![091211-10](http://old.egemen.kz/2011img/091211-10.jpg)
Қазақстан Республикасының Президенті Н.Ә.Назарбаевтың республика Парламенті мен Үкіметінің бірлескен салтанатты мәжілісінде сөйлеген сөзінен.
1997 жыл, 10 желтоқсан.
НАЗАРБАЕВ СЫЙЛЫҒЫ
немесе Азаттықтың қазақстандық ескерткіші
1994 жыл. 6 шілде күні Жоғарғы Кеңестің кезектен тыс жалпы отырысы өткізіледі. Оған Президент Назарбаев қатысады. Депутаттар түгел болуы тиіс. Каникул содан соң... Елге әне-міне қайтамыз деп жүргенде жүдә, сонша не боп қалды екен?.. Президенттің сессияға қатысуы жаңалық емес қой. Ол кісі отырыстарда жиі болатын. Кейбір мәселе бойынша айтыс-тартыс ширыға шиеленісіп, тұйыққа тірелгендей тұстарда барша жайды байыппен талдап, түйіндерді түйткілсіз шешіп тастайтын. Заң жобаларын талқылау барысына мейлінше сергек қарап, нендей бір пайдалы идея қылаң берсе, жедел қолдау білдіретін... Бәлкім, бұл жолы күннен-күнге тереңдеп келе жатқан экономикалық реформаға байланысты кезек күттірмес бір мәселені заңмен жүйелеу үшін алға тартар? Онда алдын-ала жасалған жоба қолға тиюі керек қой. Ол жоқ... Әрқайсымыз осындай әртүрлі, қайда бұрсаң да тұйыққа тіреле берер долбарлар жасағанымызбен әңгіме мүлде басқаша болып шықты. Күн тәртібіне тым тосын да батыл мәселе қойылды: Мемлекет астанасын Алматыдан Ақмола қаласына көшіру туралы... Әуелгі әзірде дауыл алдындағыдай тылсым тыныштық орнай қалса да аздан кейін «Ау, дағдарыстан дағдарып отырған елдің жағдайы болса мынау. Бұл не сонда?.. Қызық үшін айтылар қияли әңгіме ме?.. Новый «кремлевский мечтатель» появился, что ли?..» дегендей күбір-күңкіл күмбезді залды кернесе, әлі айтылмай, ағытылмай жатқан сөз де ұшы-қиырсыз секілденді. – Мен сіздерге өзім он ойланып, жүз толғанған толғақты мәселемен келіп отырмын. – Сөзін осылай бастаған Президент өз пайымдауларын, уәждарын, болжамдарын баяндай бастағанда алғашқыда әр сананы сағалаған сан-сапалақ ой-пікірлердің бірі-бірін кесіп түсердей қиғаштық қырлары жұқарып, жұмсарып, алқын-жалқын көңілдер де сабадан саябыр тапқандай хал бірте-бірте айқындала түсті. Елбасының айтуынша, Алматы аумағы алып Қазақстанның бір бүйіріне әрі шетелдерге тым жақын орналасқан. Оның үстіне қала рабайсыз, жөн-жосықсыз далиып өсіп, жаңа заман, жас мемлекетке лайық аса сәулетті ғимараттар тұрғызып, кең көшелер тартуға да таршылық етеді. Экологиялық ахуалы да аса ауыр... Ал, Ақмола болса, елдің қақ ортасына орналасқан, тоғыз жолдың торабы. Алдын-ала 32 параметр бойынша жасалған зерттеулер нәтижесінде астана болу талаптарына толық жауап беретіні анықталып отыр. Географиялық жағынан ғана емес, елдің геосаяси, экономикалық мүдделеріне де сай келеді. Негізінен инвестиция тарту арқылы салынатын жаңа елорда халықтың республика аумағына біркелкі қоныстануына да жағымды ықпал жасайды... «Біркелкі қоныстану...» Асылы, ел басқарған қайбір саясаткер де қолында керемет құдірет бола тұра турасынан аттап емес, абайлап айналып өтуге мәжбүр болатын бөгесіндер көп болады-ау тәрізі. Ішкі, сыртқы шетін жағдайлар туралы айтпағын ашықтан-ашық жайып салмастан ишарамен, емеурінмен жеткізуге итермелей ме, қалай... Әйтпесе, әлгі жатық та жуастау сөздердің астарындағы ащы шындықтарды – отаршыл саясаттың салдарынан, әсіресе, теріскей облыстарда қазақтың үлес салмағы күрт азайып кеткенін, кей жерлерде барының өзі ұлттық рухани болмыс-келбетінен айырыла бастағанын, осы өрескел көріністі жөнге келтіруге, көпшілігі оңтүстік