Тұсаукесер рәсімінде сөйлеген Райымбек ауданының әкімі Жолан Омаров аталған кітапта Әлнұр Мейірбековтің өнегелі өмірі, Нарынқол өңірінен шыққан Мұқағали Мақатаев, Еркін Ібітанов, Сағат Әшімбаев, Баққожа Мұқай, Жанболат Аупбаев сынды таланатты ақын-жазушылар мен журналистерге көрсеткен ағалық қамқорлығы, редакторлық тәлімгерлігі кеңінен көрініс тапқанын атап өтті. Бұдан кейін сахнада жазушы өмірінің әрбір сәтінен, қоғамдық орындарда атқарған елеулі еңбектерінен естелік ретінде бейнекөрініс ұсынылды.
Алғашында аудандық баспаханада, одан кейін газет редакциясында тілші болып қызметтер атқарған Ә.Мейірбеков Ұлы Отан соғысы басталғанда бір топ құрдастарымен бірге қан майданға аттанады. Ұрыс кезінде мергендігімен көзге түсіп, ажал төндіріп келе жатқан жау танкісін жайратып, жанындағы жауынгерлерді өлімнен құтқарып қалады. Бұл жөнінде соғыстан кейін жазылған «Қарапайым қаһармандар» кітабында жан-жақты айтылады. Майданнан жарақат алып елге оралған Әлнұр атамыз 1950-жылдардың орта шенінде Алматыдағы партия мектебінің журналистика бөлімінде оқып, білімін толықтырады. Міне, содан бастап ол кісі аудандық «Советтік шекара» газетінде (қазіргі «Хантәңірі» газеті) көп жылдар бойы бас редактор болады.
Сахнадағы бейнекөріністен кейін Әлекеңнің төте тәрбиесінен өткен, осы жиынға қонақ боп келген қаламгер Дәулет Желдікбаев өткен мен бүгіннің біршама әңгімесін Әлекеңді еске ала отыра ой таразысына салды.
– «Әйгілі Әлнұр Мейірбеков» десе дегендей. Ол кісі шын мәнінде әйгілі адам. Үлкеннің де, кішінің де тілін табатын, бата бергенде тілінен бал тамызатын, сол бетімен жүрген жерінде, тұрған орнында бәрімізге үлгі көрсететін. Әлекеңді журналист ретінде айтпай-ақ қояйын. Адам ретінде, азамат ретінде, ұстаз ретінде, әке ретінде Нарынқол ауданындағы екі адамның еңбегі сіңсе біреуі, біреуінің еңбегі сіңсе соның өзі Әлекең болатын, – деді Дәулет аға Желдікбаев.
Расымен де ауданымыз Райымбек бабаның атымен аталады. Аудандық газетімізді «Хантәңірі» дейміз. Сондай-ақ ел сүйінер Райымбек батырға арналған ескерткішіміз бой көтерді. Осы үш жұмыстың үшеуінің де басында Әлекең тұр. Оның идеясын газет арқылы да ұсынып, былайша да халыққа насихат айтып дегеніне жеткен өзі болатын.
Жетісу өңіріне белгілі Тоққожа Естенов мырзаның қаржылай демеушілігімен жарық көрген кітапты бастан-аяқ қолға алып, Әлнұр атаның шәкірттері бүгінде белді журналистер, бір-бір газет-журналдарға тұтқа болып отырған қоғам қайраткерлері, ақындар мен жазушы інілерінің ескірмейтін естеліктерін жинақтап, келешек ұрпаққа құнды дүние қалдырып жатқан ақын Айтақын Әбдіқалдың еңбегі елеулі.
Сонымен кітаптың тұсауы кесілді. Әлнұр қарияның сүйікті немересі, өмірден озған Алтай деген баласының ұлы Айбекке сахна төрінде кітаптың бір парасы сый етіп тартылды. Содан соң қалған залда отырған ауыл азаматтарына таратылып, қолдан-қолға өтті. Жақсының шарапатын көрген қаламгердің немересі қолындағы кітабын ауылдас аға-әпкелеріне, ұстаздарына, туған-туыстарына үлестіріп, көпшілік қауымның батасын алды.
Серікжан МУРАСИЛОВ
Алматы облысы,
Райымбек ауданы,
Нарынқол ауылы
