ЕЛ ТҰТАСТЫҒЫ – БАСТЫ МАҚСАТ
Қырғызстанда жаңа сайланған президент Алмазбек Атамбаевтың қызметке кірісу салтанаты 1 желтоқсанда өткелі отыр. Бұл жөнінде уақытша президент Роза Отунбаева арнайы жарлық шығарып, оған қызу дайындық жүріп жатыр. Заң бойынша қазіргі президент Роза Отунбаеваның өкілеттігі 31 желтоқсанға дейін. Жаңа сайланған президенттің өз қызметіне кірісуін ұзақ күтуі қай жағынан да қолайсыз. Бұл өзі осы қызметті екі адам қатар атқарып жүргендей көрінеді. Қырғызстан сияқты саяси күрес шиыршық атқан елде жағдайды ушықтырмас үшін жаңа сайланған президенттің билік тізгінін мүмкіндігінше тез қолға алғаны қажет-ақ. Осы жерде уақытша президент Роза Отунбаеваның ел тыныштығын ойлаған байсалды да парасатты саясаты барынша құптарлық. Кешегі сайлау кезінде де, одан бұрын да елдің екі аймаққа бөліну қаупі қырғыз ағайындарды айтарлықтай алаңдатқан. Ел тұтастығын ұран еткен Алмазбек Атамбаев жеңіске жетсе, енді оны жүзеге асыру оның басты мақсаты екені де даусыз. Президенттің қызметке кірісу салтанаты да, онда сөйленер сөз де сол ел тұтастығына бағышталмақ. Салтанатқа дайындық жөнінде алынған хабарларға қарағанда, бұрынғы және жаңа президент қатар сөйлемек көрінеді. Өнеге еткендей жаңалық. Ел ынтымағына жоралғы болғандай қадам. Бұған дейін бұл елде бұрынғы және жаңа президент бірге отырған емес, бірігіп мәселе шешкен емес. Тіпті сол инаугурацияны өткізу жөніндегі ұйымдастыру комитетіне де бұрынғы және жаңа президенттің адамдары бірдей кірген көрінеді. Мұны да басшылықтың сабақтастығы десе болғандай. Салтанат барынша қарапайым, аз шығынмен өтпек. Қырғыздың 10 миллион сомы, әйтпесе 222 мың доллар қаржы жұмсау көзделіпті. Мұны «көрпеңе қарай көсіл» дегеннен гөрі қырғыз басшыларының үнемді ойлағаны деген жөн болар. Әйтпесе, шамасына қарамай шашылатындар баршылық қой. Сірә, жаңа президенттің қарапайымдылықты қалағаны қарапайым қауымға ұнары да, олар тарапынан қолдау табары да анық. Әңгіме салтанат туралы болған соң да, онда президент қабылдайтын анттың мәтіні парламентте біраз талас тудырғанын да айта кетейік. Жаңа президент «Құдайдың алдыңда, халықтың алдында мемлекет басшысы өкілеттігін әділ атқаруға, адамдар мен азаматтардың құқығын қорғауға, конституцияны қатаң сақтауға, халықтың бірлігін, мемлекеттің тұтастығы мен қауіпсіздігін қорғауға» ант етемін десе, біраз депутат еліміз зайырлы, құдайды неге атайсың деп дау шығарыпты. Дегенмен, парламент жаңа президент ұсынған мәтінді бекітіпті. Жаңа президент қызметіне кіріскен соң, парламентте де жаңа үкіметті тағайындауға байланысты біраз өзгеріс болмақ. Онда Алмазбек Атамбаевтың бастамашылық ұсыныстарының айтарлықтай маңызы барлығын ескерсек, ел тұтастығы, партиялардың бір-бірімен түсінісуі басты тақырыпқа айналмақ. Мұның өзі партиялардың тіл табысуына жеткізуі әбден мүмкін. Қазір қырғыз ағайындар арасында ел тұтастығы туралы екі түрлі пікір бар: біреулері тұтастық мызғымайды, сақталады дейді, екіншілері оған күмән келтіреді. Қалың бұқара халық елдің тұтастығын қалайды. Парламентке кірген партиялар да мұны мықтап ескеретін шығар дейсің.ИСПАНИЯ: СОЛШЫЛДАР ОРНЫН ОҢШЫЛДАР БАСТЫ