белдеуде шоғырланған қандастарымызды бар аймаққа біркелкі жайластыруға астананың Алатауда емес, Арқада болуы шешуші ықпал жасайды, басты мақсаттың бірі де осы деп дәл қазір ашып айтып көрсінші... Мына залда шығатын шулыған сөз бе, ел ішінде, әр қадамымызды аңдып отырған, «орыс тілділердің бәрі отандасымыз, олардың мүддесін қандай жолмен болса да қорғаймыз!» деп дабыл қақпаса да даңғазасы күнде құлақ тұндырып жатқан алып көршінің қабағынан қар жауса қалай болмақ? Есіл мен Ертістің, Жайықтың жағасынан мезгіл-мезгіл естіліп қалатын арандатқыш қоқан-лоққыға қарамастан негізінен негізгі ұлттың ақ пейілдігі мен Елбасының сарабдал ақыл-парасатының арқасында сақталып отырған елішілік ынтымақтың, түптеп келгенде, тәуелсіздіктің тағдыры талқыға түсіп кетпей ме?.. Кім қалай шабаланса да шындықтың дәмі удай еді, демографиялық ахуалымыз аяныштылау еді. Солтүстік аймақтарда өзім көрген бір жайлар еріксіз еске түсті. 60-шы жылдардың аяқ кезінде Қазақ радиосының тілшісі ретінде Целиноград облысының «Новорыбинский» кеңшарына барып, басшыларынан сөзін жазып алатын бір озат қазақты атауын сұрағанымда олар бөлімшелердің біреуінде біреудің бар екенін әрең еске түсірген. Онда да аты-жөнін білместен «скотник» дей салған. Оңтүстіктен барған маған сонда алғаш рет «Қазақсыз да Қазақстан болады екен-ау!» деген сұмдық бір ой түскен... ...Президенттің әлгі «біркелкі қоныстану» деген астары аса қалың сөзі еріксіз шомуға себеп болған ойды қызу басталған депутаттар талқысы бөліп жіберді. Жақтап та жатыр, қарсылар қарасы да аз емес. Жақтаушылар Президенттің осынау тарихи ұсынысына бүгінгі күннің ғана тұрғысынан, жағдаятынан қарау қате, елдің ертеңін, тіпті, алыс болашағын жан-жақты ойлау қажет десе, екінші жақтың алдымен алға тартары – экономикалық, қаржылық терең дағдарыс, әлеуметтік сілкіністер туғызарлықтай ауыртпалықтар... Ақыры, пікірлер біршама айқындалып, астананы Алматыдан Ақмолаға көшіру жайы дауысқа салынды. Аз ғана басымдықпен мақұлданған қаулы, былайша айтқанда, болашақ Астананың тууы туралы куәлігі қабылданды. Ертеңіне бейресми дейтін басылымдардың көкайылдау біреуі «Жоғарғы Кеңес астананы Алматыдан Ақмолаға көшіру туралы ұсынысын қолдап Президент Назарбаевқа оның туған күніне орай сыйлық ұсынды» деп мысқылдай, қыжырта жазды. Расы керек, өз басым жас кезден-ақ Ленин, Сталиннің туған күндерін білсем де тұңғыш Елбасымыздың туған күнінен бейхабар екенмін. Қалай болғанда да ұсынысын жақтап, дауыс бердім... 24 қараша 2011 жыл. Қазақстан. Астана. Есілдің жағасы. Алты-жеті жыл бұрын астанадағы қызметті тәмәмдап туған өлкеге оралғалы бері Талас бойындағы Таразда жүрсем Есіл бойындағы Астананы сағынатын әдет пайда болған. Бұл жолы да сол сағыныш алдыма түсіп Астанаға алып келген. Бір-біріне ұқсамайтын, сәулет-салтанаты бір-бірінен асып түсетін ғимараттар еріксіз таңдандырды. Ақорда, Парламент, министрліктер ғимараттары, «Бәйтерек», Пирамида... Триумф секілді тұтас тұрғын үйлер кешені, «Хан шатыр», алтынмен апталған күмбезі күнге шағылысқан, рухани тазалықтың сыртқы бейнесіндей әппақ зәулім мешіт, кең де кербез көшелер... Жә, қайсы бірін айтып тауысарсың. Ал, Есілдің оң жағалауы... Сәні мен салтанаты жарасқан сәулет туындысы! Жалғыз бұл ма. Президенттің бұдан он жеті жыл бұрын Жоғарғы Кеңесте жаңа астанаға қатысты айтқан уәж-болжамдарының барлығы да бүгінде айна-қатесіз ақиқатқа айналғанын көріп, ертеңгі күнге сенімің кәміл бола