Еліміздегі әлеуметтік-саяси, мәдени-рухани және спорт салаларына сарапшылар талдауы
Жеті жетістік Қоғамдық пікір мемлекет пен жеке адамның, жалпы алғанда, қоғамның маңызды сәттеріне баға беретін құрал іспетті. Ол әрбіріміз мән бере бермейтін кей оқиғалар мен құбылыстардың айнасы да. Алайда, уақыт өте келе қоғамдық пікір әлеуметтің жадында өмірдің бұлжымас естелігі секілді ұзақ уақыт сақталып қалатынын да ұмытпау керек. Біз көптеген сарапшылар (қоғамдық тұлғалар арасында, мемлекеттік қызметкерлер мен саясаткерлер арасында) Тәуелсіз Қазақстанның 20 жылдық қалыптасу кезеңінде мейлінше маңызды жетістіктерін анықтауға тырыстық. Әлеуметтік сауалдама жүзінде байқағанымыздай, егемен елдің қалыптасу және қайталанбас құндылықтарға қол жеткізу жолында мемлекеттің даму белесі көпшілік санасында жағымды әсермен сақталғанын айта кету керек. Сонымен, тәуелсіздік алғаннан бергі уақыт ішінде Қазақстанның қол жеткізген маңызды жетістіктері мен құндылықтары қатарына азаматтық ортаның жақсы сақталуы, дінаралық және ұлтаралық түсіністік, мемлекеттің жаңа орталығы Астана қаласының бой көтеруі мен Семей ядролық полигонының жабылуы сияқты бірқатар оқиғаларды жатқызуға болатындығы анықталды. Мемлекет ретінде қол жеткізген ең маңызды жетістіктердің басында азаматтық қоғамның жақсы сақталуы мен дінаралық және ұлтаралық келісім тұр. Қоғамның бастан өткерген әлеуметтік-экономикалық күрделі кезеңінде қазақстандықтардың – бейбітшілік, келісім және бірлік аясында өмір сүруі басты құндылық болып отыр. Тоқсаныншы жылдардың басында көптеген ұлт өкілдері үшін Қазақстан ұлтаралық қақтығыстардан пана боларлық жайлы орта және ортақ үй бола білді. Этностық шығу тегіне қарамастан, Қазақстанның әр азаматы барлық елдердің басынан өткен ұлтаралық қақтығыс пен іріткі түсу қаупінен алыс бола біліп, әркім өз отбасында тыныштық пен туыстары, жақын-жуықтары арасындағы татулықты сақтай білді. Тұрақтылық пен келісімді сақтай білуі Қазақстанға аз уақыт аралығында экономикада, әлеуметтік қоғамда және халықаралық қатынас саласында ірі жетістіктерге ие болуға ықпал етті. Баспасөз беттеріндегі материалдар мен әлеуметтік сауалнама сарабына сүйенсек, әлеуметтік салада тұрақтылықты қамтамасыз ету, азаматтық қоғамды әлеуметтік жаңғырту, экономикалық, саяси және идеологиялық кеңістіктегі келісім қиындықтан өту кезеңі мен әр қазақстандықтың өміріне жақсы өзгеріс әкелді. Толеранттылық, өзара құрмет пен сенім Тәуелсіз Қазақстанда азаматтылықтың қалыптасуына негіз болды. Бұған мемлекеттік құрылымдағы кезек күттірмейтін мәселелерді жедел шешу ықпал етті. Солардың бірі, Қазақстан Республикасының мемлекеттік рәміздерін қабылдау екені анық. 1992 жылы Елбасы «Қазақстан Республикасының Мемлекеттік туы туралы», «Қазақстан Республикасының Мемлекеттік гербі», «Қазақстан Республикасының Мемлекеттік әнұранының музыкалық