Еліміз нарықтық экономикаға өткелі бері заңды тұлғалармен бүркемеленген экономикалық қылмыстар жиі орын ала бастады. Оған қоса кәсіпкерлік қызметті бақылаушы органдардың лауазымды тұлғалары тарапынан бизнес ісіне заңсыз араласу деректері көбейіп кетті. Ал мұндай қаптаған коррупциядан құтылудың амалы қандай? Міне, осы мәселелер халықаралық ғылыми-практикалық конференцияда сөз болды.
Конференция жұмысына Қазақстан, Ресей, Литва, Беларусь, Украинаның ғалымдары, ведомстволық оқу орындарының басшылары, құқық қорғау органдары мен қоғамдық ұйым өкілдері, депутаттық корпус, сондай-ақ сыбайлас жемқорлыққа қарсы күрес саласындағы сарапшылар қатысты. Алдымен сөз алған Экономикалық қылмысқа және сыбайлас жемқорлыққа қарсы күрес агенттігі төрағасының орынбасары А.Лукин Тәуелсіздігіміздің жиырма жылдығын біздің еліміз жаңа сапалы демократиялық стандарттармен, яғни заң үстемдігін қамтамасыз етіп, адам құқын барынша қорғау дәрежесіне қол жеткізуімізбен қарсы алып отырғанымызды айтып өтті.
Дегенмен, өркен жайған еліміздің әлеуетін әлсіретуді көздеген жемқорлар әрекеті басылар емес. Бұл орайда жемқорлар жамандығын талмай жырлайтын құқық қорғау органдары да қарап жатпағаны анық. Өйткені, олар жемқорларды жағадан алған жалынды жұмыстар жаппай жүргізілгенімен «Транспаренси Интернэшнл» көрсеткішіне сай еліміз жемқорлыққа қарсы тұру бойынша 105-орынды иеленуі мемлекет пен қоғам тарапынан коррупцияға қарсы кешенді шараларды қабылдау қажеттігін де білдіреді дейді. Ондай шаралардың бірі ретінде көлеңкелі экономикаға қарсы күресті күшейтуді алға тартады. Агенттік экономиканың осындай саласында 219 млрд. теңге зиян келтірген 3485 қылмысты анықтап, оның тек 101 млрд. теңгесін қайтара алды.
Конференцияда сөз алғандар сыбайлас жемқорлыққа қарсы әрекет пен экономикалық қауіпсіздікті қамтамасыз етудің қылмыстық-құқықтық және криминологиялық жәйін, қылмыстық іс жүргізу және криминалистикалық түрлерін, әлеуметтік-саяси, ақпараттық және экономикалық мәселелерін ортаға салды.
Александр ТАСБОЛАТОВ.