отырып, қазірде әлемдегі ең бір беделді басшыға айналған Елбасының даналығына, көрегендігіне, туған халқының көсегесін көгертуге жұмсап жүрген орасан қажыр-қайратына қайран қаласың, тәнті боласың... Көз алдыма Американың «Азаттық статуясы» елестеді. Сонау жылы соған қарап отырғандағы өзіміздің елде де Азаттығымызға ғажайып бір ескерткіш орнатылса-ау деген арман мен үміттің қоспасы ойға оралды. Ескерткіш... Тоқтай қал... Ау, мына Астанамыздың өзі біздегі Азаттықтың ескерткіші емес пе?! Әрине, солай! Нұрсұлтан Назарбаевтың бастауымен, халқымыздың қолдауымен, қазақ жастарының құрыш қолымен дүниеге келген мәңгілік ескерткіш!.. Осындай ой толқыны кенет тағы да өткенге ойысып кетті: Құдай-ау, сонау 1994 жылғы 6 шілдеде біз, депутаттар, Назарбаевқа емес, қайта керісінше, Назарбаев біз арқылы Қазақстан халқына сыйлық жасапты ғой, асқақ Астана сыйлапты ғой! Мың да бір рахмет!.. Арғынбай БЕКБОСЫН, Қазақстан Республикасы бұрынғы Жоғарғы Кеңесінің және тұңғыш Парламент депутаты. АСТАНА – ТАРАЗ. _____________Дерек пен дәйек
* 1961.20.03 – Ақмола қаласының атауы Целиноград болып өзгертілді. * 1994.06.06 – Целиноград қаласына ежелгі тарихи атауы – Ақмола аты қайтарылды. * 1998.06.05 – Қазақстан Республикасы Президентінің «Қазақстан Республикасының астанасы – Ақмола қаласын Қазақстан Республикасының астанасы – Астана қаласы деп қайта атау туралы» Жарлығы шықты. * 1999.16.07 – ЮНЕСКО шешімімен Астана қаласы – «Бейбітшілік қаласы» деген құрметті атаққа ие болды. * 2011.30.03 – Халықаралық астаналар және ірі қалалар ассамблеясының бастауымен өткізілген «ТМД және ЕурАзЭҚ-тің үздік қаласы» атты ІІІ халықаралық қалалық тәжірибелер байқау конкурсында Астана қаласы 81 қаланың ішінен үздік шығып, жеңімпаз атанды. * 2011.01.10 – Астана қаласы халқының саны ағымдағы есеп бойынша 730 804 адамды құрады. * 2011.01.10 – Астана қаласында қаңтар-қыркүйек айлары аралығында 13 309 сәби дүниеге келді. Өткен жылдың сәйкес кезеңімен салыстырғанда бала туу 2,7 пайызға артты. * 2002.30.08 – «Бәйтерек» монументі ашылды. Оның жалпы биіктігі 35 қабат үймен тең. Темірден жасалған жалпы діңінің биіктігі – 105 метр, салмағы – 1 мың тоннадан астам. * 2008.06.07 – елордада «Қазақ елі» монументі ашылды. Ескерткіштің биіктігі – 91 метр. Бұл тәуелсіздіктің тұсауын кескен жыл болып табылады. Монументтің жалпы аумағы 5,2 гектар жерді алып жатыр. * 2007 жылы желтоқсан айында бас қаладағы Тәуелсіздік сарайының іргетасы қаланды. Оның жалпы аумағы 18 мың шаршы метрді құрайды. Бұл көлемінің үлкендігі жағынан Еуропа мемлекеттері бойынша 4-ші ғимарат болып саналады. * 2006.01.09 – Бейбітшілік және келісім сарайының тұсауы кесілді. Пирамиданың биіктігі – 62 метр. Архитекторы – әйгілі сәулетші Норман Фостер.* * *
ТАРИХИ ТАҢДАУ ОСЫЛАЙ БАСТАЛҒАН ЕДІ
Осыдан тура он жеті жыл бұрын, 1994 жылдың 6 шілдесінде Елбасы және елорда деген егіз ұғым алғаш рет тарих сахнасына шығып, қазақ санасында мәңгілік салтанат құрды. Дәл сол күні тұңғыш Президентіміз Нұрсұлтан Назарбаев Парламент сессиясының жалпы отырысында елорданы Алматыдан республиканың орталық өңірі Ақмолаға көшіру жөніндегі тарихи идеясын паш етті. «Астананы көшіру идеясына белді біржолата бекем буа тұрып, мен ортаға бәрін салатынымды, яғни өзімнің саяси мансабымды, тіпті, мүмкін, өмірімді бәйгеге тігетінімді сөз жоқ түсіндім», дейді Елбасы «Еуразия жүрегінде» атты еңбегінде сол күндер туралы толғана тебіреніп.1994 жыл, 6 шілде.