редакциясы туралы» заңдарға қол қойды. Кейінірек 2006 жылы «Қазақстан Республикасы Президентінің Конституциялық заң күші бар «Қазақстан Республикасының мемлекеттік рәміздері туралы» Жарлығына өзгертулер мен толықтырулар енгізу туралы» Қазақстан Республикасының Конституциялық заңына қол қойылды. Баршамызға белгілі «Менің Қазақстаным» әні мемлекеттің Әнұранына айналды. Дәл осы әнұранды қазақстандықтардың 80 пайызы біледі және айтып жүр (18 жастан жоғары 1500 респондентке сауалнама жүргізу барысында анықталған, 2011 ж.). Ұлтаралық келісімді нығайту жолында маңызды рөл атқарған шараның бірі 1995 жылы Қазақстан халқы Ассамблеясының құрылуы болды. Бүгінгі таңда осынау мемлекеттік-азаматтық институт конституциялық мәртебеге ие. Бұл ҚР Президентінің ұлтаралық мәселеге аса маңызбен қарайтындығын көрсетеді. 1996 жылдың 1 мамырында елімізде Қазақстан халқының бірлігі күні тұңғыш рет атап өтілді. Осы күндер жас мемлекет өміріндегі есте қалатын күндер қатарына енді. Жиырма жылдықтың тағы бір маңызды жетістігі Президент Н.Ә.Назарбаевтың бастамасымен жүргізілген жаңа астананың құрылысы екендігі белгілі. Астана қаласы жаңа мемлекеттің пайда болуы мен Тәуелсіз Қазақстанның бет-бейнесін анықтайды. Жаңа астана жаңа келешек пен жаңа кеңістікті, жаңа биіктерді айқындап берді. Әрбір екінші қазақстандық (18 жастан жоғары 1500 респондентке сауалнама жүргізу барысында анықталған, 2011 ж.) Астана қаласын мақтаныш пен Қазақстан тәуелсіздігінің символы деп біледі. Ол әлемге жас мемлекеттің келешекке деген ұмтылысы мен экономикалық, әлеуметтік және саяси біртұтастығын паш етті. Астана құрылысы – ерен еңбек пен өміршеңдікке бастайтын ұлттық рух болды. 6 шілде – Астана күні республиканың ұлттық мерекесіне айналды. Мемлекеттің азаматтары аса қуанышпен атап өтетін мейрамдардың бірі екені даусыз. 1991 жылдың 29 тамызында Президент Жарлығымен Семей полигоны жабылды. Бұл оқиға да мемлекеттің жиырма жылдығында қол жеткен маңызды жетістіктің бірі. Сауалнамаға қатысушылардың дені бұл шешімді әлемдік құндылықтың жоғарылауы мен адамзат өміріне аса мән берудің кепілі деп түсінеді. Полигонды жабу туралы Елбасының шешімі тәуелсіздіктің таңы атқан тұстағы сындарлы қадам және Қазақстанның адамзатқа қарсы қолданылатын қаруды болдырмаудағы ұсынысының басы боп есептеледі. 1993 жылдың тамызында Қазақстан Президенті Н.Назарбаев ядролық державалардың үкіметтеріне 2005 жылға дейін ядролық, химиялық, биологиялық және басқа да адамзатқа жат қаруды сынау мерзімін кешеуілдету мәселесінде ұсыныс жолдады. Ұлттық қауіпсіздікті қамтамасыз ету, егемендікті сақтау кепілі, территориялық біртұтастықтың және шекараның беріктігіне кепіл болған мемлекеттің маңызды жетістіктерінің бірі Мемлекеттік шекараны делимитациялау екенін айту керек. Өзімізге белгілі, біздің еліміздің жалпы аумағы (Каспий теңізіндегі шекаралық есепті айтпағанда) шамамен 13 200 шақырымды құрайды. Аталмыш шара туралы қызу келіссөздер 2006 жылы Қазақстан-Ресей мемлекеттік шекарасына байланысты екіжақты келісімге қол қойылғаннан кейін басталды. 