![301111-24](http://old.egemen.kz/2011img/301111-241.jpg)
![301111-25](http://old.egemen.kz/2011img/301111-251.jpg)
Тәуелсіздігіміз төбеден салбырап түсе қалды ма!? Жоқ! Бұл Тәуелсіздік еркіндігін өздігінен өзгенің қолына ұстата салмайтын ұлан дала ұлдарының ұлы шайқастарында шыңдалған. Бұл Тәуелсіздік бодандық бұғауынан бұлқынған қайсар қазақ қанымен суарылған. Бұл Тәуелсіздік халық шежіресінде көмескіленбеген ірілі-ұсақты ұлт-азаттық көтерілістермен шыңдалған. Ақиқатында, қазақ халқының азаттық жолындағы күресі 1991 жылға дейін ешқашан үзіліс тауып көрген емес. Сондықтан белгілі жәйттерді білтелей бермей бірден таңдаған тақырыбымызға тамыр тартайық.
Өткен ғасырдың 60-шы жылдарында қызыл империяның Қазақстанда жүргізіп жатқан қыңыр саясатына қарсы оқыған қазақ жастарының арасында ашық қарсылық толқыны бой алды. Қазақстандағы жоғары оқу орындарының студент-жастары арасында ұлттық сананы ояту, аяққа басылған ұлттық мүддені қорғау, құрып бара жатқан қазақ тілінің қасіретін ашық көтеру мақсатындағы талпыныстарға Мәскеудегі қазақ студенттерінің «Жас тұлпар» атты ұлттық-шығармашылық бірлестігінің ықпалы ерекше зор болды. Сол кезеңдегі қазақ студент-жастары арасындағы ахуалды айғақтайтын КСРО мемлекеттік қауіпсіздік комитетінің (КГБ) мұрағат құжаттарын зерттеген тарих ғылымдарының докторы Жанна Қыдыралинаның айтуынша, 1966 жылы 9 ақпанда «Жас тұлпар» ұйымының бірқатар мүшелері Алматыға келіп, ҚазМУ студенттерімен кездесу өткізгенін, сол кездесуге Алматы медициналық институтының 10 студенті қатысқанын, кездесуде Алматыда және басқа қалаларда «Жас тұлпар» сияқты шығармашылық бірлестіктер құру туралы сөз болғанын КГБ қызметкерлері жан-жақты зерттеп, зерделеген. Осы жайларды құжаттарға хаттап, «сенімсіздерді» екшеген.
Сол құжаттардың бірі 1966 жылғы 5 наурызда Қазақ КСР КГБ-сының КСРО КГБ-сі 2-ші бас басқармасына жолдаған хатына назар салайық. Онда 11 ақпанда Алматы медициналық институтының 1-ші курсында оқитын қазақ студенттерінің ашық түрде сабаққа келмегендігі, бір топ студенттің ректоратқа, содан кейін Денсаулық сақтау министрлігіне институтта бірқатар пәндердің (тарих, химия, физика пәндерінің) қазақ тілінде жүргізілуін талап еткен ұжымдық талаптарын ашық мәлімдеген. Қылышынан қан тамған қызыл империяның қаһарынан жел ығып, Мәскеудің түкірігі жерге түспей тұрған кезеңде қазақ жастарының бұл қадамы нағыз төтенше жағдай еді. КГБ мұрағатындағы осындай құжаттарда сонымен бірге Қарағанды мединститутының студенті Мұрат Кейкиннің, Горькийдегі су көлігі инженерлері институтының студенті Саят Әбілқасымовтың, Мәскеу мұнай институтының студенті Кеңес Орынбасаровтың, Целиноград мединститутының студенті Гүлжан Бейбітованың қазақ студент-жастары арасынан ұлттық ұйымдар құруға ниеттенген әрекеттері жан-жақты тексерілгендері айтылған. Бүгінгі әңгімеміздің басты арқауы да 1967 жылы Ақмола (Целиноград) медициналық институты студенттерінің арасында «Оян, қазақ!» атты ұйым құруға талпынған Гүлжан Ғазизқызы Бейбітова хақында болмақ.