Астана Алматыдан Ақмолаға көшетін болды. Президенттің таңдауы, Парламенттің шешімі осындай. «...Бүгін Парламенттің пленарлық мәжілісі өтті. Депутаттар күн тәртібін бекітіп, менің Астананы көшіру туралы баяндамамды тыңдады. Парламентарийлердің көптеген сұрақтарына жауап қайтардым. Мәселе талқыланғаннан кейін тарихи шешім қабылданды. Астананы Алматыдан Ақмолаға көшіру туралы ұсынысым, сөйтіп қолдау тапты».Президент Н.Назарбаевтың Жоғарғы Кеңес сессиясында жасаған баяндамасынан.
Иә, Елбасының ерен ерік-жігерінің арқасында Қазақ елі тарихының шежіресіне алтын әріптермен жазылған ұлы бастама бастау алды. Ғасыр соңында қалыптасқан ел өміріндегі күрделі қиындықтарға қарамастан Қазақ елі тарихи таңдауын жасап, егемен елдің жаңа елордасының іргетасын қалау жолындағы қажырлы жұмысқа кірісіп кетті. Тоқырау заманынан қалған кіреукелі тоң жібімей тұрып, жас Тәуелсіз Қазақстан болашаққа деген берік үмітін үкілеп, бір сенім, бір күдікпен ғасыр жобасын іс жүзіне асырып, үшінші мыңжылдықтың жұлдызды мегаполисін тұрғызу міндетін қолға алды.1994 жыл, 2 қыркүйек
«Иә, астананы ауыстыру оңай шаруа емес, бұл саяси мәні зор, үлкен мерзімде жүзеге асар күрделі шаруа. Ал енді қаржы жағына келетін болсақ, халық бар, халық сайлаған Парламент бар, өздері шешеді. Қай қаржыға, қашан және қалай салынатынын да халықтың өз билігіне қалдырғанымыз жөн шығар. Бір білетінім – жаңа астана бүгінгі сіңірін сорып отырған елдің есебінен емес, ертеңгі өрісті, ырысты күндердің есебінен болашақта атқарылатынына сенемін. Түптің түбі ондай ресурстар республикада болуы тиіс қой...Президент Н.Назарбаевтың «Егемен Қазақстан» газетіне берген сұхбатынан.
1995 жыл, 15 қыркүйек
Қазақстан Республикасы Президентінің «Қазақстан Республикасының астанасы туралы» заң күші бар Жарлығы жарияланды.1996 жыл, 27 желтоқсан
«Астананы көшірудің алғашқы кезеңінде 3700 пәтер қажет. Оның ішінде үйлері бұзылатын ақмолалықтар да осының есебінен пәтер алуға тиіс. Тұрғын үйлердің бірінші қабаттарын бизнесмендерге беруді кешіктірмеу керек. Өйткені, олар үйлерің алғашқы қабаттарын қазіргі сәулеткерлік салтанатына сәйкес тиісті түрде безендіріп үлгереді. Ақмоланы көріктендіру мақсатында жаңа гүлзарлар, фонтандар, ескерткіштер, тағы басқа шағын сәулет өнерінің туындыларын жасау қажет. Құрылысты ұлғайтқан кезде қазір өсіп тұрған жасыл алаңдарды сақтап қалудың қажеттігі зор.Президент Нұрсұлтан Назарбаевтың Ақмолада өткен кеңесте сөйлеген сөзінен.
1997 жыл, 20 қазан
Қазақстан Республикасы Президентінің «Ақмола қаласын Қазақстан Республикасының астанасы деп жариялау туралы» Жарлығы жарияланды. Онда Ақмола қаласы 1997 жылдың 10 желтоқсанынан бастап Қазақстан Республикасының астанасы болып бекітілді. Ақмола қаласының Қазақстан Республикасының астанасы ретіндегі ресми тұсаукесері 1998 жылдың 10 маусымында өткізілетін болды. Сөйтіп, Ақмола қаласында тәуелсіз Қазақстанның елордасын құру жөніндегі қауырт та тарихи жұмыстар басталды.1997 жыл, 8 қараша
Тәуелсіз мемлекеттің рәміздері Ақмолаға жеткізілді «... Бүгін жаңа астанаға көгілдір Туымыз, Елтаңбамыз, басқа да белгілеріміз жеткізілді. Ол – біздің мемлекеттігіміздің, Тәуелсіздігіміздің рәміздері. Қазірдің өзінде Ақмолада мемлекеттік басқару органдары өз жұмысын бастап кетті. Бір сөзбен айтқанда, Ақмола еліміздің басты қаласына айналды, енді ең жауапты шешімдердің бәрі осы жерде қабылданады».Президент Н.Назарбаевтың Ақмолаға Қазақстанның мемлекеттік рәміздерін жеткізген салтанатты жиында сөйлеген сөзінен.