1992-2006 жылдар аралығында Қытай, Өзбекстан, Қырғызстан, Түркіменстан, Ресей Федерациясын қамтитын аумақтың барлығында мемлекеттік шекара делимитацияланды. Келесі бір маңызды жетістік ретінде Мемлекеттік тіл мәртебесі айтылады. 1995 жылы 30 тамыздағы республикалық референдумда қабылданған Қазақстан Республикасы Конституциясының 7-бабында: «Қазақстан Республикасында мемлекеттік тіл қазақ тілі» деп көрсетілген. 1997 жылы «Қазақстан Республикасындағы тілдер туралы» Заң қабылданды. Қазақстандағы тіл саясаты бүгінде осы мемлекеттегі барша ұлттардың тілдерін сақтай білген жарқын көрсеткіш ретінде де үлгі. Президенттік «Болашақ» бағдарламасын жасау және жүзеге асыру біздің сарапшыларымыз анықтаған жетістіктердің бірі болып отыр. 1993 жылы экономикалық ауыр кезеңде Елбасы әлемнің алдыңғы қатарлы оқу орындарында жоғары санаттағы мамандар даярлау бағдарламасын жасауды тапсырған еді. «Болашақ» бағдарламасы Тәуелсіз Қазақстанға әлемдік дәрежедегі алғашқы буын мамандарын қалыптастыра білген инвестициялық тиімді жүйе болды. 2011 жылдың 1 қаңтарында жасалған есеп бойынша мемлекеттік бағдарлама бойынша қазақстандық 3338 жас шетелдерде білім алғандығы анықталып отыр. Бүгінде олардың көбісі мемлекеттік компанияларда, мемлекеттік және жекелеген бизнес құрылымдарда қызмет етуде. 2009 жылы қабылданған Ұлттық қор құру идеясы әлемдік экономикалық қаржы дағдарысы кезінде Қазақстанның мықты қорға ие болғандығын көрсетті. Ұлттық қор республиканың жетістігі болуымен қатар, сарапшылар жүргізген зерттеу нәтижесінде экономикалық саяси бағдардың дұрыс таңдалғанын дәлелдеп отыр. 2010 жылы ЕҚЫҰ-ға төрағалық ету және Астана қаласында ЕҚЫҰ Саммитінің өтуі ел Тәуелсіздігінің 20 жылдық тарихындағы ірі оқиға екенінде дау жоқ. Ол әлем жұртшылығы алдында Қазақстанды заманға сай демократиялық мемлекет ретінде мойындауға түрткі болды. Қазақстан Республикасының Президенті – Ұлт мақтанышы Н.Ә.Назарбаев әлемдік қауымдастықта ЕҚЫҰ-ны жаңа даму сатысына көтеруді қамтамасыз етті. Мыңжылдықтар тоғысындағы 20 жыл Қазақстан үшін жемісті кезең болды. Әр жыл оқиғаларға, фактілер мен тағдыршешті шешімдерге толы болды. Қазақстанның жүйелі де байыпты даму стратегиясы мемлекеттің негізгі мақсатын айқындап отыр. Экономикалық өсім, халықтың өмір сүру деңгейін көтеру, заңды қамтамасыз ете отырып демократиялық принциппен алға басу мүлдем соны экономикалық, әлеуметтік, саяси қадамдарға жетеледі. Экономикалық жаңа реформа іске қосылды. Елдің өмір сүру салты жаңа белеске көтеріліп, мемлекеттік орындарда жаңа өзгеше жұмыс істеу тетігі пайда болды. Елбасының қарапайым қазақстандықтардың талап-тілектеріне түсіністікпен қолдау