Иә, ол бір ұлттық болмысымыздың болашағы бұлыңғырланып, туған тіліміздің тұнығы тұмшаланып, қолданыс аясы тарылып, халықтық қалып пен ұлттық сананы қара бұлт торлаған кезең еді. Қазақ мектептерін былай қойғанда, іргелі қазақ ауылдарының өзі «болашағы жоқ» атты қара тізімнің қамытын киіп, жаппай жабыла бастаған болатын. Бүкілодақтық тың игеру науқанының эпицентріне айналған Орталық және Солтүстік Қазақстанның халі тіпті мүшкіл күйге түсті. Талай-талай зобалаңдардан қазағы тіптен селдіреп қалған бұл өңірлерге «тың және тыңайған жерлерді игеру» желеуімен Одақтың түкпір-түкпірінен адамдарды қойша тоғытып, айналдырған төрт-бес жылдың ішінде Қазақстан «100 ұлттың планетасына» айналды да шықты.
Міне, нақ осындай тығырықты шақта жоғары оқу орнының табалдырығын аттаған көзі ашық, көңілі сергек Гүлжанды туған халқының болашағы қатты толғандыратын. Қазақ КСР түсті металлургия министрлігіне қарасты кен орындарында ғұмыр бойы партиялық және басшылық қызмет атқарған әкесі Ғазиз Бейбітовтің жұмыс бабына байланысты Бестөбе, Жолымбет, Ақсу сияқты алтын өндірісі кенттеріне қоныс аудара жүріп, ол өз жерінде өздері өгей ұлтқа айналған қазақ халқының қасіретін бала көңіліне түйіп, жас жүрегіне тоқып өсті.
Әлі есінде, сонау елуінші жылдардың басында Бестөбе кентіндегі балалар бақшасының табалдырығын алғаш аттағалы тұрған Гүлжанға әкесі: «Балам, балалар бақшасының тәрбиешілерінің барлығы басқа ұлт өкілдері. Олар сенің есіміңді өзгертіп, басқаша Галя, Гуля деген сияқты орысша атайтын болса, келісіміңді берме», деген еді. Айтқандай-ақ, ертеңіне балабақша тәрбиешісі Людмила Александровна Шпанберг Гүлжанды оңаша шақырып алып, «Давай мы тебе в садике будем называть Гулей. Гуля очень хорошая имя» демесі бар ма! Нет, мне не надо никакая хорошая имя. Меня зовуть Гулжан», деді қаршадай қыз тәрбиешіге тура қарап. Тура қарсылықтан тосылған тәрбиеші қайта-қайта басын изеп, тұтығып қалды.
Бұл бала Гүлжанның «ақ дегені алғыс, қара дегені қарғыс» болып келген тоталитарлық жүйеге жасаған алғашқы қарсылығы еді. Ұзамай ол мектеп табалдырығын аттады. Сыныптағы жалғыз ғана қазақ баласы екен. Бірақ Гүлжан жалғыз екенмін деп жасыған жоқ. Қайта іштей жігерленіп, қазақ қызы деген атына кір келтірмей оқуда да, қоғамдық жұмыстарда да өзгелерге үлгі болуға тырысты. Шаңырақтың тұңғышы, үйдегі жеті баланың үлкені Гүлжанның бойында ұлтжандылық болмысты қалыптастыруға Ғазиз отағасы барынша ықпал етті. Нағыз коммунист, лауазымды партия қызметкері Ғазиз Бейбітов партияның ұлттық саясатына деген қарсылығын сыртқа ашық шығармаса да, балаларының бойына туған халқының дәстүрлеріне деген адалдықты, ұлттық сүйіспеншілікті кеңінен дарытуға тырысты. Ұзақ уақыт іссапарларда жүргенде, заман ағымымен бірыңғай орыс мектептерінде оқитын балаларынан қазақ тілінде хат жазуды талап етті. Оларды қазақтың бай тарихи бастауларынан нәр алуға баулыды.
Ақсу орта мектебінің жоғары сыныбында оқып жүрген кезінде тарих пәнінің мұғалімі Коломейец деген емтиханға дайындалып жүрген балаларға: «Қазақ қыздарына жақсы оқудың қажеті жоқ. Бәрібір олар мектеп бітіргеннен кейін «қалың малға» беріліп, тұрмыс құрады», деп басқа ұлттың балаларының жақсы оқуына барынша жағдай жасауға тырысатын. Соған қарамастан Гүлжан мектепті үздік бітіріп шықты. Көп сыныптастарының жоғары оқу орнына түсуге жағдайы болмай жатқанда, бұл Целиноград медициналық институтына мемлекеттік емтиханды ойдағыдай тапсырып, 1966 жылы бірінші курс студенті атанды.