1998 жыл, 21 қаңтар
Ата-бабаларымыздың қанымен қорғап, аманат еткен қасиетті мекені «...Ең басты оқиға – тәуелсіз елдің астанасы Алматыдан Ақмолаға қоныс аударды. Сөз жоқ, осынау үлкенді-кішілі жұмыстарда мемлекеттік аппараттың атқаратын рөлі орасан зор. Жаңа астананы абаттандыру жұмысы жалғасып, маусымның 10-да дүние жүзіне астананы таныстырудың рәсімі өткізіледі. Жаңа астана Ақмолада жүріп жікшілдікке, рушылдыққа, тамыр-таныстыққа бөлінбеулерін қатаң талап етемін. Бұл да өзіміздің ата-бабаларымыздың қанымен, жанымен қорғап, бізге аманат етіп тастап кеткен қазақтың жері. Үйреніп, үйлесімді жұмыс істейтін мезгіл жетті...».Мемлекет басшысының Қазақстан Республикасы Президенті Әкімшілігінің, Үкімет пен Парламент аппараттары қызметкерлерінің Ақмолада өткен бірлескен кеңесінде сөйлеген сөзінен.
1998 жыл, 6 мамыр
Бас қала – Астана қаласы атанды Ғасыр тоғысындағы осы бір тарихи күнде Қазақстан Республикасы Президентінің «Қазақстан Республикасының астанасы – Ақмола қаласын Қазақстан Республикасының астанасы – Астана қаласы деп қайта атау туралы» Жарлығы шықты. Сол күннен бастап төрткүл дүниені түгел таңдандырған Тәуелсіз Қазақстанның бас қаласы – Астананың ғасырлардан ғасырларға ұласатын ұлы тарихи шежіресі басталды. Иә, заманауи реформатор, Тұңғыш Президентіміз Нұрсұлтан Назарбаевтың ерен ерік-жігерімен өмірге келген ғасыр жобасы, Елбасының төл перзенті – Астана қаласының шежіресі осылай басталған еді. _____________________________АСТАНА ӘЛЕМ НАЗАРЫНДА
Мемлекет қайраткерлері мен саясаткерлердің елорда туралы пікірлері
Дмитрий МЕДВЕДЕВ, Ресей президенті: Осы жерде тура көз алдымызда елдің жаңа бет-бейнесі қалыптасып келеді және қазіргі заманғы тарихы жазылып жатыр... Сөз жоқ, мұндай елеулі көрсеткіштердің арғы жағынан Қазақстан халқының зор еңбегі бой көтереді. Және, әлбетте, оның Көшбасшысы – Президент Нұрсұлтан Әбішұлы Назарбаевтың қажыр-қайраты тұр. Біз оның бұл қалаға тек күш-жігерін жұмсап қана қоймай, жанын салғанын білеміз. Бүгін Астананы оның бел баласы, орасан жетістігі және даусыз мақтанышы деп батыл айтуға болады. Абдулла ГҮЛ, Түркия президенті: Астана – аймақтағы және бүкіл әлемдегі бейбітшілік, төзімділік, келісім мен тұрақтылық жағдайында мемлекетті дамытудың тамаша көрінісі. Астана Нұрсұлтан Назарбаевтың көрегендігінен туған өнер туындысы екендігіне еш күмән жоқ. Осы жерде тұрып қана ел мен бүкіл Еуразияның жүрек соғысын сезіне аласыз. Ильхам ӘЛИЕВ, Әзербайжан Республикасының президенті: Мен жаңа Астананы көрдім. Мені құрылыстың қарқыны, адам қолымен сомдалып жатқан сұлулық қайран қалдырды. Бұған Президент Нұрсұлтан Назарбаевтың сіңірген еңбегі орасан зор, ол күллі қазақ халқының күш-жігерін жұмылдырып, іс жүзінде жаңа қала, жаңа астана орнатты. Біз бір-бірімізге жақын, туысқан елдерміз, халықтармыз. Біз сіздердің табыстарыңызға әрдайым қуанамыз. Қазақстан халқына тың табыстар, бейбіт өмір және мол игілік тілегім келеді. Махатхир МОХАММАД, Малайзияның бұрынғы премьер-министрі: Жаңа елорда, сөз жоқ, мемлекет экономикасының тұрақтылығы мен даму факторларының бірі. Мен бүгінгі күні табыспен жүзеге асқан өте батыл саяси шешімі үшін Қазақстан Президенті Нұрсұлтан Назарбаевқа қайран қаламын. Сіздердің жаңа елордаларыңыз – Қазақстанның болашағы. Астана әрқашан әлемнің ең әдемі қалаларының бірі болғанын, ал Қазақстанның гүлденген елге айналғанын тілеймін. Михаил СААКАШВИЛИ, Грузия президенті: Астананы көріп, мен қайран қалдым. Астана – бұл жазық даланың төсінде бой көтерген ғажайып қала ғана емес, бұл саяси күш-жігердің жүзеге асқан