Астана қаласында «Болашақ энергиясы» ұранымен өткен ЭКСПО-2017 халықаралық мамандандырылған көрмесі Маңғыстауда инвестиция тарту, технологиялық жаңару және қолда бар мүмкіндіктерді пайдалануға серпін берді. Тұрақты қуат көздерін жұртшылық назарына ұсыну мақсатындағы бастама Маңғыстаудың табиғи мүмкіндігімен сай келіп, өңірде «жасыл экономика» бағдарламасы бойынша бірнеше жобаны жүзеге асыру жоспарланды. Түпқараған ауданының Ақшұқыр ауылынан қуаттылығы 5МВт жел электр стансасын және қуаттылығы 42МВт жел электр стансасын салу, Қарақия ауданындағы тәулігіне 50 000 текше метр су тазалайтын тұзсыздандыру зауыты құрылысы, «МАЭК-ҚазАтомпром» ЖШС аумағынан сыйымдылығы 250 МВт құрама циклдағы зауыт салу сынды маңызды жобалар сараланды. Солардың бірі Маңғыстау ауданының орталығы Шетпе ауылынан және Мұнайлы ауданының Батыр ауылынан күн электр стансасын салу болатын. Мамырдағы достық, бірлік мерекесі аясында Батыр ауылындағы жобаның тұсауы кесілді. Күн сәулесінен 2 Мвт электр қуатын алатын стансаның жалпы ауданы – 36,05 га болса, жоба құны – 1,2 млрд теңге. «Бизнестің жол картасы-2020» бизнесті қолдау және дамыту бағдарламасы арқылы қаржыландырылған жоба отандық өндірістегі күн батареяларында жұмыс істейтін тұңғыш электр стансасы болуымен де маңызды. Электр стансасын пайдалану үшін орнатылған 8580 күн панельдері Қазақстанда және отандық кремнийден өндірілген, яғни отандық өнім. Жаңа қондырғы арқылы 300-ге жуық үй таза электрмен қамтамасыз етілетін болады.
Мереке аясында Маңғыстауда тағы бір маңызды жобаның іргетасы қаланып, құрылыс жұмыстарына бастама берілді. Бұл – Құрық ауылындағы теңіз суын тұшытатын зауыт құрылысы. Құны 39 млрд теңге деп есептелген және тәулігіне 50 000 текше метр су өңдеу қуаттылығымен жұмыс жасайды деп межеленген зауыт жеке инвесторлардың қаражатымен салынады. 2020 жылы құрылыс жұмыстары аяқталып, іске қосылады деп жоспарланған зауыт құрылысына 300 адам жұмысқа тартылса, пайдалануға берілген соң 150 адам жұмыспен қамтылады.
– Құрық ауылында теңіз суын тұшыту зауытының жобалау-іздестіру және құрылыс жұмысы басталуы облыс үшін маңызды оқиға. Бұл арқылы біз Ақтау, Жаңаөзен, Жетібай, Мұнайшы, Құрық, Шетпе елді мекендерін ауыз сумен қамтамасыз ету және ауыл шаруашылығы саласын дамыту мәселесін толықтай шешуге қол жеткізетін боламыз, – деді аймақ басшысы Ералы Тоғжанов.
Гүлайым ШЫНТЕМІРҚЫЗЫ,
«Егемен Қазқстан»
Маңғыстау облысы