көрсетуі нәтижесінде барлық реформалар мен бастамалардың жүзеге асуы жеделдеді. Сараптамалық зерттеу нәтижесі Тәуелсіз Қазақстанның Тұңғыш Президенті ұстанған сындарлы саясат пен көреген басшылықтың арқасында жетістіктерге қол жеткендігін көрсетті. Сонымен қатар, халқымыздың айрықша кеңдігі мен толерантты мінезі де өмірлік жарасымға жетелейтін сапа екендігін дәлелдеп отыр. Айгүл СӘДУАҚАСОВА, әлеуметтану ғылымдарының докторы, Әлеуметтік-саяси зерттеулер институтының директоры. Мәдени құндылықтар – қымбат қазынамыз Әр халықтың өз мәдениеті бар. Оны қалыптастыру, баға жетпес ұлттық қазынаға айналдыру, рухани кемелдендіру жолдары әрқилы. Осы тұрғыдан алғанда, ұлттық мәдениетіміз Тәуелсіздік жылдары жан-жақты дамып, қаржыландыру жағынан да үлкен демеу тапты. Сөзіміз дәйекті болу үшін нақты мысалдар келтіре кетейік. 2004-2006 жылдары 35 архитектуралық ескерткіштер жөнделіп, қалпына келтірілді. 30 археологиялық және 17 қолданбалы ғылыми-зерттеу жобалары жүзеге асырылды. Батыс Еуропа, АҚШ, Жапония, Түркия, Египет, Қытай, Ресей, Армения, тағы басқа елдердегі зерттеу жұмыстарының нәтижесінде Қазақстанға тікелей қатысты бес мыңнан астам құнды жәдігерлер табылды. Олардың көшірмелері елімізге әкелінді. Кеше Қазіргі жас өскін ұрпақ Тәуелсіздіктің елең-алаң шағындағы қиындықтар мен күрделі жағдайларды көзбен көрмегендіктен, үлкендердің әңгімелерінен, оқулықтардан білуі мүмкін. Ол кезең олардың санасында...олар үшін ертегідей сезілуі әбден кәдік. Мәңгі мызғымастай көрінген алып держава күйрегеннен кейін адамның еңсесін езіп, әрі-сәрі түңілткен күйге түсірген ауыртпалықтар бірде-бір саланы айналып өткен жоқ. Әсіресе, экономикадағы тоқырау ұлттық мәдениетімізді құлдырау шегіне жеткізді. Ауыл клубтары жеке меншік қарамағына беріліп, мәдени мекемелер жаппай жабылып жатты. Кинотеатрлар қаңырап бос қалды. Мұндай көріністер еліміздің барлық аймағына тән болатын. Тіпті Тәуелсіздіктің алғашқы жылдары мәдениет саласына қаражат «қалдық» принципімен бөлініп келді. 2000 жылы жүргізілген республикалық әлеуметтік сауалнама қорытындысында оған қатысушылардың 70 пайыздайы мәдениет мекемелерінің адам төзгісіз халін бюджеттік қаржының жетіспеушілігімен, 42,9 пайызы оңтайландыруға ұшырауымен, 12,5 пайызы ғимараттардың апаттық жағдайымен, 12,1 пайызы мамандардың тапшылығымен байланыстырды. Бұл деректер шындық ауылынан алыстай қоймайды. ХХІ ғасырдың басы ұлттық мәдениетіміздің дамуына баса назар аударылып, өсу, өркендеу кезеңімен сипатталады. Президент Нұрсұлтан Назарбаевтың арнайы Жарлығымен 2000 жыл мәдениет жылы болып жарияланып, бұл салада бетбұрысты қадамдар жасалды. Қордаланып қалған проблемалар мен шетін мәселелерді шешудің жолдары кешенді түрде қарастырылып, қаржылық қолдау айтарлықтай артты. Жұртшылық жаңа жыл келгендей самал лепті сезініп, пілтеленіп сөне бастаған үміт сәулесі