Кеше Ұлттық академиялық кітапханада «Егемен Қазақстан» республикалық газеті» АҚ-тың құрастыруымен жарық көрген «Тәуелсіздік» кітабының тұсаукесері өтті. Оған белгілі қаламгерлер мен қоғам қайраткерлері, студент-жастар қатысты.
Осыған дейін бас басылым әзірлеген «Елбасы» (2010), «Салтанат» (2011) атты толымды жинақтар оқырманмен қауышса, тың туынды сол дәстүрдің жалғасы іспетті деуге болады. Жиырма жылдық торқалы тойға арналған саяси журналистиканың тұңғыш трилогиясына сан ғасырлар ата-бабаларымыз аңсап өткен азаттықтың қадір-қасиеті, тағылымды тарихы мен жеңіс-жемісі баяндалатын әр жылдардағы мақалалар, әңгіме-сұхбаттар мен толғаулар еніп отыр. Тәуелсіз Қазақстанның өтпелі кезеңнің кедергілерін жеңіп, әлемдік қоғамдастыққа танылуы алдымен ел Президенті Нұрсұлтан Назарбаевтың көреген саясатының арқасы екенін Қазақ елі түгілі өзге жұрттар мойындағалы қашан. Мұны айтып отырғандағы себебіміз, бас басылымды әр кездерде басқарған басшылардың Елбасымен жүргізген әңгіме-сұхбаттарын кітаптан оқи бастағанда, өткен кезеңдер келбетімен бетпе-бет келіп отырасыз. Жинаққа сонымен қатар Ә.Кекілбаев, М.Жолдасбеков, Ө.Байгелди, К.Сағадиев, Қ.Саудабаев, Қ.Сұлтанов, Қ.Мәми сияқты бірқатар танымал мемлекет және қоғам қайраткерлерінің, Шерхан Мұртаза, Камал Смайылов, Төлен Әбдікұлы, Дулат Исабеков, Әбдеш Қалмырзаев секілді қаламгер тұлғалардың тәуелсіздік жайындағы сыр-толғаулары оқырманды әсерлі әлемге жетелейді. Бір айта кететін нәрсе, «Тәуелсіздік» жинағы кітапханаларға таратылып, ел тарихын білгісі келген оқырманға баға жетпес байлық болмақ.
«Тәуелсіздік» кітабының тұсаукесері мерекелік рәуіште, Президенттік мәдениет орталығы ұлт-аспаптар ансамблінің орындауындағы шаттық күйлерінің екпінінде басталды. Экраннан тың туындыны бейнелі бедерлейтін тарихи суреттер алма-кезек сырғып отырды. Тұсаукесер рәсімді «Егемен Қазақстан» республикалық газеті» АҚ президенті Сауытбек Абдрахманов кіріспе сөзбен ашты. Тәуелсіздік мерекесі қарсаңы түрлі шараларға толы болатыны белгілі. Соған қарамастан, уақыт тауып келген лауазымды тұлғаларға, көрнекті қоғам қайраткерлеріне, жалпы оқырман қауымға алғысын білдіре келіп, кітаптың мән-жайы туралы түйінді ой қозғады. «Тәуелсіздік жеңісі өз астанамызды өзіміз таңдаудан басталды. Астана 20 жыл ішіндегі ең сәтті шыққан жоба деуге болады» деп ел құндылықтарын айрықша құрметтеген басылым басшысы осы арқылы Қазақ елінің өз жеріне толық мағынасында ие болғанын көруге болатынын айтып өтті. Кітапты шығаруға демеушілік жасағаны үшін Оңтүстік Қазақстан мемлекеттік педагогикалық университетінің ректоры, профессор, газеттің белсенді авторы Оңалбай Аяшевқа арнайы алғыс білдірді.