Бұрыннан-ақ бойында ұшқындап жүрген ұлттық намысты тұтандырып, тығырыққа тірей тұншықтырылған қазақ тілінің қасіретіне байланысты ашық қарсылық сезімінің белең алған сәті де осы кезеңге тап келді. Институтта бірде-бір пән қазақ тілінде оқытылмайды. Шалғай ауылдардағы қазақ мектептерін үздік бітірген студенттердің оқу үлгерімі нашарлап кетті. Оларға бірыңғай орысша және латынша өткізілетін институт бағдарламасын игеріп әкету үшін ешқандай қосымша көмек шаралары жасалған жоқ. Алғашқы семестрден кейін орыс тілін жетік білмейтін қазақ студенттерін институттан шығару науқаны басталды. Олардың талпынысы мен талабына ешкім көңіл де аударған жоқ.
Болашағынан үлкен үміт күттірген талай-талай талантты қазақ жастарының орыс тілін білмегендігіне байланысты болашақтарына балта шабылды. Бүгінде Қазақстан медицина саласының білікті ғалымы Жақсылық Сәрсембаев, білімді дәрігері, марқұм Жібек Байтышқанова сияқты Гүлжанның курстастарының басына да осындай қиындық туды. Бұдан әрі әрекетсіз отыра беру мүмкін емес еді. Гүлжан Целиноград медициналық институтындағы қазақ жастарының басын біріктіріп, бір ұйым құруға бекінді.
Алғаш рет жатақханадағы бір бөлмеде жататын курстасы Сәлима Қасымоваға осы шешімін айтты. Гүлжанның батыл бастамасын Сәлима бірден қолдады. Олар алдымен институт басшылығына қазақ мектептерін бітіріп келген студенттер үшін жалпы білім беретін пәндерді қазақ тілінде оқыту жөнінде талап қойған хат жазып, содан кейін қазақ жастары арасында ұлттық құндылықтарды қорғауға байланысты үндеу тарату туралы келісті. Ұлттық рухани құндылықтарды қорғауға бағытталған «Оян, қазақ!» атты ұйым құруға шақырған үндеудің қазақ және орыс тілдеріндегі мәтінін Гүлжан Бейбітова өз қолымен жазып шықты. Қолмен жазылған сол үндеу мәтінінен қысқаша үзінді келтірейік: «Қазір қазақ халқын толық орыстандыру саясаты жүріп жатыр. Қазақ мектептері жаппай жабылуда. Балабақшаларда бүлдіршіндер таза орыс тілінде тәрбиеленеді. Барлық жерде бірдей қазақ тілінің қолданыс аясын қасақана тарылтып, бірте-бірте ұлттық тілімізді мүлде жойып жіберу науқаны белең алған. Ұлттық дәстүріміз бен мәдениетіміз өгейсіп барады. Ұлт өкілі ретінде партия, совет және комсомол қызметінде жүргендер халық мүддесі үшін бір ауыз жылы сөз айта алмайды. Қазақша қойылған есімдерінен бас тартатын балалар көбейді. Бізге ұлттық болмысымыздың болашағы үшін, туған тілімізді сақтап қалу үшін күресетін кез келді. Конституциялық құқығымызға сәйкес талап етеміз: қазақ тілі мен мәдениетіне, ұлттың дәстүрі мен діліне қысым көрсету тоқтатылсын!..»
Осындай мағынада жазылған үндеуді Сәлима екеуі қолдан көшіріп, көбейтті. Енді студенттер арасында жақтастар іздеп, бұл үндеуді барынша көптеп тарату мәселесі тұрды. Гүлжан Бейбітованың «Оян, қазақ!» ұйымын құру жөніндегі бастамасы Целиноград медициналық институтының Жақсылық Сәрсембаев, Ақбаян Малдыбаева, Жібек Байтышқанова және басқа студенттерінің арасында қызу қолдау тапты. Әрине, институттан шығып қалу қаупінен қорқып, ұйым талаптарын іштей жақтаса да мүше болудан бас тартқандар да аз болған жоқ. Оған қимылдағанды қалт жібермей қадағалайтын атақты «үш әріптің» де салқыны тиді.
Ол бір кезеңде кез келген мекемеде, оқу орындарында «үш әріптің» жасырын жансыздары жүретін. Тіпті өзіңмен көп жылдар қызметтес болған тамыр-таныстарыңның да КГБ-ның жасырын тыңшысы болып шыққан жағдайлары аз болмайтын. Гүлжан Бейбітованың бастамасы да осындай жансыздар назарынан қағыс қалмады. 1968 жылы өзінің соңына тыңшы түскенін Гүлжан да анық сезіне бастады. Олар ашық әрекетке бармағанымен басқан ізін аңдып, әрбір қимылын жіті бақылады. Институт ректораты мен оқытушылары тарапынан да күдік күшейе түсті.