символы. Бұл болашақты болжай білген саяси батыл қадам. Федерико МАЙОР, ЮНЕСКО-ның бұрынғы бас хатшысы: Егемен Қазақстанның елордасын Алматыдан Астанаға көшірген кезден бастап екі жыл ішінде Қазақстан Президенті Нұрсұлтан Назарбаев, Астана муниципалитеті ғылымның, мәдениеттің және білім берудің орталығы ретіндегі мемлекеттің жаңа елордасының қалыптасуы мен салынуына зор күш-жігер жұмсады. Астана жас мемлекет – Қазақстан Республикасы тәуелсіздігінің нышанына айналды. Кисе КУРОКАВА, Жапон сәулетшісі: Алдына нақты мақсат қойған ел ғана табысқа жетеді. Сол себепті, Президент Нұрсұлтан Назарбаевты көреген саясаткер дер едім. Біз Президентпен Астананы жобалау мәселесі жөнінде заманауи сәулеттің жергілікті дәстүрге лайықталуы туралы көп ақылдастық. Бірде, біздің әңгімеміз үш сағатқа дейін созылды. Президент әңгімелесіп отырған адамының пікірін мұқият әрі зейін қойып тыңдай біледі, сондай-ақ батыл шешім қабылдай алады. Меніңше, өзім кездесіп жүрген түрлі ел басшыларының арасында Президент Назарбаев – жарқын тұлға. Левани УЧАНИЕШВИЛИ, Голливудта қызмет атқаратын грузин актері, режиссер: Ертегі әрі фантастика деп Қазақстанның жаңа Астанасы жайлы айтуға болады. Аз жыл ішінде кең далаға мұндай қала салу таңғаларлық жағдай! Бұл дегенің болашақтың қаласы, басқа да галактикадан қонақтарды қарсы алатын қала. Мен сіздердің Президенттеріңіз Нұрсұлтан Назарбаевқа және Үкімет басшыларына, мұндай таңғаларлықтай жаңа Астананы салуға қолдау көрсеткен басқа да адамдарға шынайы рахметімді айтқым келеді. Біз өзімізбен бірге Астананың ертегідей бейнесінен алған әсерімізді алып кетіп бара жатырмыз. Және біз осы ертегідей жерге тағы келуге құштар екенімізді жасырмаймыз. Егор КОНЧАЛОВСКИЙ, режиссер. Кеңес тұсындағы Целиноград менің есімде жоқ. Бірақ мен Астана елорда болысымен онда болғаным бар. Содан бері Астанаға жиі барамын. Әрбір жолым түскен сайын гүлденген көркем қаланың келбетін көремін. Қазақстанның басшылығы тарапынан, бірінші кезекте, Президент Нұрсұлтан Назарбаевтың өз тарапынан қаланы көркейту жолында ұлан-ғайыр жұмыстар атқарылды. Шаһар құрылысындағы қазақтардың еңбекқорлығы мен жұмыстарының ауқымдылығы таңғалдырмай қоймайды. Сөз жоқ, Астананың қазіргі келбеті орасан бейнеттің арқасында келді. Ендеше болашақ ұрпақ соны бағалай білсе керек-ті! _______________________________![091211-26](http://old.egemen.kz/2011img/091211-26.jpg)
КҮШ АУҒАН ЖАҚҚА БАҚ АУАДЫ
Еңселі елордамыз күн санап көркейіп келе жатқаны баршамызға белгілі. Қазіргі таңда әлемге танылып үлгерген жас Астананың қаншама маңызды ірі басқосуларды өткізіп, дүйім жұртты аз ғана уақыттың ішінде өзіне тамсандырып жатқанына біз қашанда қуанамыз. Астанаға арман қуып келіп, мақсатына талпынған біздердің ару қалаға деген ықыласымыз тіптен ерекше. Ес білгелі алдыма тіс дәрігері болсам деп мақсат қойған едім. 1998 жылы Жамбыл облысы, Шу ауданындағы бұрынғы «Коммунизм» совхозында Қ.Сәтбаев атындағы қазақ орта мектебін бітіре салысымен, облыс орталығы Тараз қаласындағы медицина колледжіне түсіп, ортапед-тіс технигі мамандығы бойынша өмірге жолдама алдым. Алайда мамандығыма деген құштарлық мені Алматыдағы Санжар Асфендияров атындағы медицина университетіне жетеледі. Сөйтіп, аталған университеттен тіс дәрігері мамандығын алып шыққан менің алғашқы еңбек жолым Тараз қаласындағы «ДиАл» тіс емханасында басталған-ды. Осы кездері мені үлкен қалада тәжірибелер алмасып, біліктілігімді жетілдіре түссем деген ой жиі мазалады. Алдымда екі таңдау тұрды. Біріншісі өзім бес жыл бойы білім нәрімен сусындап, дос арттырған әсем Алматы, ал екіншісі еліміздің жүрегі Астана болды. Мен мінген тәуекелдің желқайығы болашақтың қаласы Астанаға бет алды. «Көрмеген жердің ой-шұқыры көп», демекші алғашқы кездерде аздаған қиыншылықтар кездескені рас. Бірақ мұның барлығы да уақытша екенін түсініп, алға қойған мақсаттар жолында жұмысымды жалғастыра бердім. 