Ведомство басшысы жергілікті жерлерде «Нәтижелі жұмыспен қамту және жаппай кәсіпкерлікті дамыту» бағдарламасы аясында атқарылып жатқан іс-шаралармен, жаңа сипаттағы атаулы әлеуметтік көмекті жүзеге асырудың тиімді тетіктерімен танысты. Аудан әкімдерінің, жұмыспен қамту және әлеуметтік бағдарламалар бөлімі жетекшілерінің қатысуымен өткен алқалы басқосуда өзін-өзі жұмыспен қамтығандарды ресімдеу бойынша жол картасын орындау барысы кеңінен әңгімеленді.
Министр кіріспе сөзінде Үкіметтің кеңейтілген отырысында Елбасы Н. Назарбаев өзін-өзі жұмыспен қамтып жүрген азаматтарды заңдастырып, ресми түрде тіркеуге тапсырма бергенін айта келіп, бұл бағытта қыруар шаруалар атқарылып жатқанын жеткізді. Былтыр міндетті әлеуметтік медициналық сақтандыру жүйесін енгізуге дайындық кезінде тұрғындардың мәртебесі деректер базасында тексерілген болатын. Нәтижесінде 13,2 миллион адамның әлеуметтік мәртебесі анықталды. Үй-үйді аралау кезінде өзін-өзі жұмыспен қамтыған 3 миллион адам ресімделсе, 130 мыңдайы – Солтүстік Қазақстан облысының тұрғындары. Салалық ведомство жетекшісі жиналғандардың назарын мәселенің ең өзекті тұстарына аударып, өзін-өзі жұмыспен қамтығандарды екі санатқа бөлу керектігін атап көрсетті. Бірінші топ – бейресми жұмыспен қамтылғандар, яғни ешқандай еңбек келісімшартынсыз тіркелмеген жеке кәсіпкерлер мен жалдамалы жұмысшылар. Қызылжар өңірінде олардың саны 39 мыңнан асып жығылады. Бұл санатағыларды ресімдеу орталық деңгейде жүргізілсе, жеңілдетілген салық пен тіркеу, шағын несие беру тетіктерін кеңейту қамтамасыз етіледі. Ал өзін-өзі жұмыспен қамтыған екінші топ үшін жергілікті деңгейде жұмысқа орналасуға жәрдемдесуге нақты шаралар қабылдау қажет. Бұлардың саны облыста 36 мың адамға жедеғабыл. Осы ретте биыл 27,5 мың өзін-өзі жұмыспен қамтушы және жұмыссыз жүргендерді нәтижелі жұмысқа тартуды қадап тапсырды.
Облыс әкімінің орынбасары Асхат Сақыпкереев адамдарды жұмыспен қамтамасыз етудің мемлекеттік саясатының орындалуы жайлы баяндады. Былтыр 30714 адам жұмысқа орналасқан. Жаңадан құрылған жұмыс орындарына 13492 адам тартылған. Еңбек нарығында оң ахуал қалыптастыру, көші-қон үдерісін реттеу мақсатымен жол картасы түзіліп, 13,3 мың жұмыссыз бен 14,2 мың өзін-өзі қамтушыны еңбекке тарту қарастырылған.
Министр халық тығыз орналасқан, жұмыс күші көп аймақтардан көшіп келген отбасыларды орналастыру, әлеуметтік көмектер беру шараларын кешенді түрде жүргізуді міндеттеді. Күнгей жақтардан қоныс аударғандарды жұмысқа орналастыру жеткіліксіз деңгейде. 2017 жылы еңбекке қабілетті адамдардың жартысы ғана жұмыспен қамтылған, деді М.Әбілқасымова. Осыған байланысты жұмыспен қамту және еңбек ағындарын реттеуді тиісті дәрежеде жүргізуді атап көрсетті.
Өмір Есқали,
"Егемен Қазақстан"
Солтүстік Қазақстан облысы