Ақыры 1968 жылдың күзінде Гүлжан Бейбітоваға КГБ-дан «шақырту» келді. Облыстық қауіпсіздік комитетінің басшысы Қабдулхамит Нұрғалиевтің бөлмесінде астанадан арнайы келген бірнеше комитет қызметкері Гүлжаннан жауап алды. Гүлжан Бейбітова КГБ офицерлерінің қойған қитұрқы сұрақтарына үкіметке қарсы ешқандай әрекет жасалмағанын, мемлекеттік саясатты мойындайтындарын, тек Қазақ КСР-ның Конституциясына сәйкес қазақтың тілі, дәстүрі мен мәдениетінің құқын қорғау тұрғысында ғана талаптар қоятынын айтып, батыл да нақты жауап берді. Бірнеше сағатқа созылған тергеу Гүлжан Бейбітова үшін «бейбіт» аяқталды. Оған ұйым құруға қатаң тыйым салынатыны туралы ескерту жасап, институтта ұлттық ерекшеліктерге байланысты кемсіту кемшіліктерінің алдын алу шаралары жасалатындығы жөнінде мәлімдеді.
Көп ұзамай Целиноград медициналық институтында қалыптасқан жағдай бірқатар өзгерістерге ұшырады. Қазақ мектептерін бітіріп келген жастарға қосымша сабақтар өткізіліп, тіл үйрену үшін жағдай жасалынды. Оларды оқу үлгеріміне байланысты институттан шығару фактілері барынша шектелді. Гүлжан Бейбітова кейіннен КГБ кеңсесінде болған сол бір күрделі кездесудің қатаң шараға ұласпай бітімгершілікпен аяқталуы сол бір жылдардағы туған халқының ұлттық қасіретін бар болмысымен сезінетін ұлтжанды азамат, КГБ генералы Қабдулхамит Нұрғалиевтің көмегі екеніне көз жеткізді.
1972 жылы институтты ойдағыдай тәмамдағаннан кейінгі Гүлжан Ғазизқызының барлық саналы ғұмыры адам денсаулығына араша тұрумен өтіп келеді. Ақ халатты абзал жан санатындағы осы бір қырық жылға созылған еңбек жолының отыз жылдан астам уақытын бүгінгі Астана қаласының медициналық саласын нығайтуға арнап, емханалар жүйесіндегі басшылық қызметте өткізген екен. Осы жылдар ішінде ол Ақмола облысында ұлттық мүдденің, медицина саласындағы қазақ кадрларының қаншалықты қыспаққа алынғанын өз көзімен көрді. Сонау сексенінші жылдардың соңына дейін Целиноград қаласындағы бірде-бір емханада қазақ бас дәрігерінің болмауы соған дәлел болса керек.
Гүлжан Ғазизқызы 1978 жылдан 1989 жылға дейін Целиноград қаласындағы №2 емхана бас дәрігерінің емдеу жұмысы жөніндегі орынбасары болып еңбек етті. Осы он жылдан астам уақытқа созылған бұл кезең өз жерінде өгейсітілген ұлттық кадрлар үшін күреспен өтті десе де болғандай. №2 емхананың бас дәрігері Екатерина Рыбакова нағыз шовинистік пиғылдағы адам еді. Бұл көзқарасын жасырмай-ақ ашық көрсететін. Сол кезеңде алдыңғы қатарлы мекеме болып саналатын №2 емханада қазақ дәрігерлері жоқтың қасы еді. Білікті де тәжірибелі ұлттық мамандарды бас дәрігер жұмысқа қабылдамайтын. Ұлтжандылық жастайынан бойына берік орныққан Гүлжан Бейбітова бас дәрігердің бұл қылығына үнемі қарсы тұрып, қазақ кадрларына қарсы бұра тартушылықты болдырмауға тырысатын. Бірақ «қазаншының еркі бар, қайдан құлақ шығарса» дегендей, билік басындағы бас дәрігер артықшылығын пайдаланып, ойына келгенін істеді. Бас дәрігер мен орынбасарының арасындағы екіұдай көзқарастан туған келіспеушілік талай рет қалалық денсаулық сақтау бөлімінде, қалалық партия комитетінде қаралған. Бұл ретте білікті маман, бірбеткей Бейбітованың жеңіске жеткен кездері аз болған жоқ.
