Үшеуінің де артында нәрестелері, туған-туыстары зар еңіреп қалды. Қайғылы оқиғадан кейін мекеменің босандыру бөлімінің жұмысы уақытша тоқтатылып, 9 шілдеден бастап қана қайта штаттық режімге көшті. Бүгінде орталықтағы жағдай тұрақталғанымен, осы үш жағдайға байланысты орталықта қызметтік тексеріс жүріп жатыр. Шетін оқиғаның себебі әлі де нақты анықталған жоқ.
Осы оқиғаға орай қалалық денсаулық сақтау басқармасының басшысы Камалжан Кадыров үш жағдай бойынша да жетекші мамандардың қатысуымен тәуелсіз комиссия жұмыс жасайтындығын жеткізді. Сондай-ақ ол халықтың дәрігерлер жайлы теріс пікір айтпауларын өтінеді.
«Маған сеніңіздер, әріптестерімнің ешқайсысы да жұмысқа әлдекімге зиянын тигізу үшін немесе емделушілеріміздің денсаулығын нашарлату үшін келмейді. Біз әр әйелдің өмірі үшін күрестік, бірнеше хирургтер бригадасы шақыртылды, науқастарды аман алып қалу үшін қаламыздың білікті профессорларымен қатар, өзге қалалардың мамандарынан да кеңес алдық. Сондықтан да дәрігерлер дұрыс қарамады деуге болмайды», дейді ол.
Перинаталды орталықтың бас дәрігерінің орынбасары Ербол Әубәкіровтің айтуынша, үш бірдей әйелдің өлімі бір-бірімен байланысты емес.
«Алғашқы науқастың (21 маусымда қайтыс болған) қайтыс болу себебі қан тамырының шарана сұйықтығымен бітеліп қалуынан (эмболия) болды. Бұл жағдай 20 мың адамда бір кездеседі. Жүктілік кезінде, босану үстінде және босанғаннан кейін болатын аталмыш асқынуда емделушілердің аман қалу мүмкіндігі 18-20%-ті құрайды. Ол науқастың екінші дәрежелі естен тану жағдайында болған. Сәбиі қазіргі таңда өздігінен тыныс алып жатыр, беті бері қарап келеді», деп нақтылады ол.
Қала әкімдігі алғашқы қайтыс болған екі ананың сәбиі жан сақтау бөлімінде жатқандығын хабарлады. Соңғы ақпаратқа дейін, жаңа туылған сәбилердің жағдайы ауыр делінген. Жалпы №1 перинаталды орталықта жыл сайын 12 мың әйел босанады екен. Орталықта соңғы екі жылда ана өлімі тіркелмеген. Сонымен қатар осы уақытқа дейін 5 мың күрделі ота жасалған орталықтың бұл оқиғаларға өздері де қапалы.
«Гистологиялық зерттеу жүргізу үшін сараптама алынды. Оның нәтижесі он күннен кейін дайын болады. Сол кезде ғана жүкті әйелдің неден қайтыс болғанын біле аламыз. Бүгінде тергеу жүріп жатыр. Балалар жағдайы қалыпты. Қазір жан сақтау бөлімінде білікті мамандардың бақылауында» дейді орталық мамандары.
Негізінен перинаталды орталық мамыр айындағы зертханалық тексерулер кезінде барлық стандарттарға сай болған. Басшылығы қайтадан эпидемиологиялық тексеру жүргізіліп жатқанын айтады.
Одан бөлек кезектен тыс журналистермен өткен брифингте сұрақтарға жауап берген №1 перинаталдық орталық директорының орынбасары Ербол Әубәкіров соңғы салдарға байланысты «жүктілік кезіндегі медициналық құжаттарынан анемиямен ауыратынын білдік. Екіқабат болып жүріп, үш түрлі препаратпен емделген. Оның үстіне, 19 жасынан бастап күніне 20-30 реттен темекі шегетін болған. Қазаның басты себебі осыдан деген ойымыз бар», деп жауап берді.
Дей тұрғанмен, медицинамыз қарыштап дамып, шетел асып білімін толықтырып жатқан білікті мамандарымызға бұл қайғылы оқиғалар бәрібір сын екені анық. Айдың аманында үш үйлі жанның аңырап қалуына кім кінәлі? Қайғылы отбасылар дәрігерлерді, ал ақ халатты жандар марқұмдардың өздеріндегі ақауды негізгі себеп санайды. Қайткен күнде де болған істің ұшығын ушықтырмай табу керек.
Сондай-ақ баспасөз мәслихатында әйелінен айырылған Сапар Әміртай есімді азамат бұқаралық ақпарат құралдары арқылы дүниеге келген нәрестелердің тірі қалуы үшін шетелден мамандар шақыруды өтінді. Ол Елбасыдан, Денсаулық сақтау министрі Елжан Біртановтан, барлық азаматтардан көмек сұрады.
«Балаларды аман алып қалсын деп көмек сұраймын Қазақстанда оған мүмкіндік көп. Шетелден мамандар шақырса деймін. Себебі, мұны осындай жағдайға тап болған адам ғана түсінеді. Дәл қазір мен сол жағдайда тұрмын. Кішкентай үмітім жан сақтау бөлімінде жатыр. Одан айырылып қалмауым үшін Денсаулық сақтау министрі Елжан Біртановтан осы балаларды аман сақтап қалса екен деп көмек сұраймын. Себебі, екінші рет жақынымнан айырылу мен үшін өте ауыр болады. Балалардың еш жазығы жоқ қой, олар өмір сүруі тиіс» дейді С.Әміртай.
Мирас АСАН,
«Егемен Қазақстан»