Ертең Астанадағы «Қазақстан» орталық концерт залында Қазақстан Республикасы Тәуелсіздігінің 20 жылдығына арналып, еліміздің агроөнеркәсіп кешені қызметкерлерінің республикалық форумы өткізілмек. Бұл форумның жұмысына Мемлекет басшысы Нұрсұлтан Назарбаев қатысады деп күтілуде.
Еліміздің ауыл шаруашылығы саласы ел Тәуелсіздігінің 20 жылдығына толымды табыстармен келіп отырғандығы белгілі. Биылғы жылы бұрын-соңды болмаған рекордтық көлемдегі астық алынып отырса, ақ мақтадан түскен өнім де соңғы 5 жылдың биік белесі болып табылады. Осының барлығы диқандардың маңдай терімен және мемлекеттің агроөнеркәсіп кешеніне көрсетіп келе жатқан қолдау шараларының нәтижесінде мүмкін болып отыр.
Соңғы жылдары еліміздің аграрлық саласында оны заман талабына сай алға жылжытатындай серпінді жобалар жүзеге асырыла бастады. Осындай ауқымды жобаларды жүзеге асыру үстіндегі «ҚазАгро» холдингінің құрылғанына да 5 жыл толып отыр. Төменде аталған мәселелерге орайластырып арнайы дайындалған экономика ғылымдарының докторы Мырзагелді Кемелдің мақаласын назарға ұсынамыз.
Елбасы Нұрсұлтан Назарбаев әр жылғы жолдауларында еліміздің аграрлық саласының даму бағыттарын айқындай отырып, оны әртараптандыру, саланың бәсекелестік қабілетін арттыру, азық-түлік қауіпсіздігін қамтамасыз ету мәселелеріне қатысты нақты тапсырмалар беріп келеді.
Ауыл шаруашылығы – Қазақстан экономикасындағы ең ірі сала. Ауылда халқымыздың жартысына жуығы тұрады. Еліміздегі еңбек рыногына қатысушы 7,5 миллион адамның 2,5 миллионға жуығы – ауыл шаруашылығы саласының еңбеккерлері. Өзін-өзі қамтамасыз етуші халықтың да басым бөлігі – ауыл адамдары.
Ауыл шаруашылығы саласын біз тек қана мал мен егін деп түсінсек, қателесеміз. Ол – күрделі әлеуметтік-экономикалық жүйе. Тамақ өнімдерін өндіру, ауыл шаруашылығы шикізаттарын беру арқылы халықтың өмір сүруін қамтамасыз етіп қана қоймай, сонымен бірге ауылдық жерде тұрушы халықтың тұрмыс-тіршілігін, олардың өмір сүру жағдайы мен сапасын реттейді.
Ауылды көтерудің нақты жолы ретінде Ауыл шаруашылығы министрлігіне бағынышты мекемелердің мемлекеттік активтерін корпоративті басқару сапасын арттыру үшін 2006 жылы 11 желтоқсанда Президент Жарлығымен 100 пайыз мемлекет иелігімен «ҚазАгро» ұлттық басқарушы холдингі құрылды. Оған «Аграрлық несие корпорациясы», «ҚазАгроҚаржы», «Ауыл шаруашылығын қаржылай қолдау қоры», «Азық-түлік келісім-шарт корпорациясы», «Мал өнімдері корпорациясы», «Астық кепілдіктері бойынша міндеттемелерді орындауды сақтандыру қоры» (ҚазАгроГарант) «Қазагромаркетинг» секілді жеті акционерлік қоғам бірікті.
Бүгінде осы ірі холдингтің құрылғанына бес жыл толды. Осы жылдар ішінде қоғамда ауыл шаруашылығындағы даму институттарының қажетті-қажетсіздігі туралы екіұдай пікір тайталасып келеді. Бір топ саясаткерлер мен ғалымдар «бұл бүйен секілді керексіз элемент, олардың істерін министрлік те атқарып жатқан еді» десе, екінші топ бұл институттарды қажет санайды.
