«Егемен Қазақстанның» арнайы жобасы: Жасампаздық жемістері
Жиырма жылдың ішінде атқарылған игі істердің арқасында әрбір өңіріміз өзгеріп, өміріміз жақсарып келеді. «Егемен Қазақстан» газеті осындай өркенді өзгерістерді бейнелейтін материалдарды тұрақты жариялап тұрады. Төменде Маңғыстау облысындағы Ақшұқыр ауылынан фоторепортаж беріліп отыр.
Жиырма жылдың ішінде атқарылған игі істердің арқасында әрбір өңіріміз өзгеріп, өміріміз жақсарып келеді. «Егемен Қазақстан» газеті осындай өркенді өзгерістерді бейнелейтін материалдарды тұрақты жариялап тұрады. Төменде Маңғыстау облысындағы Ақшұқыр ауылынан фоторепортаж беріліп отыр.
АДЫМЫ АРШЫНДЫ АҚШҰҚЫР
Кәрі Каспий маңайы ризық тауып, несібесін алып жүргендерден қай кезде де кенде болған емес. Дегенмен, тәуелсіздіктің таңы атқаннан кейін елімізде жүргізілген дамудың алғышарттары теңізді жағалай орналасқан ауылдарды ерекше құлпыртты десек артық айтқандық емес. Соның бірі – Ақшұқыр ауылы. Ауыл көкжиегі жыл сайын керегесін кеңге жайып келеді. Тарихи деректерге сүйенсек, ауылдың іргетасы 1870 жылы қаланыпты. Бір кездері Түрікмен болысының орталығы болған Ақшұқыр бұл күндері теңіз қайраңын игеруді қолға алған келешегі кемел Түпқараған ауданының құрамына кіретін ауылдық округтің орталығы. Ауылдың тоғыз жолдың торабында толқып жатқан теңіздің жағасында орналасуы қонысқа да, түрлі шаруашылықпен айналысуға да қолайлы болып отыр. Соның дәлеліндей, соңғы бес жылда ауыл тұрғындарының саны екі есеге өсіп, тоғыз мыңға таяпты. Сәйкесінше оларға қызмет көрсететін әлеуметтік нысандар саны да өсе түсіп, қызмет көрсету түрлері де көбейген. Ауыл әкімі Мәлік Ізтұрдың айтуынша, «Ауыз су» бағдарламасы бойынша тұрғындардың көкөніс өсіріп, жеке кәсіпкерліктерін дамытуы үшін сегіз ұңғы қазылып, одан шығарылған суларды жинақтайтын 300 тонналық екі су қоймасы салынуда. Сондай-ақ Италиядан су тұшыту қондырғысын әкелу жұмыстары қолға алыныпты. Бұл да тұрғындар үшін жасалудағы игі шаралардың бірі. Ақшұқыр ауылы «Жас мамандар – ауылға» атты игі бастаманы қызу қолдағандығымен де ерекшеленеді. Қызу қолдайды дейтін себебіміз, ауылда жас мамандарға жағдай жасау үшін жыл сайын 4 пәтерлі екі-үш үй салынып отырады. Сондай үйлерден пәтер алғандардың бірі М.Әбдіхалықов атындағы орта мектептің мұғалімі Г. Сәрсенбаева олардың қала үйлерінен бір кемдігі жоқ екендігін ризашылықпен әңгімелейді. Ауылдан жер телімін алып, жеке үй салушылар саны жүздеп саналады. Өткен бес жыл ішінде 1500-дей тұрғын үй салыныпты. Теңізді жағалай қоныстанушылар санының тез өсуіне орай жақында ауыл құрамындағы Сайын елді мекенінде тағы бір ауылдық округ өз алдына енші алған еді. Халықтың жиі қоныстанып, тұрақтануына осындағы А.Нәбиев басқаратын «Жайлау» серіктестігі де игі ықпал етуде. Серіктестік тұрғындарға жұмыс берумен қатар жеке шаруа қожалықтарына түрлі көмек жасап, мүжәлсіз отбасыларына қайырымдылық көмек көрсетеді. Елді мекен тұрғындары сумен, табиғи газбен, электр қуаты, байланыспен түгелдей қамтылып, интернет желісіне қосылған. Ауылда екі мектеп, еңселі мәдениет үйі, дәрігерлік амбулатория, 30-ға тарта сауда нүктелері, мейрамхана, тігін цехтары, жиһаздар жасайтын шеберханалар, спорт залдары бар. Шағын несие алып, өз жер телімдерінде жеке кәсіпкерлікті дамытып, тұрғындарға қызмет көрсетушілер саны да көбейе түскендігін айтып өттік. Солардың бірі – «Әли» шеберханасы. Халықтың сұранысы бойынша тапсырыспен жұмыс істейтін олардың қолдарынан шыққан ұлттық киімдер мен ұлттық бұйымдар үлкен сұранысқа ие. Өлкеге танымал сәулетші Е.Әлиев «Өтеғұл» шеберханасы жиһаз жасау, жөндеу, ұлттық аспаптарды шығарса, белгілі қолөнер шебері Роза Әлиеваның бұйымдары республикамыз ғана емес, алыс-жақын шетелдерде жоғары баға алып жүр. Өркен жайып келе жатқан ауылдың мәдениет өнері, білім мен спортты дамытудағы табыстары мақтауға тұрарлықтай. Мысалы, белгілі өнерпаз Н.Айдарбаева басқаратын Ақшұқыр мәдениет үйі республикалық «Үздік ауылдық мәдениет мекемесі» байқауының бас жүлдегері, «Айна» атты этнографиялық ойын-сауық отауы, «халықтық» деген атаққа ие. Республикалық «Бозторғай» байқауының бас жүлдесін 10 жасында жеңіп алған Сұңғат Мөңке осы ауылда тұрады. Ал М.Әбдіхалықов атындағы орта мектеп болса, республикалық «Таңдаулы ауыл мектебі» байқауында бірінші орын алған. Ауылда спорттың қазақша күрес, бокс, дзюдо түрлерінің секциялары жұмыс жасайды. Оларға ауыл жасөспірімдері белсене қатысуынан ауылдың рухани жағынан ғана емес, «тәні саудың – жаны сау» деген мәтелді де жадыларында берік ұстайтындығын байқай аласыз. Соңғы 6 жыл ішінде жаттықтырушы-ұстаз Үсен Ізбасаров басқарған сегіз спортшы халықаралық, республикалық спорт жарыстарының жеңімпазы болды. Ауылдағы «Жауқазын» балалар бақшасы білім ұясы «Ең үздік мектепке дейінгі ұйым» аудандық сайысының жеңімпазы болып табылады. «Жауқазында» балалар тәрбиешісі болып еңбек ететін Е.Досымова ауданның «Жылдың үздік тәрбиешісі-2011» атағына ие. Міне, табиғаты әсем, салқын самалды теңіз жағасына қоныс тепкен, қарттары өнегелі, жастары жалынды Ақшұқыр ауылының табыстары, тұрмыс-тіршілігі осындай. ________________________________________ Арнайы бетті дайындаған «Егемен Қазақстан» газетінің Маңғыстау облысындағы меншікті тілшісі Жоламан БОШАЛАҚ, суреттерді түсірген Серік МАЙЕМЕРОВ.