Тәуелсіздік кітабына тілекті әуелі Сенат Төрағасының орынбасары Қайрат Ищанов айтты. «Бұл кітап шын мәнінде тәуелсіздік толғауы болып отыр. Тәуелсіз еліміздің 20 жылғы даму жолы «Егемен Қазақстан» газетіндегі журналистер мен қызметкерлердің қажырлы еңбегінің арқасында тасқа басылып, жаңа тарихымыздың шежіресі жасалды. Бұл кітап ұлтымыздың рухани қазынасына қосылған қомақты үлес деуге толық хақымыз бар», дей келіп, одан әрі ол ғасырға бергісіз жарқын жылдарда атқарылған қыруар еңбекке тоқталды. Өзіміздің ішкі және сыртқы саясатымызды дербес жүргізіп, біз үшін мүлдем жаңа әрі ашық қоғамның есігін ашқан, жеке мемлекет ретінде демократиялық, зайырлы елдің заңдық негіздерін құрған кезеңдердің орны қашанда бөлек болып тұратыны айтылды. Осыдан 20 жыл бұрынғы егемендіктің елең-алаң шағындағы көріністерді еске салды. Қазақ елінің Тұңғыш Президенті Нұрсұлтан Назарбаевтың саяси ерік-жігері мен батыл шешімдерінің арқасында бүгінгі ынтымақты ел болып, татулық пен тыныштықты берік орнықтырған қадамдарды қайта қаперге салып өтті. Сол кезеңдер аралығында еліміз едәуір өркендеп, экономика дамыды, Арқа төсінен сәулетті елорда бой көтерді, Қазақстан халықаралық қоғамдастықта беделді және қарқынды дамып келе жатқан мемлекеттер қатарына қосылды. Барша қазақстандықтар ертеңгі күнге сеніммен қарайды. Оған нақты дәлелдің бірі – дамыған Қазақстан, өркендеген еліміздің бүгінгі келбеті, игілік жолында қажырлы қызмет еткен отандастар өмірі. Осы орайда «Егемен Қазақстан» газетінің ерлікке толы жиырма жыл туралы газетте жарық көрген мақалаларды жинақтап, арнайы кітап етіп шығаруы мерекеге лайықты тарту, деді.
Ел шежіресі шегеленген жинақ туралы Қазақстанның Еңбек Ері, қоғам қайраткері, жазушы Әбіш Кекілбаев әңгімені тереңнен қозғады. «Бұл күнге жеткен де бар, жетпеген де бар. Дүниеде кіріптарлық дәмін татпаған бірде-бір мемлекет жоқ. Әлемді гегемонизм әлденеше рет күйретті. Ежелгі Эллада мен Рим де ондай күнді айналып өте алмады. Дүниені дүр сілкіндірген Араб Халифаты мен моңғол езгісі де осының кебін киді. Тіпті қазіргі жер-құдірет саналатын АҚШ, Ұлыбритания, Испания, Франция, Германия, Ресей, Қытай, Үндістандардың бәрі де отаршылдықтың қандай болатынын бастан кешіп көрді. Алайда әлемдік империя идеясы адамзатты әзәзілдей азғырды да тұрды», деп талай алпауыт елдер бастан кешкен тарихи оқиғаларды баяндай келіп, ХХ ғасыр басындағы дүниежүзілік империализм жайындағы пайымды алға тартты. Әлемдік мұхитты баса-көктеген ағылшын, француз, испан, португал, орыс теңізшілері дүниені қайта бөліске салуға жанталасты. Оған неміс пен жапонның қапы қалған әскери күштері де ерекше мүдделі еді. Бірақ соны мақсат еткен алғашқы дүниежүзілік соғыс атымен кері нәтижеге жеткізді. Ұлт-азаттық қозғалысының дәурендеуі басталды.
Ұлттар лигасы құрылған тұста жиырма шақты дербес мемлекеттер табылса, екінші дүниежүзілік соғыстан кейін құрылған БҰҰ-ға 86 мемлекет мүше болды. Ұлт-азаттық қозғалысының әлемдік демократияның құрамдас бөлігіне айналуы бұл үдерісті жеделдетті. Қазір аталмыш ұйымның мүшелері 200-ден асып жығылады. Ежелден еркіндік аңсаған қазақ халқы демократия мен ұлт азаттығы ұласқан осы үшінші кезеңде Тәуелсіздік алды, булықсыған демократиялық күштері сірескен тоталитаризмнің ірі бекінісі – КСРО-ны күйретті. Еуропа мен Азияның ондаған халықтары саяси егемендік алды, деп азаттықшыл халықтың соңғы 260 жылын бодандық бұғауында өткізгенін тілге тиек етті. Жер тұтастығынан, ел тұтастығынан айырылғанын, Астрахан, Орынбор, Омбы, Ташкент губернаторлықтарына ыдырап, жаппай кіріптарлықта күн кешкенін, сонда да тілінен, ділінен, еркіндікқұмарлығынан айнымағанын, ұлттық тәуелсіздікке құштар болғанын, «Алаш» партиясын құрып, Алаш-Орда үкіметін орнатқанын шежіреге қосты. Саясат сахнасына Әлихан Бөкейханов, Ахмет Байтұрсынов, Міржақып Дулатов, Халел, Жанша Досмұхамбетовтер, Мұстафа Шоқай, Тұрар Рысқұлов сынды қайраткерлер есімінің тәуелсіздік тойы аталып жатқан тұста осындай келелі әңгімелер өзегіне айналуы заңды еді.