Тәуелсіздіктің жиырма жылы ішінде ауыл шаруашылығын дамытудың қандай жолдары болғанына назар тастар болсақ, нарық қатынастарына көшудің бастапқы мерзімінде (1992-1997) «бір мезеттік», жүйесіз, секіртпелі шаралар жасалды. Одан кейінгі бес жылда (1997-2002) банктер шығындарының біразын өтеу, шаруаларға жеңілдетілген несиелер беру, лизинг арқылы техника беру, т.с.с. шаралар жергілікті мемлекеттік органдар арқылы жасалды. Бұл істерде жүйелілік болған жоқ, өңірдің экономикалық қуатына қарай әр жердегі жұмыс әрқалай өрбіді. Тек 2002 жылдан бастап қана ауыл шаруашылығының дамуы жаңа сатыға көтерілді. Жаңаша істің жүзеге асуына 2001 жылдың соңында құрылған ауыл шаруашылығын несиелендіруді жүйелі жолға көшіруге арналған акционерлік қоғам түрінде құрылған жаңа қаржы институттары міндетті болды, яғни аграрлық салаға берілетін мемлекеттік қаржы бағыттар бойынша бөлініп, бір орталықтан игерілетін болды. Ауылды қолдаудың нақты көрінісі ретінде 2003-2005 жылдарға арналған мемлекеттік азық-түлік бағдарламасы қабылданып, жүзеге асырылуы да аграрлық саланың жүйелі түрде жетілуіне серпін берді. Кейінгі уақытта бұл құрылымдар бір холдинг аясына біріктірілді.
Холдинг құрылғаннан бері 5 жыл ішінде агроөнеркәсіптік кешеннің дамуына 790 миллиард теңге қаржы жұмсалды, оның 22,3 пайызы бюджеттік қаржы, басқасы – холдингтің өз қаржысы мен сырттан тартқан қаржылары. Осы қаржылардың есебінен бүгінгі күнде 33000 несие алушылар өз жұмыстарын игілікті ұйымдастырып отыр.
Холдинг құрылғаннан бері оның құрамындағы компаниялар тобының активі 2,3 есе (189,5 миллиард теңгеден 438,3 миллиард теңгеге) өсті, холдингтің өз капиталы 2,5 есеге, табыстары 3 есеге ұлғайды.
Соның ішінде «Аграрлық несие корпорациясы» АҚ-тың соңғы он жыл ішіндегі атқарған негізгі жұмысы ретінде елімізде 161 кредиттік серіктестіктердің ашылып, шаруаларды несиелеу ісімен айналысып жатқанын айтуға болады. Бұл бағыт бойынша несиелеу 7 жыл мерзімге 4 пайыздық сыйақымен беріледі.
Бүгінде бұл кредиттік серіктестіктердің жарғылық капиталы 6,2 миллиард теңгеге жетті, оның 0,3 пайызы ғана корпорацияның үлесінде. Осы серіктестіктерге барлығы 80 миллиард теңгеден астам қаржы несие ретінде берілді. Кредиттік серіктестіктердің құрамында 6616 ауылшаруашылық құрылымдары бар, оларда 175636 адам еңбек етеді. Бұларға бекітілген жер көлемі 7,5 миллион гектар, оның 4 миллион гектары, яғни еліміздегі барлық егістіктің бестен біріне жуығы кредиттік серіктестіктердің қаржысымен күнелтуде. Қазір корпорация кредиттік серіктестіктердің қатысушыларының санын көбейту жолында пәрменді істер атқару үстінде.
Корпорация несиелеріне осы жылдары 363 мың ірі қара, 77 мың жылқы, 4,4 мың түйе, 17 мың бас шошқа, түрлі техникалар мен құрылғылар сатып алынды.
Ауыл шаруашылығындағы құрылымдарды кооперациялау ісі қолға алынған соңғы 5 жыл ішінде өнімді өндіру, дайындау, қайта өңдеу, сақтау мен сату істеріне корпорация тарапынан 5-7 жыл мерзімге 5 пайыздық өсіммен қаржы берілуде. Мұндай несие алушы бірлестіктердің саны қазір 139-ға жетті, оларға бүгінге дейін 4 миллиард теңгеге жуық қаржы берілді. Бұл бірлестіктерге 1600 кәсіпорын мен 3,5 мың жеке қосалқы шаруашылық иелері біріктірілген. Атқаратын қызметтерінің бағыттары бойынша мұнда 34 жоба сүт өндіру мен олардан дайын өнімдер шығаруға, 34 жоба ет өндірісіне, 29 жоба жеміс-көкөніс бағытына, басқалары май өндіру, мақта саласы, балық, жүн, т.с.с. бағыттарға бөлінеді. Бұл істер жергілікті басқару органдарымен бірлесіп ұйымдастырылуда.