қайта пайда болды. Елбасы мәдениет тақырыбына жиі оралып, халық үшін рухани зор қымбат қазына саналатын құндылықтарымызды өркендетуге үнемі қамқорлық көрсетіп отырды. Тарихи, экономикалық, саяси және салалық факторларды жан-жақты саралай келіп, Үкіметтің «Мәдени мұра» мемлекеттік бағдарламасын қабылдауы саланы өркендетуге ерекше екпін берді. Бағдарламаның 2004-2006 жылдарды қамтыған бірінші кезеңінде белгіленген іс-шараларды жүзеге асыру мақсатымен республикалық қазынадан 2,7 миллиард теңге қарастырылды. Екінші кезеңді қаржыландыруға 4 миллиард теңге бөлінді. 20 тарихи-мәдени ескерткіштер жаңартылды. Олардың ішінде «Абылайдың ақ үйі» ерекше кейіпке енді. 32 көне қалалар мен қорғандарға археологиялық зерттеу және қазба жұмыстары жүргізілді. Бүгін Елбасының тұрақты қолдауы арқасында Қазақстанның қазіргі мәдениеті мазмұн жағынан түрленіп, сапалық өзгерістермен ерекшеленді. Бүгінде жұртшылықтың ұлттық мәдениетке деген көзқарасы өзгеріп, қызығушылығы әлдеқайда артқаны байқалады. Бұл салада атқарылып жатқан шешімдер мен іс-шараларды қуаттап отырғаны сондықтан. Әсіресе, «Мәдени мұраға» деген ел ынтасы ерекше. Сауалнамаға жауап берушілердің 85,1 пайызы бағдарлама шеңберінде тындырылған істерді белсенді түрде қолдаған. Рухани және білім беру салаларының ғылыми, әлеуметтік-экономикалық және ұйымдық-әдістемелік базаларын одан әрі нығайту, тарихи-мәдени мұраларды тиімді пайдалану мақсатымен Үкімет 2009-2011 жылдарға арналған «Мәдени мұра» ұлттық тұжырымдамасын қабылдады. 2009 жылдың соңына таман 39 республикалық, 6 мыңға жуық облыстық мәдениет ұйымдары, тарқатып айтар болсақ, 164 мұражай, 3763 кітапхана, 2320 клуб, 50 театр, 58 кинотеатр мен телетеатр, 458 киноқондырғы, 4 зоопарк, 2 цирк, 28 демалыс саябағы жұмыс істеді. 2007-2010 жылдар аралығында мәдени мекемелер саны 203-ке көбейді. Айшықты жылдар бедерінде 10 драмалық, сазды-драмалық, қуыршақ театрлары, Астана, Шымкент қалаларында опера және балет театрлары ашылды. Елімізде жыл өткен сайын мәдениет мекемелері көбейіп, оған келушілер қатарының арта түскені қуантады. Мәселен, 2006 жылы елордадағы мұражайларды 260,5 мың адам тамашаласа, былтыр олардың саны 380,4 мыңға жеткен. Театрлар мен кинотеатрларды қызықтаушылар саны да едәуір өскен. Қазақстанда түрлі өнер салаларын қамтитын халықаралық конкурстар мен фестивальдар жүйелі ұйымдастырылады. Ертең Қазақстанның сыртқы саясат саласындағы көпвекторлы ұстанымы әлемдік мәдени ортамен қарым-қатынасты тереңдетіп, өркен жаюына кең жол ашты. Оның ізгі ықпалын ұлттық мәдениетіміздің әр тарамынан байқауға болады. Сол себепті беделі зор халықаралық орталықтармен өзара мәдени үнқатысулар мемлекеттің басым бағыттарының бірі болып қала берері анық. Соңғы жылдары қазіргі заманауи мәдениет және өнер нысандары көптеп салына бастады. Өткен тарихсыз, халықтық салт-дәстүрлерсіз