Қаламгер қызыл тоталитаризмнің, ұлтсыздандыру саясатының халыққа қаншалықты қауіп-қатер төндіргенін жеткізді. Қазақстанда қазақтардың саны 39,7 пайызға дейін құлдырауы соның нақты дәлелі іспетті. Осы кезеңді «Бұл расында да біз үшін ажал алдындағы аяқ серпу кезеңі еді» деп сипаттады. Содан бері халқымыз 62 пайызға жетіпті. Бұл орайда дүниенің төрт бұрышынан оралған отандастардың орны бөлек. Армияның құрылуы, шекараның бекітілуі өзгелердің тәуелсіз Қазақ елін танып, мойындауына бірден-бір себеп болса, мұны ЕҚЫҰ жиыны мен Азия қысқы спорт ойындарының өтуі нықтай түсті. «Қазақ даласының үсті өріс, асты кеніш болушы еді» деп келетін кестелі суреттеуден соң биылғы жылғы табыстар сөз етілді. Қазақстан даму қарқыны жағынан бұрынғы кеңестік республикалар арасында алдыңғы орынды иеленетіні, индустриялық-инновациялық өрістің көңіл марқайтатыны, жаңадан салынған темір жолдар мен күре жолдардың, зауыттар мен фабрикалар шығарған отандық өнімдердің көбеюі, заманауи жаңаруымыздың зор табысы – Алматы метросының іске қосылуы сынды табыстарды тасада қалдырмады. Тарихтың тау-тасты, ойқы-жойқы жолдарында өз теңдігіне жете алмай бейнет шеккен басқа халықтардың қиындығын еске түсірмеу тағы мүмкін емес. Бұл ретте Батыста бір кезде бүкіл ислам дүниесін крест көтерушілер жорығынан сақтап қалған әйгілі Салах-ад-Динді дүниеге әкелген курдттардың отансыздық зардабын тартып жатқанын мысалға келтіруі тегін емес. Бір кездері Шыңғыс ханға жол үйреткен ұйғырлардың бастан кешіп отырған тауқыметі тарих беттеріне тағы бір үңіле түсуге итермелейді. Ырыс пен несібеге кенде қылмаған ата-бабалар рухына тағзым ете келе, «Бәрінен бақ асыру міндет емес, бәрінің бабын табу – міндет, барды бағалай білу – міндет. Құдайдың бергенін ұқсата білетін ынта мен ыждағат керек», деген қанатты ұғымға ұйытты.
Белгілі мемлекет және қоғам қайраткері Өмірбек Байгелди: «Жалпы, елдің бас газеті – «Егемен Қазақстанды» өміріміздің айнасы деуге болады. Өйткені, күнделікті болып жатқан оқиғалардың бәрі осы басылымда айна-қатесіз көрініс тауып жатады, түбі шындықты іздеген ұрпақ келешекте өзіне керегін осы газеттің бетінен табады деп ойлаймын», деп әуелі газетке тоқталған автор тәуелсіздіктің оп-оңай келген олжа емес екенін, оны көздің қарашығындай сақтау әр адамның парызы екенін еске салып өтсе, сенатор, академик Ғарифолла Есім: «1961 жылы Байқоңырдан жердің тартылыс күшін жеңіп, Юрий Гагарин космосқа ұшты. Бұл енді сол кезде үлкен оқиға болды. Сол кезде балқар ақыны Кайсын Кулиев өлең жазды. Онда ол ғарышқа ұшу, жалпы ғылым мен техниканың мәселесі адам таңғалатын нәрсе емес. Мүмкін таңғалуға да болар, бірақ ол мүмкін нәрсе. Ал енді дәл қазір қасыңда отырған, өзіңмен бірге жүрген адамға ұшып жету мүмкін еместігін, бұл қиынның қиыны екенін алға тартты. Біздің өмір-бақи мәңгілік мәселеміз осы – айналамыздағы адамдарды түсіну. Біз сол қасымыздағы адамдарға ұшып жетіп жатырмыз ба? Сол сияқты Қазақ елі үшін тәуелсіздік – ғарыш. Енді осы ғарышқа біз жетіп жатырмыз ба деген мәселе тағы бар. Тәуелсіздіктің кемелді болуы үшін мынадай бір шарттары керек. Ол үшін әрбір Қазақ елінің азаматы тәуелсіз болуы, санасы азат болуы керек. Сол кезде ол тәуелсіз деген сөзді толығымен түсінетін болады. Мен азат сана деген ұғымның генетикалық бастауын атамекен идеясы деп ойлаймын. Біз, қазақтар бақытты халықпыз. Біз өзіміздің атамекенімізде өмір сүріп жатырмыз. Шыңғыс хан шапқыншылығына дейін біз өзіміздің атамекенімізде мемлекет болып тұрғанбыз. Бірақ сол атамекеннің тарихында әртүрлі жағдайлар болды. Ал қазіргі кезде осы атамекенде Қазақ елі, демократиялық жолмен, халықтың қалауымен Президент болып Нұрсұлтан Назарбаев отыр. Бұл – атамекен идеясының ренессансы. Атамекен идеясының бір формуласы Асан Қайғы бабамыз айтқан жерұйық болатын», дей келіп, «оралман» сөзінің түпкі мәніне тоқталды. Газеттің белсенді авторы оралман деген сөз адам ұғымын бермейтінін алға тартты. Бұл бір кезде шашырап кеткен ырысымыз, құтымыз, берекеміз еді. Енді сол құт-берекеміз оралып жатыр. Оралман деген ол – біздің ойымыз, арманымыз. Олар атамекеніне, сол жерұйығына оралып жатыр деді.
