«Егемен Қазақстанның» арнайы жобасы: Жасампаздық жемістері
Жиырма жылдың ішінде атқарылған игі істердің арқасында әрбір өңіріміз өзгеріп, өміріміз жақсарып келеді.
«Егемен Қазақстан» газеті осындай өркенді өзгерістерді бейнелейтін материалдарды тұрақты жариялап тұрады.
Төменде Алматы облысындағы Панфилов ауданының орталығы Жаркент қаласынан фоторепортаж беріліп отыр.
![011211-33](http://old.egemen.kz/2011img/011211-331.jpg)
Жаркент. Еліміздің Қытаймен шектесетін шеткі нүктесі бұл. Іргетасы сонау 1882 жылы қаланып, басқа аймақтарға қарағанда өркениеттің бастапқы жетістіктерінің жемісін ертерек татқан қалалар қатарынан саналады. Мұнда ұсақ қолөнершілер мен сауда-саттықтың алғашқы бастамалары өрістеген. Өйткені, географиялық орналасуы оған жан-жақты мүмкіндік туғызғанын көреміз. Сондай-ақ шаһарда ежелгі сәулет нысандары да өзінің айшықтығымен көзге түседі. Мәселен, құрылысына бірде-бір шегесіз бағаналарды қиып, қашап қиюластырған және әсем оймыш, нәзік өрнектермен безендірілген, мұнарасының биіктігі 19 метр Жаркент мешіті 1892-1895 жылдары салынса, бүгінгі ұрпаққа ол дініміздің беріктігі өткен ғасырлардан тамыр тартқанын айғақтап, ізгі ерекшелігімен танылып тұр.
Дана халқымыз: «Елу жылда – ел жаңа», деген ғой.
1928 жылдан аудан орталығы атанған Жаркент шаһары Тәуелсіздігіміздің 20 жылдығы қарсаңында танымастай түрленіп, сәулеттене түсуде. Ұлы Отан соғысы кезінде осы жерден шыққан сегіз бірдей қыранның Кеңес Одағының Батыры атанғаны халық үшін үлкен мерей. Бейбіт еңбектегі берекеге негіз болған, ұтымды ұйымдастырушы екі мәрте Еңбек Ері Николай Головацкийдің атақ-даңқы жерлестер мақтанышы. Сонымен қатар, жылқышы Беркінбай Сайназаров, шопан Айтбала Абданова, жүгерішілер Күләш Айтжанова, Мәриям Ниязова, Адалят Зайналдинова, Әлімжан Бақтаев туған жердің ырыс-берекесін арттыруда еңбектің тамаша үлгісі бола білді.
«Ерлік елге мұра, ұрпаққа – ұран» дегендей тәуелсіздікті аңсап, кешегі желтоқсан көтерілісінде намыс отын жағып, әділдік үшін жанын қиған Ербол Сыпатаев пен Ләззат Асанова жаркенттіктердің ерлік дәстүрінің
![011211-37](http://old.egemen.kz/2011img/011211-37.jpg)
жалғастығын паш етеді. Қаланың қақ төрінде қос қаһарманға орнатылған еңселі ескерткіш бүгінгі ұрпаққа үлгі-өнеге болса, жастар олардың рухына тағзым етеді.
Халықтың әлеуметтік жағдайын жақсартуда да ауқымды шаралар ұйымдастырылған. Биыл шаһардағы бес көше жөндеуден өтсе, 15922 шаршы метр тұрғын үй салынып, халықтың әлеуметтік жағдайы жақсара түскен. Жаркенттіктер өткен мерзімде ауыл шаруашылығы саласында өнім көлемін 10 млрд. 948,8 млн. теңгеге жеткізсе, өнеркәсібі де қалыпты даму бағытында екенін көреміз. Соңғы жылдары ғана шаһарда бірнеше іргелі өнеркәсіп орындары салынып, жұмыссыздық мәселесі шешімін тауып келеді. Мәселен, қаладағы жүгері дәнінен сірне, крахмал және басқа да өнім шығаратын зауыт, «Мал өнімдері» кәсіпорны, қап шығаратын цех, тағы басқа да нысандардың салынып, пайдалануға берілуі аудан орталығындағы тіршілік қазанын қайната түсті. Шаһар жұртшылығы енді «Жетіген-Қорғас» темір жолы, «Алтынкөл» және басқа да стансалар мен «Достық» гидроузелі, «Қорғас» шекара маңы ынтымақтастығы халықаралық орталығы және тағы басқа құрылыс нысандарының тәуелсіздік тойы қарсаңында ашылуын асыға күтуде. Бұл жаңалық халықтың тіршілігіне оң өзгеріс әкелетіні сөзсіз.
Жаркентте «Жұмыспен қамту-2020» бағдарламасымен 125 тұрғын үй құрылысын бастау жоспарланған. Шаһарда жеке үйлерге арналған инженерлік-коммуникациялық инфрақұрлымды дамыту және орналастыру мәселесі де өз шешімін тапқан. Мұнда сондай-ақ атамекеніне арман арқалап жеткен мыңға жуық мүшесі бар 244 оралман отбасының осы мекенге балдай батып, судай сіңуі үшін әкімдік тарапынан барлық жағдай жасалған. Осыны ұғынып, түсінген олар да өмірдің тізгінін қолдарына алып, еселі еңбек етуде.
![011211-35](http://old.egemen.kz/2011img/011211-351.jpg)
Ауданда Елбасы Нұрсұлтан Назарбаевтың Қазақстан халқына арнаған биылғы дәстүрлі Жолдауынан туындайтын міндеттерді жүзеге асыру мақсатындағы жұмыстар жалғасын тапқан. Мәселен, Өсек өзенінің жоғарғы жағынан ГЭС салу, осы жерден су жүйесін тарту арқылы Жаркент және 30 мың халқы болатын Қорғас қаласы мен тағы басқа елді мекендерді таза ауыз сумен қамтамасыз ету мәселесі күн тәртібіндегі негізгі міндет. «Қорғас» халықаралық шекара маңы сауда орталығының құрылысына байланысты алда үлкен инвестициялық мүмкіндіктер бар екенін де айта кеткен жөн. Аудан аумағында еркін экономикалық аймақтың құрылуы, Батыс Қазақстаннан көрші ел – Қытайға келетін газ құбырларын тарту жобасының жоспарлануы, Іле бойы жағалауындағы Құндызды және Сарпылдақ учаскелерінде мұнай және газ көздерін анықтау бойынша барлау жұмыстарының басталуы, біріншіден, Жаркент жерінің келешекте әлеуметтік-экономикалық жағдайының тез өзгеруіне өз ықпалын тигізетіні анық. Екінші жағынан бұл шаһар халқына үлкен жауапкершілік жүктейді.
Иә, жаңарған Жаркент жеріндегі бүгінгі және ертеңгі жалғасатын жұмыстар тәуелсіздігімізбен бірге келген құндылықтар екені даусыз. Осылайша елімізге игілік, береке мен байлық әкелетін үрдістердің ел мерейімен сабақтас екенін мақтанышпен қабылдаған қала халқы оған өздерінің қарымды қабілеттерімен үлес қосуға ұмтылуда.
Арнайы бетті дайындаған «Егемен Қазақстан» газетінің Алматы облысындағы меншікті тілшісі Күмісжан БАЙЖАН.