болашақты көзге елестетудің өзі қиын. Бір кездері ескерусіз қалған баға жетпес рухани құндылықтарымыз осылайша 20 жыл ішінде адамдардың өскелең қажеттілігі мен сұранысына ие болып отыр. Сонымен қатар бұқаралық-көпшілік және көңіл көтеретін ойын-сауық түрлері де көбейіп, мәдени, саламатты өмір сүру дағдысын ұстанушылар шоғыры қалыңдап келеді. Қазақстандықтардың білім мен мәдениетке деген ынтасын, құлшынысын жан-жақты көтеру мақсатында ақпараттық теңсіздікті барынша төмендету жөніндегі іс-шаралар жеміссіз емес. Қазақстан ұлттық электронды кітапханасы электронды мемлекеттік кітапхана қоры жобасын жүзеге асыруды қамтамасыз етті. Веб-портал тәулік бойы жұмыс істеп, еліміздің әр қиырындағы тұрғын оның қызметін пайдалана алады. Республикада тарихи және мәдени ескерткіштердің тізімі жасалып, 218 республикалық, 11,5 мың жергілікті маңызы бар нысандар мемлекет қорғауына алынды. Өткен жылы Мәдениет министрлігі «Қазақтың 1000 дәстүрлі күйлері», «Қазақтың 1000 дәстүрлі әндері» жобаларын жүзеге асырды. «Мәдени мұра» бағдарламасы қолға алынғалы тарих, археология, этнография, мәдениет секілді сан-алуан қатпарлы салаларды қамтитын 442 кітап бір миллион данамен жарық көрді. «Бабалар сөзі» 100 томдығының 66 томы басылып шықты. «Қазақфильм» киностудиясы қалпына келтірілген, жаңғыртылған тарихи, мәдени жәдігерлер жайлы 10 фильм қойды. «Ұлттық мұра» топтамасы аясында 20 кинофильм шығарылды. Спорт деген бір әлем Мемлекет тарапынан жүйелі көмек көрсетілгенде ғана әркімнің спортпен, дене шынықтырумен еркін, тыңғылықты шұғылдана алары анық. Бүгінде еліміздегі спорт құрылымдарының саны 31 мыңды құрап отыр. 1500 орынға лайықталған стадиондардың саны 246-дан асады. 2009 жылы 7-ші Қысқы Азия ойындарының қарсаңында пайдалануға берілген «Астана-Арена» стадионына 30 мың жанкүйер еркін сыйып кетеді. Жүзу бассейндері 222-ге, спорт залдары 6999-ға, теннис корттары 263-ге, хоккей мұз айдындары 372-ге жетті. 380 мың адам спортпен тұрақты түрде айналысса, 2,4 миллион адам спортпен және дене шынықтырумен шұғылдану арқылы саламатты өмір салтын серік еткен. 664 мың балалар мен жасөспірімдер 23 мың спорт секцияларына қатысады. 423 балалар және жасөспірімдер спорт мектептері, олимпиялық резервтер дайындайтын 8 республикалық, 17 аймақтық орталықтар жұмыс істейді. Жасампаздықтың жиырма жылында Қазақстан спортының көк байрағы көкке желбіреп, темірдей тегеурінді, болаттай шымыр спортшыларымыз талай биік белестерді бағындырды. Әлемдік аренадағы байрақты бәсекелерде Отан намысын жоғары ұстап, ел мерейін өсірді. Спорттың жекпе-жек, күрес, бокс түрлері бойынша жұлдыздары жарқырап, топ жарды. Юрий Мельниченко грек-рим күресінен олимпиялық, әлемдік белестерді бағындырып, намыстан жаралған Қазақ елінің атын төрткүл дүниеге әйгіледі. Әнұранымыз ойналып, жүректі шаттық кернеді. Ислам Байрамуков жеткен жетістіктер