Ақын Серік Тұрғынбекұлының оқыған «Тәуелсіздік толғауы» өлеңі тың туынды рухымен үндесе өрілді.
Тәуелсіздік –
Бір жұтым су екенсің.
Татып едім,
Кетпедің таңдайымнан.
Тәуелсіздік –
Қолдағы ту екенсің.
Күнде желпіп тұратын маңдайымнан.
Тәуелсіздік –
Бір биік тау екенсің.
Емін-еркін шыға алмас басына жан.
Тәуелсіздік –
Гүл бақша-бау екенсің.
Жемісімен жұртымды асыраған, – деп ерекше екпінмен оқылған жыр шумағының түйінделуі де әсерлі.
Тәуелсіздік –
Көгілдір түс екенсің.
Көк бөрінің оралған сарынымен.
Тәуелсіздік –
Сен бақыт құсы екенсің.
Басқа қонған Алланың әмірімен.
Жаудырамын сол үшін алғысымды,
Серт беремін: Талықсып, талмасын деп!
Алақанда баптаймын сол құсымды,
Аңдаусызда ұшырып алмасын деп.
Мемлекеттік сыйлықтың лауреаты, жазушы Әнес Сарай егемендіктің басы-қасында жүрген адамдардың бәрін қаһарман деп есептейтінін айтса, Мемлекет тарихы институтының директоры, тарих ғылымдарының докторы Бүркіт Аяған саяси тұлға туралы жазу кемшін түсіп жатқанын тілге тиек ете келе, трилогияны сол орынды толтыратын тамаша еңбек деп білемін, деді. Президенттің баспасөз қызметі жетекшісінің орынбасары, тарих ғылымдарының докторы Дархан Қыдырәлі аз уақытта мұндай үш кітаптың жарық көруі бұрын-соңды болмаған оқиға, елдің тәуелсіздік жылдарындағы бүкіл тарихы түркінің тасқа басқан таңбасындай осы кітаптан табылатынын айтты. Тарихты жасайтын ел болады және де жазатын ел болады. Өкінішке орай, бұрын көп нәрсе жазылмай қалды. Бірақ тәуелсіздіктен бері барлық тарихымыз жазылып жатыр деп есептеуге болады. Сол себепті де бұл кітап әркімнің кітапханасында тұруға лайықты еңбек деп ойын қорытты. Газеттің белсенді авторы Оңалбай Аяшев Қазақстанды көршілес Өзбекстанның жағдайымен салыстыра отырып сөз етті. Бүгінгі жүріп өткен жолымыздың бәрі кейінгі жастарға сабақ болуы керек. Елдің жиырма жылдық тарихы егжей-тегжейлі жазылған жылнаманы сондықтан да алдымен жастар оқуы тиіс, деп тәуелсіздік қадірін кейінгі жастардың жете бағалауына мән берді.
Тәуелсіздік тойына тартылған рухани сыйдың тұсаукесерінде ән шырқалып, күй тартылды. Белгілі әнші Гүлмира Сарина «Бәйтерек», «Бұлбұлым» әндерін шырқаса, Олжас Мырзабекұлы Шалмырза Тоқболатұлының, Қазанғаптың күйлерін шебер орындап, терең сырды теңдессіз өнермен сабақтастырды.
Қарашаш ТОҚСАНБАЙ.
–––––––––––––––––
Суреттерді түсірген Ерлан ОМАРОВ.