Медицина • 08 Маусым, 2018

Маңғыстау облысына туристер тартуда ілгерілеушілік бар

2413 рет
көрсетілді
7 мин
оқу үшін

Табиғатының өзіндік қызғылықты бет-бейнесі мен бедері бар Маңғыстаудың туризм саласы үлкен жұмыстарды күтеді. Бұл туралы талай айтылып та жүр. Маңғыстаудағы туристік орындардың цифрлы картасын жасақтау – өңірдегі аталған саланы дамыту бағытындағы елеулі жұмыстардың бірі. 

Маңғыстау облысына туристер тартуда ілгерілеушілік бар

– Мемлекет басшысының «Цифрлы Қазақстан» мемлекет­тік бағдарламасын жүзеге асыру аясында Маңғыстаудың сакралдық және тарихи-мәдени көрнек­ті жерлерінің цифрлы картасын әзірлеу бойынша жұмыс қолға алынған болатын. Өңірдің туристік әлеуетін дамыту, әрі алыс-жақындағы туристерге өлке туризмі туралы мағлұматтың қолжетімділігін арттыру мақсатындағы жоба өз жолына түсті. Ұсынысты «2GIS-Ақтау» компаниясы қолдап, қазіргі таңда тарихи-мәдени және табиғи нысандарды цифрлы картаға енгізу бойынша көптеген жұмыстар жүргізілді және бұл біткен жұмыстар тек жобаның бірінші кезеңінің ғана үлесіне тиеді, – дейді Маңғыстау облыстық туризм басқармасының басшысы Өркен Бисақаев. 
Басқарма басшысының ай­туын­ша, өңірге туристік мақ­сатта келушілер саны жыл сайын артып келеді. Мысалы, өткен жылы ішкі туризм бойынша Маңғыстаудың көрікті жерлеріне 177 178 турист келген болса, келу туризмі бойынша 28 726 адам Маңғыстау табалдырығынан аттаған. Бұл екі көрсеткіш те салыстырмалы түрде қарағанда 2016 жылғы деңгейден жоғары. 

Жаңа жоба аясында өңірдің 24 киелі жерлері мен тарихи-мәдени орындары цифрлы картаға енгізілді. 

– Бірлескен жоба Маңғыс­тау­ды Қазақстанның туристік сапармен келу кәртішкесі киелі жерлер мен көз тартарлық ланд­шафты-геогра­фиялық жерлерінің бірі ретінде наси­хат­тау мақсатында тегін негізде жү­зеге асырылды. Маңғыстау облысы әкімдігінің қолдауымен маршруттарды құру үшін картографиялық мәліметтерді жинақтау бойынша біз экспедиция ұйымдастырдық және 3000 шақырымнан астам жол жүріп өттік. Жүргізілген жұмыстың нәтижесінде «2ГИС-Ақтау» қосымшасында ны­сандарға баратын маршруттар құру мүмкіндігі, сонымен бірге көз тар­тарлық көгілдір айлақ, яғни жағажай, Саура (арна), Тамшалы (бұлақ, шатқал), Жығылған (құлама жар), Сұлтан епе жерасты мешіті, Қапамсай (арна), Шақпақ ата (жерасты мешіті), Шарлар сайы (шар тәрізді конкрециялар), Отпан тау (тарихи-мәдени кешен), Айрақты-Шоманай (тау қалдықтары), Шерқала (тау), Тұзбайыр (тұзды көл), Сфинкс (жартас), Сисем ата (қорым), Бекет ата (жер асты мешіті), Найза (тау, көрініс), Бозжыра (тау, сай), Шопан ата (жерасты мешіті), Радон су көзі (ыстық су көзі), Песчаный мүйісі (жағажай), Тоқмақ (тасты жағажай), Кендірлі (демалыс базасы), Қарынжарық (ойпат, тұзды көл) және Булыойық (үңгір) орындарына қатысты оффлайн режіміндегі мүмкіндік пайда болды, – деді «2ГИС-Ақтау» компаниясының директоры Ербол Байжігітов. 

Мекемелердің толық анықтамасын, навигатормен қалалардың картасын біріктірген 2ГИС компаниясы базасында Қазақстан, Ресей және өзге де елдердің 320 қаласы туралы ақпарат шоғырланған. ТМД елдеріндегі ең кең тараған картографиялық, анықтамалық қосымшалардың бірі болып табылатын компанияның қызметін әлем бойынша 40 млн адам қолданады, демек, енді Маңғыстау туризмі осы 40 млн қолданушының назарында. Олар алыста отырып-ақ өлке туралы танып-біліп, сапарға шығу жолдарын анықтап, қажетті сұрақтарына жауап ала алады. Тағы бір жаңалығы – қосымша ғаламторға қосылмай смартфондарда жұмыс істейді, сондай-ақ онлайн-нұсқалары дербес компьютерлерге де қолжетімді. 
Маңғыстау туризмін одан әрі таныту және туристерді тарта түсу бағытында жоспарланып отырған жұмыстар да жоқ емес екен. 

