![121211-12](http://old.egemen.kz/2011img/121211-12.jpg)
90-жылдары Кеңес Одағы тарап, егемендік алған мемлекеттердің барлығы елдігін қалыптастыру жолында жаңа конституцияларын қабылдады. Осы мемлекеттердің конституциялық құрылыс тәжірибесіне зер салсақ, бұл аса қарқынды үдеріс екендігін байқаймыз. Тәуелсіз мемлекеттердің толыққанды қалыптасуы жолында конституциялық құқықтық жаңғырулары бүгінгі күнге дейін жалғасуда. Бұл саяси-экономикалық және әлеуметтік реформалардың жалғасып жатқандығымен байланысты. Яғни, тәуелсіз елдер шеруіне ілескен Қазақстан да осы жолмен жүріп өтті.
1993 жылы конституциялық құқық бойынша заңгерлер тобында болып, Конституция жобасын дайындау бойынша жұмыс істегенмін. Кейіннен, осы салада белсенділік танытқан мені және Константин Колпаковты 1995 жылы Президент Нұрсұлтан Назарбаев жаңа Ата Заңның жобасын жасау үшін шақырды. Екеуміз де жас әрі кәсіби заңгерлерміз. Президент бізді барлық міндеттерден босатып, Қазақстанның жаңа Конституциясын жасауда қолғабыс білдіріп, көмекші болуды тапсырды.
Әрине, бұл істе тәжірибелі саясаткер әрі беделді қайраткер Нұрсұлтан Әбішұлы Назарбаев бізге жол нұсқап, қайраттандырып отырды. Ата Заңның әр бабын Елбасымен бірге ұзақ талқылап, оның әр нормасы бойынша пікірталас өтетін. Өзі күн сайын жаңа ұсыныстар алып келіп, оларды бізге талдап, салмақтап шығуды ұсынатын.
Кейін Елбасы Нұрсұлтан Назарбаев өзінің «Ғасырлар тоғысында» атты кітабында осы жаңа Ата Заңды дайындау кезіне қатысты: «Жоғарғы Кеңес таратылған соң, Конституция жобасы жөніндегі жұмыспен мен нақты және шұғыл айналыса бастадым. Ондай жауапты қызметті ойдағыдай атқаруға маған көмектескен адамдарға ризашылығымды айта кеткен жөн. Олар: Нағашыбай Шәйкенов – заң ғылымдарының докторы, профессор; Бауыржан Мұхамеджанов, Константин Колпаков – заң ғылымдарының кандидаттары. Заңның әр түрлі салаларының мамандары. Әрқайсысы өз тарауларын зор жігермен жазып шықты», деп атап көрсетті.
Президентіміздің олай дейтін жөні бар. Өйткені, бабалардың ғасырлар бойы армандаған мемлекеттілігіне қол жеткен шақта оны уыстан шығарып алмай, елдікті нығайтып, Тәуелсіздікті тұғырландыру жайы көзі қарақты елжанды азамат үшін ауыр міндет жүктейтіні белгілі. Конституцияның тарауларын жазған заңгерлердің дені қазақ мемлекетін келесі ғасырларда қуатты ел ретінде көргісі келді. Осы арман-мұраттар алдымыздағы ақ қағазға елдің басты заңының баптарына айналып түсіп жатты.
«Жобаны талқылау үшін 11 сарапшы тағайындадым. Кейде біз Конституция баптары үстінде 12-14 сағаттан бас көтермей жұмыс жасадық. Іске зор жауапкершілікпен қарау, ешбір беделге бас ұрмау – басты талабымыз болды. Жобаға әбден сын көзбен қарауды, қайта-қайта талқылауды талап еттім», – деп толғанады Елбасы өз еңбегінде. Бұл еліміздің сын сағатындағы кезі болатын. Елбасының сындарлы саясаты мен көрегендігі арқасында еліміздің болашағына айқын да ашық жол тартылды. Өйткені, біздің Конституциямыз әлемдік конституционализмнің үздік жетістіктерін қамтыды. Мазмұны жағынан бұл маңызды құжат алдыңғы қатарлы дамыған демократиялық елдердің Ата Заңдарымен тең түсті.