де аз емес. Бұларды даңқты балуан, қазақ спортының меценаты Дәулет Тұрлыханов демеп отырды. Бекзат Саттарханов жиырмаға жеткен бұла шағында Сидней Жазғы Олимпиадасында азуын айға білеген барлық қарсыластарын шаң қаптырып, жеңістің ең биік тұғырына көтерілгенде қуанбаған, шаттанбаған қазақстандық болмады. Өмірден беймезгіл озса да, есімі аңыз болып қалды. Ендігі бір мақтанышымыз – қабылан жүрек Василий Жиров бокспен 11 жыл айналысты. Кәсіпқой рингте 42 жекпе-жек өткізіп, 32 рет қарсыласын еденге сұлатып салды. Оның Атланта Олимпиадасында чемпион болғанын, Баркер кубогын ұтып алғанын спорт жанкүйерлері ұмыта қойған жоқ. 2000 жылғы Сидней Олимпиадасында жарық спорт жұлдыздарымыздың бірі Ермахан Ыбыраимов алтыннан алқа тақты. Бақыт Сәрсекбаев ағасының табысын сәтті жалғастырып, 2008 жылы Пекинде қара үзіп шықты. Зілтемірді ұршықша үйіретін Илья Ильиннің есімі Олимпиада және әлемнің үш дүркін жеңімпазы ретінде алтын әріптермен жазылатынын ешкім жоққа шығара қоймас. Ол биылғы әлем біріншілігінде де нағыз бабында екенін таныта білді. 80-90 жылдары зілтемірші Анатолий Храпатыйдың бабы асты. Әлемнің 5 дүркін, Еуропаның 4 дүркін, Сеул Олимпиадасының жеңімпазы атану – оның бағына бұйырса керек. Ванкувердегі Қысқы Олимпиадада алтынға бергісіз күміс жүлдеге ие болған әйгілі шаңғышы Елена Хрусталева одан кейін де байрақты бәсекелерде олжа салды. Қазақстандағы Қысқы Азиа ойындары жұртшылыққа ұмытылмастай әсер қалдырып, еліміздің абыройын арттырды, мәртебесін өсірді. Қазақ спорты тарихында ең ірі аламан бәйгеде спортшыларымыз 32 алтын, 21 күміс, 17 қола иеленіп, жеңістің ең биік тұғырына көтерілді. Азиада аясында ондаған зәулім спорт кешендері бой көтеріп, көпшілік игілігіне айналды. Байрақты бәсекелерде топ жарып, жеңімпаз болу, рекорд иесі атану оңай емес. Тәуелсіздік жылдары оны Қазақстан талай рет дәлелдеді. Бір сөзбен айтқанда, мемлекет тарапынан көрсетіліп жатқан қамқорлыққа қайтарым қандай дегенге келсек, ауыз толтырып айтатын жетістіктеріміздің барына мақтана аламыз. Азиада әдеттегідей бір ғана қаламен шектеліп қалған жоқ. Ол еліміздің ең үлкен екі бірдей қаласы – Астана мен Алматыда ғана емес, эстафета алауын алып жүру барысында барлық облыс орталықтары мен Бурабай секілді жекелеген аудандарын да қамтыды. Осы ретте халықтың 87 пайызы Қазақстанның бұдан да жауапты шараны өткізе алатындығын, соның ішінде 2022 жылы өткізу көзделіп отырған Қысқы Олимпиада ойындарын да жоғары дәрежеде атқаратындығына сенеді. 2000 жылы Сидней Олимпиадасында 100 метрлік қашықтыққа жүгіруден алтын алған Ольга Шишигина мен 1996 жылы Атлантада өткен Олимпиада ойындарында бессайыс бойынша жеңіске жеткен Александр Парыгин ел мақтанышы деп атауға лайық. Сондай-ақ, осы санатқа Александр Винокуровты да қосса болады. 2003 жылы «Париж-Ницца» және «Amstel Gold Race» веложарысы бойынша жеңімпаз атанды. 