Ал «Ауыл шаруашылығын қаржылай қолдау қоры» АҚ ұсақ шаруалар мен ауыл тұрғындарына микрокредиттер берумен айналысады. Осы жұмысты үйлестіру үшін еліміздің заңнамасына сәйкес 51 микрокредиттік ұйымдар ашылған, олар 94 аудан орталықтарында жұмыс істейді. Бес жыл ішінде микрокредиттік ұйымдарға қор 4,2 миллиард теңге қаржы берді, соның есебінен ауылда тұратын 12 мыңнан астам адам несие алды. Жалпы 2005 жылдан бері қор 14,1 миллиард теңгелік 61,6 мың микрокредиттер таратты. Ол 56 мыңдай отбасының ұсақ қажеттіліктерін шешуге жәрдем болды.
Соңғы жылдары қор «Егінжай» деп аталатын жаңа бағдарлама бойынша 500-600 гектар жері бар шаруаларға да несие беруді ұйымдастырды. Осы бағдарлама бойынша 2010 жылы 500 миллион теңге, 2011 жылы 700 миллион теңге қаржы 552 ауыл шаруашылығы тауар өндірушілеріне берілді.
Құрғақшылықтың нәтижесінде жем-шөп бағасының өсіп кетуіне байланысты қор «Мал азығы» деген бағдарлама бойынша 500 миллион теңгеге 793 несие берді.
Қор сондай-ақ, шағын жылыжайлар сатып алып орнатып пайдалану үшін 250 миллион теңгенің 124 жобасын қаржыландырды. Осы арқылы мектептердің, басқа да мемлекеттік мекемелердің аумағында бос жатқан 0,03-0,05 гектар жерге жылыжайлар орнатып, сол ұйымдарды қысы-жазы көкөніспен қамтамасыз етуге болады. Сондай-ақ қор мұндай жылыжайларды тұрғындарға лизинг жолымен беру ісін де ұйымдастыруда. Бүгінге дейін Жамбыл, Оңтүстік Қазақстан, Алматы облыстарында 3 жылыжайлық кешен, 254 шағын жылыжай лизингке берілді.
Осы жылдар ішінде «ҚазАгроӨнім» АҚ 11 128,4 тонна ет және ет өнімдерін, 65 993,8 тонн сүт пен сүт өнімдерін, 11 146,7 тонна жүн, 12 944,6 тонна мал терісін, 66 455 бас ірі және ұсақ мал дайындап, түрлі мал өнімдерін 11 387,7 млн. теңгеге сатты, оның ішінде шетелдерге 1 760,8 млн. теңгенің өнімдері сатылды.
«ҚазАгроГарант» астық және мақта кепілдіктерін орындау міндеттемелері жүйесін жетілдіру қызметтерімен нақты айналысуда. Осы кепілдіктерге арқа сүйеген екінші дәрежелі банктер ауылшаруашылық тауар өндірушілеріне несие беру үстінде. 2002 жылы банктер тарапынан ауылдағы тауар өндірушілерге бар болғаны 500 миллион теңге несие берілген болса, 2010 жылы 144,3 миллиард теңге несие берілді. Соның нәтижесінде шаруалар өздерінің өнімдерін лайықты бағаға сату мүмкіндігіне ие болып отыр.
Қазақстандық ауылшаруашылық өнімдерін экспортқа шығарумен холдингтің еншілес компаниясы «Азық-түлік келісім-шарт корпорациясы» АҚ айналысады. Астық сатуды жақсарту мақсатында бұл компанияның қаржысына 2007 жылы Әзербайжанда қуаты 350 мың тонналық астық терминалы салынып, іске қосылды. 2010 жылы Иранның Әмірабад портында жылына 700 мың тоннаға дейін астық экспорттауға мүмкіндік беретін астық терминалы салынды. Бүгінде астықты ұн етіп сату мақсатында Маңғыстау облысының Бейнеу қаласында 6,9 миллиард теңгеге қуаты 100 мың тонналық астық қоймасы мен диірмен қоса салынып, бірінші кезегі пайдалануға берілді. Онда тәулігіне 400 тонна ұн, 100 тонна құрамажем шығаруға болады. Бұл жоба Каспий маңы аумағында 1,5 миллион тонна астық сатуға мүмкіндік береді.
Холдингке қарасты «ҚазАгроҚаржы» АҚ құрылғалы бергі он жыл ішінде агроөнеркәсіп кешеніне 221 миллиард теңге қаржы салды, сол арқылы 3800 шаруашылық құрылымдарына қаржылық қолдау жасады. Қоғам арқылы 149 миллиард теңгеге 17 мың дана ауыл шаруашылығына қажетті түрлі техникалар, егіс кешендері, комбайндар, тракторлар, ауыл шаруашылығы өнімдерін өңдейтін құрылымдар сатып алынды. Бұдан басқа «ҚазАгроҚаржы» арқылы тамшылатып суару, «No-Till» топырақты жаңаша өңдейтін ресурссақтаушы технологиялары тауар өндірушілерге лизингке сатып әперілді. Тамшылатып суару әдісін енгізу бүгінде өз нәтижесін бере бастады, бұл технология пайдаланылған жерлерде өнімділік ашық жер қыртысымен салыстырғанда 50-70 пайызға артты. Соңғы бес жыл ішінде 125 «No-Till» егіс кешені сатып алынды, ол 340 мың гектар жерді қопсытуға жарайды.