Жаңа Конституция шығыс халықтарына тән менталитетті ескере отырып, еуропалық-құқықтық дәстүрді, батыс демократиясының озық үлгісін бір құжатқа біріктірді, елдің қоғамдық-саяси құрылысын түбегейлі өзгертті. Мемлекеттік, қоғамдық-саяси институттардың негізгі қағидаттарын қалыптастырып, адам мен азаматтың конституциялық мәртебесін орнықтырып, қоғамның негізгі саяси және әлеуметтік даму бағыттарын айқындады. Онда мемлекеттілік, азаматтық, жер, тіл, президенттік басқару пішіні, қос палаталы Парламент, Үкімет, сот саласын реформалау, Конституциялық соттың орнына жаңа мемлекеттік орган – Конституциялық Кеңес құру туралы негізгі тұжырымды мәселелер толығымен шешімін тапты. Ал өз кезегінде жаңа Конституцияның жаңа нұсқасын жетілдіруге отандық заң ғылымының барлық әлеуеті тартылды. Басқа да аралас қоғамтану саласының барлық мамандары, тәжірибелі сарапшылар атсалысты. Сонымен бірге, шет елдердің де конституциялары зерттелді. Жоба бойынша өте көп ұсыныстар ескеріліп, оған өзгерістер мен толықтырулар енгізілді.
Сөйтіп, 1995 жылы 30 тамызда қазақстандықтар бүкілхалықтық референдумда Қазақстан Конституциясының соңғы нұсқасын жақтап дауыс берді. Референдумда дауыс беруге 7 млн.-нан астам адамның қатысқанын ескерсек, Конституцияның нормалары мен ережелерін, қағидатын, бастамасын әрбір қазақстандық өз қалауымен, жүрегімен қолдады деп еркін айта аламыз. Онда ел тарихындағы мемлекеттік басқарудың жоғарғы өкілетті органын белгілеу үшін «парламент» ұғымын алғаш рет қолданды. Жалпы, қос палаталы Парламент федеративтік мемлекеттерде ғана бар. Унитарлық елдер бір палаталы парламенттен тұратыны – оның басты ерекшелігі. Қазақстан унитарлы мемлекет бола тұра, қос палаталы парламент институтын таңдады. Бұл әлемдік конституциялық құрылыста жаңа құбылыс болды.
Қос палаталы Парламент заңдардың сапалы қабылдануына қол жеткізеді. Палаталардың талқысынан өткен заң жобалары бір парламентке қарағанда сапалы әрі тереңірек саралаудан өтетіні анық. Сонымен қатар, Парламенттің кәсібилігі де оның басты ерекшелігі болып табылады. Негізгі Заңда берік тұғырнамасы қаланған қазақстандық парламентаризмнің қалыптасуы елдің жаңа құқықтық жүйесінің іргетасын бекітті. Осылайша, Конституциямызда белгіленген тәртіпте қабылданған республика заңдары халықаралық үлгілерге сәйкес келеді. Оның желісімен бірыңғай ұлттық заңнамалар қалыптасты. Жалпы, посткеңестік мемлекеттердің конституциялық құрылысындағы ерекшеліктердің бірі – бұл жаңа қоғамдық құрылыстың қалыптасуы болды.