1989 жылы Гүлжан Бейбітова қалада жаңадан ашылуға тиіс №6 емхананың бас дәрігері болып тағайындалды. Целиноград қаласының тарихында бірінші рет емхананың бас дәрігері болып тағайындалған қазақ кадрын сынақтан өткізу үшін жасалы ма, кім білсін, құрылыс жұмыстары жартылай ғана аяқталған емхананың аты бар да, заты жоқ еді. Бұл Целиноград (Ақмола) қаласының тарихында емханаға алғаш рет бас дәрігер болып баратын қазақ кадрына жасалған нақты кедергі, ашық сынақ еді. Оны Гүлжан да, басқалар да бірден түсінді.
Бастапқыда Гүлжан Бейбітова «он екіде бір нұсқасы жоқ» №6 қалалық емханаға бас дәрігер болып барудан бас тартты. Дегенмен, сол кезеңдегі облыстық атқару комитеті төрағасының орынбасары Зәуре Қадырова мен Целиноград қалалық партия комитетінің екінші хатшысы Бекен Әлімжановтың айтқандары оны райынан қайтарды. «Қалалық емханалардың бірде-біреуінде қазақ бас дәрігері жоқ. Гүлжан-ау, бұл қорлықтан қашан, қалай құтыламыз?», деген еді бір сөзінде Бекен Өкенұлы.
Аталы сөз Гүлжанның намысын қайрады. Ол тәуекелге бел буып, жаңа емхананың тізгінін қолға алды. Алды деген аты болмаса, штаттық кестеде «бас дәрігер» дегеннен басқа нұсқасы жоқ үлкен мекемені тақыр жерден тартып әкету оңай болған жоқ. Гүлжанға алдымен құрылысшы, одан қалды прораб болуға тура келді. Алқам-салқам құрылысты бір жөнге келтіріп, жабдықтау жұмысына кірісті. Емхананың медициналық құралдарынан бастап, жиһаздарына дейін тірнектеп құрастыруға тура келді. Қала іргесіндегі Шортанды жиһаз фабрикасынан әрбір орындық, үстелге дейін өзі тасыды. Сол кезде Шортанды аудандық атқару комитетінің төрағасы болған ұлтжанды азамат, ел ағасы Ораз Боранбаев сияқты ағаларының жасаған жақсылығын ешқашан ұмытпақ емес...
Емхананың етек-жеңі жиналып, дәрігерлер құрамын қабылдайтын да кез келді. Табиғатынан бірбеткей Гүлжан Ғазизқызы қалалық денсаулық сақтау бөлімінің шектеу қойғанына қарамастан бас дәрігердің орынбасарларынан бастап, салалық дәрігерлерге дейін қазақ кадрларының ішінен іріктеді. Ұжымға қабылдаған қандастарына қоятын бір ғана талабы: білім мен біліктілік еді. Тек қана қазақ мамандарынан тұратын ұжымды көрген облыстық денсаулық сақтау басқармасының бастығы Владимир Мальцев «ер-тоқымын бауырына ала тулады». Гүлжан Бейбітоваға ұлтшыл деген айып тағып, мәселесін әртүрлі партиялық комиссияларда қаратты. Бірақ ұжымның қала тұрғындарының денсаулығын қорғаудағы жұмысынан кемшілік, мамандардың кәсіби біліктілігінен кінәрат таба алмаған комиссия «емханада қазақ кадрлары шектелсін» деген негізсіз шешім шығара алмады. Одан кейін төрт құбыламызды теңестірген Тәуелсіздік таңы атты...
Өзі қолымен құрған ұжымына табан аудармай 21 жыл жетекшілік жасаған Гүлжан Бейбітова үлкен абыроймен зейнет демалысына шықты. Тәуелсіз Қазақстанның «Құрмет» ордені мен бес бірдей медалінің иегері, «Қазақстан Республикасы денсаулық сақтау саласының үздігі» Гүлжан Ғазизқызы өмірлік қосағы, Қазақстан баспасөзінің ардагері Бәдуан Имашұлы екеуі Айдар, Айдын, Айбек атты үш ұл өсіріп, шүпірлеген немере сүйіп отыр. Міне, осы мақала қатталып жатқанда, Гүлжан Бейбітова тағы да бір имандылық парызын атқарып, қажылық сапардан оралды.
Жылқыбай ЖАҒЫПАРҰЛЫ,
Астана.