Мал шаруашылығын өркендету, 2016 жылға қарай жылына 60 мың тонна етті экспортқа шығарып, табыс алуды астық өндірісімен теңестіру жайындағы Елбасы тапсырмасына сәйкес «ҚазАгро» кешенді шараларды қолға алды. Соның нәтижесінде елімізде мал бордақылау алаңдары, асыл тұқымды мал өсіру, фермерлік шаруашылықтарды нығайту, мал сою пункттерін жасау мен ет өңдеуші кәсіпорындарды құру секілді жұмыстар жүзеге асуда. Жоба бойынша алдағы бес жылда бір мезгілде 150 мың бас малды бордақылауға болатын алаңдар кешенін салу жүзеге асырылуда. Етті малды көбейту мақсатында сырттан асыл тұқымды ірі қара мал сатып алынуда, қазірге дейін бір мың бас асыл тұқымды ірі қара әкелінді, оның саны сегіз мыңға жеткізілмек.
«ҚазАгро» ұлттық холдингінің ұйымдастыруымен еншілес компаниялар көктемгі егіс және егін жинау науқандарындағы агротехникалық шараларды дер кезінде жүргізуге қажетті қаржы таратылып жатыр. Тек қана астық өндіруге үстіміздегі жылы 78 миллиард теңге қаржы қарастырылып, дер кезінде диқандарға жеткізілді. Қазіргі астықтың мол өнімділігінде холдинг ұйымдастырған істердің үлесі едәуір.
Үстіміздегі жылы қаржылық қиындықтарға қарамастан холдинг несиелерге қойылатын жылдық ставканы 4 пайызға азайтып отыр. Бұл әлемдегі қаржы дағдарысы мен қаржы тұрақсыздығының жағдайында жасалып жатқан ең батыл шара және несиеге мұқтаж шаруалар үшін таптырмас көмек.
Елімізде азық-түлік қауіпсіздігін қамтамасыз ету үшін ірі қалалар төңірегінде азық-түлік белдеуін жасау бағдарламалары бар. Ол бағдарламалар қалалардың төңірегіне түрлі қоймалар мен өңдеу цехтарын ашумен шектелмей, аймақтармен мықты логистикалық байланыс орнату мәселесін жолға қоймақ. Қай өнімді қай жақтан жеткізіп тұру тиімді әрі қолайлы екені зерттеліп, әрбір өңір сол өнімдерге мамандандырылуы, сөйтіп бір орталықтан басқарылып отырылуы керек. Мысалы, көкөніс – оңтүстікте, күріш – Қызылордада, қарақұмық – Талдықорғанда, балық – теңіздер мен көлдерде мол болса, соны жеткізіп тұруды ойластыру керек. Жылдың үш мезгілінде от жағуға тура келетін орталық және солтүстік өңірлерге жылыжайлар орнату қажетсіз. Өйткені бір кило қызанақты өндіруді жылыту үшін кететін шығын ол өңірлерде суық болғандықтан 40 теңгеге түссе, ал оны оңтүстіктен тасымалдауға бар болғаны 8-12 теңге ғана кетеді екен. Бұл іс жүйелі түрде ұйымдастырылған жағдайда өзіндік құн мен жол шығынын бұдан да төмендетудің жолдары жоқ емес.
Еліміз тәуелсіздігінің жиырма жылдық мерейтойы күндері құрылғанына 5 жыл толып отырған, шаруаларға ашық әрі жұмысты екі жақты тиімділік деңгейінде атқаруға әзір болуымен қатар өз жұмысын да жаңаша ұйымдастырып келе жатқан «ҚазАгро» холдингі алдағы кезде ауыл шаруашылығын мемлекеттік қолдауға бөлініп жатқан орасан зор көлемдегі қаржыларды ауылшаруашылық тауар өндірушілеріне жеткізуді жауапкершілікпен, ұқыптылықпен, жобалардың тиімділігі мен қайтарымдылығына баса көңіл бөліп жүргізе беретіндігіне сенім зор.
Мырзагелді КЕМЕЛ, экономика ғылымдарының докторы, профессор.