан оқушы ойын (сөйлемді) жүйелі, ықшамды түрде жеткізе алады» деп өз ойын қорытындылады.
Дөңгелек үстелде геометрияны орта мектеп пен жоғары оқу орындарында оқытудағы сабақтастықты жүзеге асыру мәселесі де назардан тыс қалмады. Өйткені, барлық математикалық пәндердің ішінде, геометрия, сезу мен кеңістіктікті елестетуді және түсінікті дамытуға, ал оның негізінде жеке тұлғаның шығармашылық дамуына көбірек ықпал етеді деп толық сеніммен айтуға болады. Сезу мен елестету кез келген шығармашылықтың негізі болып табылады.
Мектеп геометрия курсындағы оқушылардың кеңістіктік түсініктерін қалыптастырудың қажетті құралдарының бірі сызбалар, яғни есепте қарастырылып жатқан кеңістік фигураларының параллель проекциядағы кескінін салу болып табылады. Зерттеушілердің пікірінше, сызба «модельдер мен абстрактты кеңістік объектілерінің арасын байланыстырады». Ол үшін планиметрияның салу есептері керек. Сондай-ақ, геометрия курсын оқытудағы проекциялық сызбаларды пайдаланудың әдістемелік қырына келер болсақ, олар оқушылардың оқу материалын қабылдауын жеңілдетеді. Нақтырақ айтқанда, стереометрияның алғашқы сабақтарынан бастап кездесетін қиындықтар жоғары сыныптарда сабақ беретін әрбір математика мұғаліміне таныс. Стереометрия аксиомаларымен таныстыру кезінде оқушылардың кеңістіктік түсініктерінің әлі де нашар дамыған болуына байланысты, стереометрияның алғашқы ұғымдары туралы мәліметтер абстрактілі сипатқа ие болып, жаттанды білімдер қалыптасады. Сондықтан да, оқушылардың көпшілігі стереометрия курсын мектеп пәндерінің ішіндегі күрделі пәндердің бірі ретінде қабылдап, оған деген қызығушылықтары жойылады.
Дөңгелек үстелге жиналғандар бұлардан басқа да көптеген мәселелерге тоқталды. Мысалы, мектеп математика пәнінің бағдарламалары мен оқулықтарына талдау жасалды және ұсыныстар берілді. Ө.Жолдасбеков атындағы №9 лицейдің математика пәнінің мұғалімі Г.Нұржігітова 5-6 сынып математикасын оқытудағы қолданыстағы технологияларға тоқталса, Қазығұрт ауданы, Қ.Сәтбаев атындағы мектеп-лицейден Р. Қарақбаева математиканы оқытудың сапасын арттыру бойынша ұсыныстар айтты. Дөңгелек үстелге қатысушылар назарынан бастауыш сынып математикасын оқыту, математикадан тестік жүйенің ерекшеліктері, кемшіліктері мен оны жою жолдары да тыс қалмады. Математиканың жоғары санатты мұғалімі А.Нысанов осы мәселелер төңірегіне тоқталып, ҰБТ-да кездесетін есептердің 60-70%-ын талдау арқылы-ақ шешуге болатынын дәлелдеді. Ұсыныс ретінде тестті екі бағытта, яғни гуманитарлық және жаратылыстану бағытында құрып, олардың мазмұнын жылда 70%-ға дейін өзгерту керектігін айтты.
Жиын соңында талқыланған мәселелер бойынша математиктер ұсыныстар қабылдады.
Осылайша қызу тартыс түрінде өткен дөңгелек үстел бүгінгі таңдағы облысымызда математикалық білім берудің өзекті мәселелерін талқылап, оның кемшіліктерін жою бағытындағы жұмыстарды айқындады, математиканы оқытудың мектеп пен жоо арасындағы сабақтастықты жақсарту керектігіне тоқталды. Дөңгелек үстелге қатысушылар қауымдастықтың веб порталы – www.asm ukgu.kz ашылғандығының куәсі болды.
Нұрлыбай МАДИЯРОВ, М.Әуезов атындағы Оңтүстік Қазақстан мемлекеттік университетінің доценті, педагогика ғылымдарының кандидаты.
Шымкент.