2007 жылы елордадағы «7 карат» тіс емханасына жұмысқа орналастым. Мұнда да біраз тәжірибе жинақтаған соң былтырдан бастап « Ел Деnt» тіс емханасында жемісті еңбек етудемін. Бұйыртса, алдағы уақытта өзімнің жекеменшік тіс емханасын ашуға ниеттену үстіндемін. «Көрінген таудың алыстығы жоқ» дегендей, ол күнге де жетеріме сенім мол. Мамандығыма деген адал ниетім Астананың азаматы болып қала беруіме өз септігін тигізді. Мен бұған қашанда шүкіршілік деймін. Ипотекамен үй алып баспаналы болдым. Үйленіп, әке болу бақытын сезіну де Астанада бұйырыпты. Сол үшін де астаналықпын деп мен қай кезде де мақтанышпен айтып отырудан жалықпаймын. Отбасы бақыты мен сүйікті кәсібіңнен алған ләззаттың орнын ешнәрсе де толтыра алмасы анық. Оған емделушілерден естіген жылы сөздерімді қосыңыз. Осындай бақытты сәттерді бастан өткеріп жатқаным үшін Астанаға алғысым шексіз. Әрине, бұл ретте Елбасының ерен еңбегін қанша рет қайталап айтсақ та артық болмайды.Алдағы келе жатқан айтулы мереке – ел Тәуелсіздігінің 20 жылдық торқалы тойына орай болып жатқан дайындықтың арқасында бүгінде Астана барлық жағынан да құлпырып тұр. Оны көрген менің кеудемді шаттық кернейді. Астанаға деген шексіз сүйіспеншілігім арта түседі. Рахмет саған, Астана!
Абдуахид ҚОСПАНОВ, тіс дәрігері, Астана тұрғыны.
_____________________________ТӘУЕЛСІЗДІКТІҢ ТӨЛ ШАҺАРЫ
Әр нәрсенің салмағын салыстыра отырып саралайсың. Бүгінгі Астана мен кешегі Ақмола туралы ойласам, арасы жер мен көктей. Бұдан 60 жыл бұрынғы 1950 жылдардың басындағы Ақмола қаласының бет-бейнесін көз алдыма елестететін болсам, аты бар да заты жоқ болып көрінеді. Ол уақытта мен №2 Сталин атындағы ер балалар мектебінде оқимын. Осындай №4 Жамбыл атындағы қыз балалар мектебі болды. Бұл саясатты осы күнге дейін түсінбеймін, неге қыз балаларды ұл балалардан бөліп оқытты? Әрине, кішкентай қазақ ауылынан келген біздерге Ақмола, біздің аудан орталығы Ақкөлмен салыстырғанда әжептәуір үлкен қала болып көрінетін. Үйлері негізінен шатырсыз қолдан соққан балшық кірпіштен салынған. Көбінде тақтай едендері болмайтын, әйнектері кішкентай жер үйлер еді. Ішетін суды су жинайтын орталықтардан талон сатып алып, соған алып, әртүрлі әдістермен үйге таситынбыз. Жол жағдайы өте нашар болды. Тас жолдың не екенін білмейтінбіз. Қазіргі М.Әуезов атындағы көше ол кезде Октябрь көшесі деп аталатын. Осы көшеге ғана тас төселген еді. Қаладағы ең үлкен үй қазіргі Абай мен Жеңіс көшесінің қиылысындағы үш қабатты Ақмола темір жол басқармасының ғимараты болатын. Осы темір жол басқармасының жанынан 4-5 вагоны бар паровозға тіркелген пойыз (оны «ветка» – деп атайтын) темір жол вокзалына қатынайтын. Ұмытпасам қала ішінде жүретін жолаушы көліктері болған жоқ. Әлі есімде, ескі базардың жанынан орталықтағы мектепке жаяу қатынайтынмын. Өзім оқитын мектептен басқа 3-4 мектеп қана болды. Қалада педучилище, темір жол, көлік, зооветеринарлық техникумдар ғана болды. Бір де бір жоғары оқу орны болған жоқ. Мәдени ошақтарға келетін болсақ, 3-4 кинотеатр, теміржолшылардың мәдениет үйі, 2-3 кітапхана жұмыс істейтін. Ұлттық мәдени орталық болған жоқ. Қазақ әртістерін, өз тіліміздегі киноларды көру арман еді. Анда-санда астанамыз Алматыдан келген әртістер, жазушылар, ақындарды көргенде қатты қуанып, ұзақ уақыт есімізге сақтап, айтып жүретінбіз. Өткен ғасырдың 50-ші жылдарының ортасында елді астықпен қамтамасыз етеміз деген желеумен Кеңес Одағының басшысы Н.