Әлі күні есімізде, 1989 жылы 20 мың қазағы бар Петропавл қаласында тұңғыш қазақ сыныбын ашу үшін 15 оқушыны әрең жинап, әбден сергелдеңге түскеніміз бар. Басыбайлы ғимарат табылмағандықтан №3 орыс мектебі жанынан қоныс тепкеніне шүкіршілік еткенбіз. Араға 7 жыл салып облыс орталығында алғашқы қазақ мектебінің қандай қиындықпен бой көтергенін де ұмыта қойған жоқпыз. 1990 жылы іргетасы қаланып, қаржы тапшылығынан мәселе бірнеше жыл бойы шешілмеген өткір күйінде қалды. Білім басқармасының басшылары 1996 жылы 1 қыркүйекте дайын болады деген уәделерін орындай алмады. 266 оқушы орыс мектебінің бір қанатында жаңа оқу жылын бастауға мәжбүр болды. Тек Республика күні 320 орынды қазақ классикалық гимназиясы салтанатты түрде бой көтеріп, жұртшылықтың қуанышына айналды. 12 сынып жинақталып, 300-ге тарта оқушы мектеп партасына отырды. Бүгінде гимназия айтулы оқу орнына айналған. Өткен мерзім ішінде оның қабырғасынан 472 түлек қанаттанып ұшты. 17 оқушы «Алтын белгі» иегері атанды. Балаларын ана тілінде оқытуды ниет етушілер санының күрт артқаны соншалық, оқушылардың саны бір мыңнан асып, екі ауысымда оқуға тура келді. 1935 жылы қазақ мектеп-интернаты ретінде шаңырақ құрып, кейін мұғалімдер білімін жетілдіру институты құзырына берілген ескі ғимаратты қазақ мектебіне алуда да көптеген кедергілер кездесті. Арнайы құрылған ынталы топтың тегеурінді белсенділігі арқасында ғана 280 орынды білім ошағына айналдырылды. Қазір мұндағы оқушылардың саны – 600. Сөйтіп, бір жылда қос мектеп есігін айқара ашты. Осы орайда сол жылдары облыс әкімі қызметін атқарған Владимир Гартманның ерекше қамқорлығын айта кеткен жөн.
Тіл жанашырларының қазақ мектебін ашу туралы ұсыныс-өтініштерін облыс басшылары түсіністікпен қабылдап, қал-қадерінше қолдап отырды. Мәселен, облысқа әкім болып келген Даниал Ахметов 1999 жылы бухгалтерлік кеңсені күрделі жөндеуден өткізіп, 320 орынды мектептің кілтін ұстатты. Қажымұрат Нағманов 2000 жылы иесіз қалған дүкен ғимаратын танымастай жаңғыртып берді. 2007 жылы 1100 орынды қазақ мектеп-гимназиясы іске қосылып, оқушыларға лық толды. Бұдан тысқары Петропавл қаласында облыстық деңгейдегі дарынды балаларға мамандандырылған гимназия интернаты, М. Жұмабаев атындағы гуманитарлық колледжі жанындағы қазақ мектебі және қазақ-түрік лицейі орналасқан. Облыс әкімі Серік Біләловтің тікелей қолдауымен оқушылар саны азайған орыс мектептерінде қазақ сыныптарын ашу үрдісі кең құлаш жайған. Бүгінде 11 орыс мектебінде қазақ сыныптары жұмыс істейді.
1990-1991 оқу жылында қазақ балаларының 25 пайызы ғана ана тілінде білім алса, қазір бұл көрсеткіш 57 пайызды құрап отыр. Ұлты басқа 267 оқушы өз еріктерімен қазақша оқуға ынта білдірген. Тәуелсіздігіміздің арқасында ұлттық білім саласында тамаша табыстарға жетіп отырмыз. Бүгінде қазақ ата-аналарының көзқарасы мүлдем басқаша,түбегейлі өзгерген.
Петропавл қалалық білім бөлімінің бас маманы Сәуле Әбуқызының айтуынша, мектеп жасындағы 5828 қазақ балаларының 3328-і ана тілінде білім алады. Бұл жалпы үлестің 58 пайызы. Орыс тілді 14 мектепте «Балапан» бағдарламасы бойынша 925 орынға лайықталған шағын орталықтар құрылған. Жуырда Петропавл қаласында Тұңғыш Президенттің зияткерлік мектебінің іргетасы қаланды. Ол 740 орынға лайықталған. Демек, қазақша оқуға тілек білдірушілер қатары алда еселене түседі деген сөз.
Иә, қазақ мектептеріне деген сұраныс өсе түспесе кемитін түрі байқалмайды. Ол түсінікті де. Осыдан 20 жылғы бұрынғы кезең мен қазіргі жағдай еш салыстыруға келмейді. Тәуелсіздіктің алғашқы жылдарындағы күмән бұлты сейілгелі қашан! Азат елдің ғажап ұрпағы жас шынардай желкілдеп өсіп келеді. Ұлтжанды азаматты бір ғана ой мазаласа керек: ол – еліміздің ертеңі, болашағы. Мемлекеттік, елдік мүдде жолында ана тілін білудің, ұлттық құндылықтар мен қазыналарымызды игерудің маңыздылығын жан-тәнімен түсінген ата-аналардың дабыл қағып, қобалжитындай жөні бар. Әлі 970 орынның жетіспеушілігі осыны байқатады. Осы жайттарды ескере келіп, Петропавл қалалық әкімдігі республикалық құзырлы орындарға хат жолдап, 900 орынды қазақ мектебін салуды өтінген. Өйткені, мониторингтік зерттеуге қарағанда, мемлекеттік тілде оқуға ынта білдірушілер қатары жыл сайын қалыңдап келеді. Олардың арасында өзге ұлт балалары аз емес.
Өмір ЕСҚАЛИ.
Солтүстік Қазақстан облысы.