2003 жылы ол Швейцария Турын және Тур де Франстың бір этабында жүлделі болып, Л.Армстронг пен Я.Ульрихтен кейінгі 3-орынға қол жеткізді. Жалпы, Қазақстанда велоспорт қарыштап дамып келеді. Бұған Астана қаласында велотрек кешені тұрғызылуы мен 2011 жылдың қазанында веложарыс кубогын елімізде өткізу шарасы куә. 2010 жыл да спорттағы жемісті кезең болды. Әлем чемпионаттарында 11 медаль, олимпиадалық емес спорт түрлері бойынша 81 медаль, өзге де халықаралық турнирлерде 334 медальға ие болдық. Ванкуверде өткен Қысқы Олимпиада ойындарында он жылдық үзілістен кейін бірінші рет күміс жүлдені қанжығаға байладық. Гуанчжоуда өткен 16-Жазғы Азия ойындарында қазақстандық спортшылар 18 алтын, 23 күміс және 38 қола медаль иеленді. Жалпы, командалық есеп бойынша еліміз 4-ші орынға табан тіреді. Қазақстан баскетболшыларының да өнерін айта кеткен жөн. Өзінің алғашқы матчында қазақстандық баскетбол командасы әйгілі «Жальгиристі» жеңді. 2011 жылғы маңызды жетістіктердің бірі, қазақстандық альпинистер М.Жұмаев пен В.Пивцовтың Эверестен кейінгі ең биік Чогори (К-2) шыңын бағындыруы. Оның биіктігі 8611 метр. Осы ретте Елбасының егемендік алған алғашқы жылдарда-ақ қазақстандық альпинистерге ерекше қамқорлық көрсеткендігін айта кету керек. 1995 жылы Президент Н.Ә.Назарбаевтың өзі Абай биігіне шықты. Тұңғыш Президенттің құрметіне Іле Алатауындағы бұрынғы Комсомол шыңына Елбасы есімі берілді. Францияда өткен ауыр атлетика бойынша әлем біріншілігінде ел қоржынына түскен алтын медальдың құндылығын айту парыз. Қазақстанның екі дүркін чемпионы Зульфия Чиншанло 53 килолық салмақ бойынша 2011 жылдың 7 қазаны күні әлемдік рекордты жаңалады. Аталмыш мақалада біз спорттағы көрсеткіштеріміздің бір парасын ғана көрсетуді жөн санадық. Футбол, шайбалы хоккей, ат спорты мен теннис бойынша бағындырған биіктер туралы ұзағынан айта беруге де болар еді. Ақсүйектердің спорты деп білетін гольф та біздің елімізде ерекше сатыға көтерілді. Дәрмен Сәдуақасов бастаған шахматшыларымыз да біздің зор мақтанышымыз. Осы ретте Қазақстан өзінің 20 жылдық Тәуелсіздік мерекесіне спорттық бай олжамен келіп отыр. Осының бәрі қоғам болып спортты қолдаумен қатар, бүгінгі биліктің жүргізіп отырған сындарлы саясатының жемісі. Мақалалар топтамасы «Демократия институты» ҒЗА материалдары негізінде әзірленді. Айқарма бет материалдарын дайындаған Өмір ЕСҚАЛИ, Қанат ЕСКЕНДІР, «Егемен Қазақстан».Жамбылдық онкологтар пациенттен салмағы 6 келі ісікті сәтті алып тастады
Денсаулық • Бүгін, 02:53
Әбиба Әбужақынова Олимпиада жүлдесін алмай, спортпен қоштаспайтынын мәлімдеді
Спорт • Бүгін, 02:26
Қамшыбек Қоңқабаев испаниялық қарсыласынан жеңіліп қалды
Спорт • Бүгін, 01:25
Париж-2024: Мұхамедсабыр Базарбайұлы ширек финалға шықты
Спорт • Бүгін, 00:45
Алдағы үш күн бойы қатты ыстық болады - Қазгидромет
Ауа райы • Кеше