Қос кітаптың тұсауы кесілді

Тәуелсіздіктің жиырма жылдығы қарсаңында Жазушылар одағында да көптеген игілікті іс-шаралар атқарылуда. Соның бірі «Тәуелсіздік сабақтары» атты тақырып аясында мемлекет және қоғам қайраткері, жазушы-журналист Балғабек Қыдыр­бек­ұлының «Алатау» романы мен халықаралық «Алаш» сы­й­лы­ғының иегері, белгілі ақын Несіпбек Айтовтың «Ша­пы­рашты Наурызбай» дастанының таныстырылымы өтті. – Елдің, ұлттың өміріндегі елеулі кезеңдерінде, – деді жи­ынды ашқан Жазушылар одағы­ның төрағасы, ақын Нұрлан Ора­­­залин, – сөздің тарихы мен сөздің тағдыры қалай байланды дейтін бүгінгі әңгімемізге арқау болып отырған дүние – қазақ­тың көрнекті қаламгері Балға­бек ағамыздың кешегі Кеңес ода­ғы тұсында «Алатау» рома­ны «қайшыға» түсіп, толық жа­рияланбаған еді. Бүгін сол үлкен еңбектің толық нұсқасы қолы­мызға тиіп отыр. Екінші кітап қазақтың баһа­дүр батырларының бірегейі Ша­пырашты Наурызбай жөніндегі поэма. Халықаралық «Алаш» сый­лығының лауреаты, арқалы ақын Несіпбек Айтовтың бұл поэмасының толық нұсқасы кезінде «Егемен Қазақстанда» жа­рияланған-ды. Автор ғасырлар қойнауына кететін тарихы­мыз­ды өлеңнің өрнегімен, өлеңнің тілімен жырлап, соңғы кездері ұмытылып бара жатқан дастан, поэма жанрына қайта қанат бітіріп отыр дей келіп, демеушілік жасаған, өнердің, әдебиеттің жа­нашыры Серікбай Нұр­ғи­са­ев­қа ол жұртшылық атынан риза­шылық білдірді. Алғаш сөз кезегін алған белгілі сыншы, әдебиеттанушы, фи­лология ғылымдарының док­торы, профессор Тұрсынбек Кә­кішев Б.Қыдырбекұлының шы­ғар­машылығы, романның қазақ әдебиетіндегі орны туралы сөз етсе, Алматы облысы мәсли­ха­тының хатшысы Ардақ Садықов Б.Қыдырбекұлының бұл туын­дысы ХХ ғасырдың басынан елуінші жылға дейінгі елімізде болған саяси-әлеуметтік ахуал­ды жан-жақты баяндайтын эн­цикло­педиялық еңбек екенін атап өтті. Сондай-ақ ақын-жазушылар Сәкен Иманасов, Смағұл Елубай, Қуанышбай Құр­манғалиев, Нұрдәулет Ақы­шев, Жұмабай Шаштайұлы, ком­­позитор Балнұр Қыдырбек және т.б. қос еңбек ту­ралы өз ойла­рын ортаға салды. Гүлзейнеп СӘДІРҚЫЗЫ. –––––––––––––––– Суреттерді түсірген  Берсінбек СӘРСЕНОВ.