Тарихи деректерге сүйенсек, ұдайы дамып, жетіліп, өзгеріп отыратын мемлекеттік құрылыс пен қоғам өмірі конституцияның дамуына әкеледі. Ал конституциялық реформа – қоғам дамуы тұсындағы қажеттілік пен бұқараның құқықтық танымы деңгейінің талабы бойынша үкімет әрекеті және саяси-құқықтық шешімдердің тізбегімен дүниеге келетіні белгілі. Міне, осындай өмір өткелдеріне орай 1998 жылғы 7 қазанда Қазақстан Конституциясына өзгерістер мен толықтырулар енгізілді. Жаңа өзгерістер мен толықтырулар қос палата қызметінің мерзімі, депутаттардың сайлануы, Үкімет мүшелеріне құзыреті шегінде анағұрлым кең дербестік беру, әкімдерді сайлау тәртібін бекіту мәселелеріне қатысты болды. Қазақстан саяси партиялардың пропорционалды өкілеттік негізінде партиялық тізім бойынша Мәжіліс сайлауына қатысуына мүмкіндік жасады.
Ал осы өзгерістердің жалғасы іспетті 2007 жылғы 21 мамырда «Қазақстан Республикасының Конституциясына өзгерістер мен толықтырулар енгізу туралы» Заңымен Конституцияға жаңа маңызды өзгерістер енгізілді. Өйткені, біле білсек конституциялық даму жоспарлылық, бұрынғымен сабақтастық, қоғамдық құрылысты сатылап, кезеңмен жаңғыртушы қасиетімен дараланады. Демек, конституциялық процесс пен саяси реформалар осы айтылған талапқа сәйкес келуге тиіс. Сондықтан бұл конституциялық реформа кезінде негізгі мемлекеттік құрылым нұсқасы өзгермеді, бірақ көптеген түбегейлі өзгерістерді әкелді. Бұл адамзаттың тарих соқпағынан даңғыл жолына түскен Қазақ мемлекетінің керуенін жылдамдатты. Алайда, бұл реформа да Негізгі Заңды өзгертумен шектеліп қалмады. Парламент «Қазақстан Республикасы Президенті туралы», «Қазақстан Республикасы Парламенті және оның депутаттарының мәртебесі туралы», «Қазақстан Республикасының Үкіметі туралы», «Қазақстан Республикасындағы сайлау туралы» бірқатар Конституциялық заңдарға өзгерістер мен толықтырулар енгізді.
Азаматтардың құқығын қорғау бұрынғы кеңестік конституцияларымызда да айтылып келді. Бірақ, өкініштісі сол, олар тек қағаз жүзінде болған еді. Енді, міне, азаматтардың конституциялық құқығының қорғалуына мемлекет тарапынан көп мән беріліп, іске асты. Конституция бойынша адам құқықтары мен бостандықтары танылады және оларға кепілдік беріледі. Әркімнің өз құқықтары мен бостандықтарын сот арқылы қорғауға құқығы бар. Заң мен сот алдында жұрттың бәрі тең. Соның бір бағыты Конституциялық нормалар арқылы елде орнаған саяси тұрақтылық Қазақстан экономикасын ауқатты шетел инвесторларына тартымды етіп көрсетті. Отандық индустрияның дамуына қажетті капиталдың қайнар көзі осы шетел инвестицияларымен бірге келді. Біз шетелден келген инвестицияны алып қана қоймай, олардың қаржыны басқару менеджментінің озық дәстүрін де қысқа уақыт ішінде өз бойымызға сіңірдік.
Қазіргі таңда елімізде Ата Заңымыз және ұлттық заңнамамыз адамдар үшін ғана жұмыс істеп тұрған жоқ, ол адамдардың шығармашылық, жасампаздық қуатын күшейтіп, кәсіпкерлікке шабыттандыруда. Бұл сөзімізге дәлел боларлықтай, Қазақстан Республикасы ҰҒА академигі, заң ғылымдарының докторы Сұлтан Сартаевтың «Біз конституциялық кеңістікте өмір сүрудеміз», – дегені бар.