Бұл елдегі парламент сайлауының нәтижесі қандай болатыны күні бұрын-ақ айқын еді. Елді экономикалық күйзеліске апарып тіреген социалистерді халық қолдамады. Таңдау оңшылдарға түскенімен, олардың да жағдайды түзей қоюы күмәнді. Еуропада күтпеген жағдайлар болып жатыр. Күні кеше экономикалық тұрғыда жетекші елдердің, тұрақтылығы жоғары деген елдердің қаржылық дағдарысқа ұшырауы таңдандырмай қоймайды. Айталық, осыдан оншақты жыл бұрын Грекия, Италия, Испания экономикалық күйзеліске кезігеді дегенге көпшілік жұрт сене қоймас еді. Бұл елдерде өмір сүру деңгейі айтарлықтай жоғары болды. Ал қазіргі шындық – бұлар қаржылық күйреу шегінде тұр. Грекия мен Италияда үкімет әкімшілік жолымен ауыстырылды – ел президенттері бұрынғы үкімет басшыларын жаңа адамдармен алмастырды. Солай етуге мәжбүр болды. Бұл – нарықтың талабы. Ал Испания демократиялық жолды қалады. Үкіметті кезектен тыс сайлау өткізу жолымен алмастыруды жөн көрді. Социалистік партия 2004 жылдан билікте. Оның көсемі Хосе Лиус Сапатеро әлемге танымал қайраткер. Испандықтар оларға үлкен үміт артқан. Алғашқы жылдарда сол үміт ақталатындай да көрінген. Жоғары өмір сүру деңгейі сақталып қана қоймай, оның өсімі де болды. Елі де бай, халықтың тұрмысы да жақсы. Испандықтар соған бейімделген. Әлемдік дағдарыс басқа жағдайды алға тосты. Социалистер оған қарсы тұрудың жолын таба алмады. Сол үшін халық сенімінен айырылды. Жеңіске жеткен оңшыл центристік Халық партиясы елді дағдарыстан алып шығады деп кесіп айту да қиын-ау. Біршама сарапшылардың пікірінше, олардың жеңісінің басты себебі – жұртшылықтың социалистерге деген сенімінің азайғандығында. Бұл партиялардың сайлауға байланысты бағдарламаларында уәде, ұсыныстар да көп. Әңгіме соның қалай орындалатындығында ғой. Халық партиясының жетекшісі Мариано Рахой Брей: «испандықтардың ойынан шығуға дайынбыз», дегенді айтты. Ұран сөз. Халықтың ойы – дағдарыстан шығу. Соны консерваторлар жүзеге асыра ала ма? Оң жауап беретіндер көп бола қоймас. Испания қарызға белшесінен батып отыр. Одан құтылудың, ең болмаса азайтудың жолы – мемлекет шығынын азайту. Яғни, әлеуметтік игілікті шектеуге тура келеді. Жалақы азаяды, денсаулыққа, білімге жұмсалатын қаржы шектеледі. Оған испандықтар көне ме? Кім біледі. Гректер көнген жоқ. Елде ереуілдер, шерулер тасқыны қаптады. Сол жағдай Испанияда да қайталануы әбден мүмкін. Қазірдің өзінде кеше билікте болып, енді оппозицияға кеткен Социалистік партияның басшылығы билікке келген партияны бірден әлеуметтік саланы қаржыдан қыса бастағанын сынға алды. Бұл сынды халықтың қолдайтыны да анық. Бұл шиеленіске апарып соқтырады. Сірә, елдегі саяси партиялар әлі де қаржы тапшылығын жоюдың негізгі жолы ең алдымен жаңа жұмыс орындарын ашу, жұмыссыздықты азайту екеніне жете мән бермейтіндей. Бұл елде жұмыссыздық саны 5 миллиондай. Бұл аса жоғары жағымсыз көрсеткіш. Олардың барлығы мемлекеттің мойнында. Соларға жұмыс орны ашылса, жаңа тауар өндіріледі және жұмыссыздық үшін төленетін қаржы үнемделеді. Ал испан үкіметінің бұрынғысы да, жаңасы да қаржы үнемдеуді әлеуметтік саланы шектеуден іздейді. Оңшыл партия билік басына сонау диктатор-генерал Франконың заманынан кейін енді ғана келіп отыр. Халық кімнен болса да жақсылық күтеді, үмітпен өмір сүреді. Консерваторлар сол үмітті ақтай ала ма деген сұрақ олардың жеңісінен кейін-ақ күн тәртібіне шықты. Жұрт айта беретін уақыт көрсетеді деген жауапты алға тартасың. Мамадияр ЖАҚЫП.