Бүгінгі таңда Қазақстанның жоғары оқу орындарына үлкен стратегиялық міндеттер жүктелген. Дәлірек айтар болсақ, білім мен білім беретін бағдарламалар деңгейін халықаралық аккредиттеу дәрежесіне дейін көтеру,әлемдік стандарттарға сай жұмыс жүргізу сынды жауапты тапсырмалар берілген. Аталған бағыттар бойынша республикамызда бірқатар қадамдар жасалынғаны да жасырын емес. Бұл бірегей тәжірибені еліміздің жоғары оқу орындарында жүйелендіру мен тарату – уақыт талабы. Сондықтан да 14-15 қарашада М.Әуезов атындағы Оңтүстік Қазақстан мемлекеттік университетінде өткізілген «Қазақстандық білім беру жүйесі білім бағдарламаларын аккредиттеу арқылы Еуропалық сапа стандарттары жолында» атты халықаралық ғылыми-тәжірибелік семинар аса маңызды болып табылады.
«Қазақстандық жоғары оқу орындарының сапасы үздік еуропалық стандарттарға сай болуы керек» тақырыбы семинардың негізгі өзегі болды.
Семинар қатысушылары Қазақстанның білім жүйесі тәуелсіздігін алған 20 жыл ішінде жоғары ұлттық және әлемдік экономикадағы ықпалдастық үдерістерiн есепке алу арқылы қайта жаңғырды деген пікірлерін білдірді. Осы жылдар аралығында қазақстандық білімді бүкіл әлем мойындай бастады. 2010 жылы Болон декларациясына қол қою арқылы Қазақстан Еуропаның жоғары білім аймағында тең құқылы мүше болып танылып, Еуропалық білім стандартына жақындай түскендігін дәлелдеді
Білім сапасы мен адамгершілік әлеуетті дамыту еліміздің Президенті бекіткен Қазақстан Республикасының 2011-2020 жылдарға арналған білім беруді дамытудың Мемлекеттік бағдарламасына негізделген. Сондай-ақ қазақстандық жоғары оқу орындарының шетелдік аккредиттеу генттіктерінде білім беру бағдарламалары бойынша халықаралық аккредиттеуден сәтті өтуіне мүмкіндік жасайтын білім сапасын бағалаудың ұлттық желісін құруға басым көңіл аударылған.
ОҚМУ-да өткен семинар еліміздің жоғары білімінің барлық саласын қамтыған ерекше оқиға болды. Себебі, Еуропа бойынша сапамен қамтамасыз ету желілерінің жетекшілері, Еуропаның, Ресей мен Қазақстанның аккредиттеу агенттіктерінің жетекшілері, жоғары оқу орындарының ректорлары тұңғыш рет Қазақстанның университетінде бас қосып отыр.