Ал еліміздің географиялық орналасуы жағынан орталық аймағындағы Сарыарқа атты сайын дала төсінде салынған сұлу шаһар – Астанамыз Қазақ халқының тәуелсіздік тұсында қол жеткізген жетістігінің келбеті, жасампаздығының символы болып табылады. Айта берсе, жиырма жылда тындырылған іс көп. ТМД елдері ішінде бірінші болып экономикалық реформаларды қолға алдық. Кәсіпкерлікке мемлекет тарапынан қаржылық қана емес, әкімшілік сатыларды қысқарту арқылы және құқықтық нормативтік құжаттарды жетілдіру арқылы қолдау көрсетілді. Кедендік Одақ жұмыс істей бастаған тұста Қазақстанның бизнеске жасаған қамқорлығын сезінген көрші елдердің кәсіпкерлері өз бизнестерін қазақ жеріне көшіруге асығуы – осының нақты айғағы. Ірі өндіріс ошақтары іске қосылып, кәсіпорындар жергілікті халықты жұмыспен қамтуда. Бұл қазақстандықтардың болашағы жарқын екенін тағы да бір айғақтайды.
Енді болашақта Қазақстанның конституциялық дамуы мен өзгеруі ұлттық мемлекеттің арқалаған міндеттерін шеше алатын конституциялық принциптермен және мемлекеттік-құқықтық институттармен тығыз байланысты болмақ. Еліміз мүше болған Кеден одағының дамуындағы мәселелердің рөлінің маңызы арта түспек. Ұлттық деңгейден жоғары тұратын ұйымдар құру кезінде конституциялық заңдылық мәселелері өзекті болады. Ал өз кезегінде конституциялық заңдылықты қамтамасыз етудің маңызды тетіктері Конституциялық Кеңестің қызметін тиімді ету болып табылады.
Елбасы Ата Заңның дайындалуы барысында саяси көрегенділікпен: «Мен жұмыс барысында қоғамның бір орнында тұрмайтынын, жаңа сан қилы сапалық деңгейлерге көтерілетінін, кез келген мемлекеттік шешімдер мен құжаттар да ерте ме, кеш пе, бәрібір уақыт талабынан қалып қоятынын ойладым. Ондай кептен қоғам мен мемлекет өмірінде болып жатқан шын өзгерістерді бейнелеуге тиісті Конституцияның да қашып құтыла алмайтындығы даусыз. Сондықтан да кез келген елдегі конституциялық процесс Конституцияның қабылдануымен тоқтап қалмайды. Әлеуметтік-экономикалық және саяси процестердің құқықтық кепілдемесі қоғамдағы өзгерістер қарқынына ілесіп қана қоймай, алға озып отыруға тиісті», – деп жаңа дәуірде, социалистік құрылыстан еркіндікке бет алған Қазақстанның ахуалын сұңғыла түйсікпен сезіне отырып, әлемдік жаһандану процесінің қарқын алып, ертеңді болжау бұлыңғырға айналған тұста, алдағы уақытта ірі реформалар мен қоғамдағы өзгерістердің болатынын, оған алдын ала дайын болу керектігін дәл болжап берді. Сол рас екен.
Енді, міне, Тәуелсіздігіміздің 20 жылдығы мерейтойы тұсында мен сол бір ұйқысыз, толғаныспен өткен кезеңдерді аса бір жылылықпен еске аламын. Қазақ елінің тағдыры талқыға түскен шақта Елбасымен бірге ғасырларға жүк болар ауыр еңбектің салмағын көтерісуге қосқан үлесім үшін тағдырыма ризамын. Өйткені, Тәуелсіздіктің 20 жылында Қазақ мемлекетінің қол жеткізген толағай табыстарының бәрі Елбасымыз Н.Назарбаевтың атқарған айрықша еңбегімен келгені мәлім. Ірі реформалар мен серпінді өзгерістердің әрқайсысында Елбасының қайталанбас қолтаңбасы жатыр. Соның негізінде ғана Қазақстанның демократиялық, зайырлы, құқықтық мемлекетке айналуы үшін ғасырларға жүк болар қыруар істер атқарылды демекпін.
Бауыржан МҰХАМЕДЖАНОВ, Парламент Сенатының депутаты.