Хрущев Қазақстанның солтүстік облыстарын орыстандырып, түбі Ресейдің қарамағына беріп жіберу үшін тың жерлерді игеру туралы жымысқы саясатын жүзеге асыра бастады. Сол астарлы саясаттың «астанасы» Ақмола қаласы болды. Қалада ол кезде 15 пайыздай ғана жергілікті ұлт өкілдері тұрды. Онда да көбі қаланың шет жақтарындағы жер үйлерді мекендеді. Ақмола тың өлкесінің орталығы болып жарияланып, қазіргі «хрущевка» деген онша жайлы емес көп қабатты үйлер салына бастады. Сол үйлерден анда-санда біздің ұлттың өкілдеріне пәтерлер берілсе, не бірінші қабаттан немесе соңғы қабаттан тиетін еді. Негізінен тың өлкесінің, Ақмола облысы мен қаласының басшылары келімсек, басқа ұлт өкілдері болды. Осындай әдістерімен қазақтарды төмен дәрежедегі халық ретінде ұстауға тырысты. Н.Хрущев бір келгенінде қаланың тарихи атын өзгерткізіп, Целиноград деп қойғызып кетті. Қаланың орталығында қазіргі қалалық әкімдік, Конгресс-Холл (ол кезде Тың игерушілер сарайы – деп аталатын), Мәскеу қонақ үйі сияқты санаулы ғимараттар салынды. Ауылшаруашылық, медициналық, инженерлік-құрылыс институттары ашылып, бой көтерді. Тың өлкесі жабылып, Хрущевтің арам ойын іске асырмауға бетпе-бет қарсы тұрған қазақтың аяулы азаматы Жұмабек Тәшеновтің арқасында Қазақстанның тұтастығы сақталып қалды. Одан кейінгі облыс басшылары Н.Кручина, Н.Морозов, А.Браунның тұсында да қаламыз онша көркейе қойған жоқ. Осылардың бәрін жазып отырғаным, тәуелсіздіктің құрдастары, одан кейінгі ұрпақ Ақмоланың өткен бет-бейнесін біліп, тарихқа кішкене үңілсін деген ниет еді. Егемендік алғанға дейінгі Ақмола қандай, бүгінгі Астана қандай?! Ақмола Ақмола болғалы өз дәрежесінде дамымаған қала небәрі 10-15 жылдың ішінде адам танымастай өзгеріске ұшырады. Қаншама зәулім үйлер салынып жатыр. Бұрын Американың киноларынан ғана көретін 30-40 қабатты үйлер өзімізде пайда болды. Ондағы шетелдік лифтілер дыбыссыз бірнеше секундта ең жоғарғы қабатына алып барады. Көптеген ақмолалықтардың тұрғын үй жағдайлары жақсарды, біраздары екі-үш қабатты коттедждер салып алды. Түнгі қаламыз өте әдемі көрінеді, дамыған елдердің қалаларымен бой таластырады. Қаламыз әкімшілік орталық қана емес. Білім, ғылым, мәдениет, спорт орталығына айналды. Көптеген жоғары оқу орындары ашылды. Олардың көшбасшысы – «Назарбаев Университеті». Халықтың денсаулығын жақсарту мақсатында бірнеше халықаралық дәрежедегі медициналық ғылыми-зерттеу институттары ашылды. Соның шапағатын көргендердің бірі – өзіммін. Бұдан төрт жыл бұрын менің жүрегіме күрделі операция жасады. Соның арқасында балалар мен немерелерімнің ортасында бақытты ғұмыр кешіп жатырмын. Осы мақаламды пайдаланып, кардиохирург Ю.В.Пя мырзаға зор алғысымды жеткізгім келеді. Елбасы Нұрсұлтан Назарбаевтың Жолдауындағы халқымыздың 30 пайызы спортпен айналысу керек деген тұжырымы қаламызда кең етек алып жатыр. Көптеген спорт кешендері салынды, онда халықаралық жарыстар өтуде. Осының бәрі – тәуелсіздігіміздің арқасы. Тұңғыш Президентіміз Н.Ә.Назарбаевтың болашақты болжай білген көрегендігінің жемісі.Еркін ДӘУЕШҰЛЫ, зейнеткер, қала тұрғыны.
_________________________ТЕРЕҢ БІЛІМ, ТҰҒЫРЛЫ ТЕХНОЛОГИЯ
![091211-27](http://old.egemen.kz/2011img/091211-27.jpg)
Дана ХАМЗАБЕК, Назарбаев Университетінің студенті.
_____________________________
Айқарма беттің материалдарын ұйымдастырған Жылқыбай ЖАҒЫПАРҰЛЫ, Әбдірахман ҚЫДЫРБЕК, «Егемен Қазақстан».