Ерекше айта кету керек, семинарға қатысушы қонақтар арасында Инженерлік білім беру сапасын қамтамасыз етудің Еуропалық желісінің (ENAEE) вице-президенті, германиялық ASIIN аккредиттеу агенттігінің бас директоры Иринг Вассер, Венгрия аккредиттеу комитетінің бас хатшысы, Сапаны қамтамасыз етудің Еуропалық желісінің басқарма мүшесі, экс вице-президенті (ENQA) Тибор Cанто, Информатика бойынша білім беру сапасын қамтамасыз етудің Еуропалық желісінің (EQANIE) президенті, Берлин техникалық университетінің профессоры Георг Ганс-Ульрих Хайс, Еуропалық химиялық тақырыптық желісі белгілерін беру жөніндегі комитет (ECTNA) төрағасы, Химиктердің Еуропалық тіркеу кеңесінің (EuCheMS) төрағасы, Прага химиялық технология институтының профессоры Павел Драшар; Информатика бойынша білім беру сапасын қамтамасыз етудің Еуропалық желісі Аккредиттеу комитетінің (EQANIE) мүшесі, Гринвич-Лондон университетінің деканы Элизабет Бэкон, Бизнесті басқару бойынша халықаралық бағдарламаларды аккредиттеу қорының (FIBAA) арнайы өкілі Хайнц-Ульрих Шмидт, германиялық ASIIN аккредиттеу агенттігінің менеджері Мелани Грунер, AQA «Австрия сапаны қамтамасыз ету агенттігі халықаралық аккредиттеу бөлімінің басшысы Дитллинда Кастелиц, Францияның педагогика саласындағы бағдарламаларды халықаралық бағалау орталығының үйлестірушісі Лиза Буданова, Латвияның Жоғары білім беру сапасын бағалау орталығының директоры Юрис Дзелме, «Ақпараттық-талдау орталығы» АҚ президенті (Қазақстан) Ш.Қаланова, ҚР Білім және ғылым министрлігі Ұлттық аккредиттеу орталығының директоры Р.Сейдахметова, Сапаны қамтамасыз етудің Орталық Азиялық желісінің (CANQA) халықаралық ынтымақтастық жөніндегі үйлестірушісі Г.Дуйшебаева, Ресей инженерлік білім беру ассоциациясы аккредиттеу орталығының (АИОР) директоры С.Герасимов, Білім сапасын қоғамдық бақылау және карьераны дамыту агенттігінің (АККОРК, Ресей) бас директоры А.Белокопытов, Қырғыз Республикасы лицензиялау және аккредиттеу жөніндегі мемлекеттік инспекцияның бастығы Б.Исмаилов, Қазақстандағы Темпус ұлттық ресми кеңсесі мен Британ кеңесінің өкілдері, ҚР жоғары оқу орындарының басшылары бар.
Баршамызға белгілі, Тәуелсіздіктің алғашқы күндерінен-ақ мемлекетіміз білімді дамытуға басты назар аударып, мемлекет саясатының басымдылықтарының бірі ретінде қарады. Жаңадан құрылған мемлекетіміз білім саласына түбегейлі жаңартулар енгізді, осылайша бiздiң еліміз бiлiм төңiрегiндегi реформаларының қарқынды дамуының арқасында дүниежүзілiк көшбасшылар қатарынан көріну мүмкіндігіне ие болды.
Семинар аясында «Қазақстан Республикасы жоғары білім берудегі сапаны қамтамасыз етудің ұлттық жүйесі және сапаны қамтамасыз етудің Еуропалық стандарттары мен басшылықтары», «Қазақстан Республикасы жоғары оқу орындарында сапаны қамтамасыз етудің ішкі жүйесін құру», «Білім бағдарламаларын аккредиттеу: талаптар, критерийлер мен процедуралар» тақырыбында бас қосулар өткізді.
Семинар жұмысының қорытындысы бойынша тарихи маңызы бар «Қазақстандағы жоғары білім мен жоғары оқу орнынан кейінгі білімнің сапасын қамтамасыз ету» атты Шымкенттік декларацияға және Сапаны қамтамасыз етудің Еуропалық желісі мен Сапаны қамтамасыз етудің Ортаазиялық желісі арасындағы өзара түсіністік пен ынтымақтастық туралы меморандумға қол қою рәсімдері жүзеге асырылды.
Ал меморандум – білім сапасын арттыру және күшейте түсу, сондай-ақ Еуропалық кеңістіктегі жоғары білім беру сапасын кепілдендіру бойынша стандарттар мен ұсыныстарды Орталық Азияда таратуға кеңінен жол ашады.
Аталған меморандумға қол қою арқылы Еуропа мен Орта Азия елдерінің өзара түсіністігі мен ынтымақтастығы арта түсіп, жоғары білім сапасын бағалаудың бірыңғай өлшемін жасауға мүмкіндік туындайды.
М.Әуезов атындағы ОҚМУ баспасөз қызметі.
Шымкент.