– Бүгінгі таңда Маңғыстау облы­сының Туризм басқармасы тарапынан «Mangystau.Info» туристік-ақпараттық сайт пен «M-travel» мобильдік қо­сымшасын әзірлеудің бірінші кезеңі аяқталды. Қазіргі уақытта базаны тиісті ақпаратпен толтырылым жасалуда. Енді кез келген турист, ол қазақстандық немесе шетелдік болсын, облысымыздың тартымды барлық туристік жерлері туралы, тіпті жергілікті қонақүйлерді брондауға дейін ақпарат ала алады. Сонымен қатар 2018 жылға арналған жоспарға сәйкес, облысымыздың Мәдениет басқармасымен бірлесіп, өңіріміздің барлық мұражайларына Q-кодтар орналастыру бойынша жұмыстар жүргізілуде. Бұлар – өңірге келетін туристерге нақты көмекші болатын іс-шаралар. Болашақта бұл бағыттағы жұмыстар жалғасатын болады, – дейді Ө.Бисақаев. 

Жоспарланған жұмыстар қата­рын­да Маңғыстау облыстық Ту­ризм басқармасы Қазақстан Респуб­ликасының Мәдениет және спорт ми­нистрлігі Туризм индустриясы коми­тетімен өңірлерде туризмді дамыту жолдарын жаңарту жұмыстары бар. Бұл бағытта таяу және шалғай орналасқан туристік нысандарға баратын жолдарды жақсарту межеленген. Маңғыстауда киелі жерлермен қатар, мемлекет қорғауындағы 13 мың мәдени ескерткіш бар. Олардың барлығы Ақтау қаласынан өте шалғай орналасқан, жол-көлік қатынасы да оңды емес. Ол орындарды қажетті инфрақұрылыммен қамтамасыз ету және туристерге қолайлы жағдай жа­сау көп қаражатты талап етеді және қысқа мерзім ішінде жүзеге асыру мүмкін емес. Сондықтан да іс басындағылар таяудағы 5 жыл ішінде нақты бірнеше аймақта қажетті инфрақұрылымды дамытуға ерекше мән бермек.

Алдымен Ақтау қаласының теңіз жағалауы аймағында электр жары­ғының жүйесін, сумен және газбен қамту, кәріз жүйесі, жолдарды жөндеу мен салу жоспарлануда. Бұл – қонақүй кешендері мен демалыс базалары құрылысын салу үшін инвес­торлар тартуға мүмкіндік береді. 2-3 жұлдызды, яғни халыққа қолжетімді кешендер салу қаралып, қазіргі таңда Ақтау қаласы әкімдігі жобалық-смета­лық құжаттамаларды әзірлеуде.

Шопан ата, Бекет ата киелі орындары жұмыс жүргізудегі екінші бағыт болып таңдалды. Жұмыс барысында Бекет атаға дейінгі 100 шақырымдық жол учаскесін асфальттау басталды. Бұл жолдың 0-51 шақырымдық аралығын жөндеу үшін республикалық бюджеттен 1 млрд теңге бөлінді, жалпы жұмыстың бірінші кезеңі деп аталған бұл кезең 2019 жылдың қараша айында аяқталмақ. 

Үшінші аймақ – Маңғыстау және Түпқараған аудандарының аумақтары. Бұл бағыттағы бірінші кезеңде Шер­қала тауы, Отпан тау, Көгез этно­ауылы, Торыштың шар тәрізді конкрециялары, Жығылған, Форт-Шев­ченко қаласындағы Мұрын жырау мұра­жайына бару мүмкіндіктері кеңейтіліп, нысандарға жолдар салу, электр жүйесін тартып, сумен қамтамасыз ету жоспарланған. Ал Тамшалы, Самал, Саура, Көгілдір айлақ екінші кезең жұмысына енгізілген. Аталған жобаларды жүзеге асыру үшін 10 млрд-тан астам теңге қажет екен. 

Маңғыстау туризмін жаңаша түлету – заман талабы. Сондықтан саладағы жұмыстардың жанданып, қарқын ала түскені көңіл қуантады. 

Гүлайым ШЫНТЕМІРҚЫЗЫ,
«Егемен Қазақстан»

Маңғыстау облысы