Меніңше, бұл Жолдаудан әрбір қазақстандық қазіргі таңда өзін мазалаған кез келген мәселеге, мемлекеттің даму стратегиясына, мақсаты мен міндеттеріне, ең маңыздысы, күткен нәтижеге қатысты жауап таба алады.
Жолдау – Мемлекет басшысы Нұрсұлтан Назарбаевтың ешқандай делдалсыз әрбір азаматпен тікелей әңгімелесуі деп айтсақ болады. Ол жасқа да, кәріге де ортақ. Бұл Төртінші өнеркәсіптік революция жағдайында тарихи белестің алдында тұрған халықтың бірлігін қамтамасыз етудің саяси тұрақтылық пен қоғамдық келісімге қол жеткізудің басты шарты. Қазақстан халқы өз Президенттерінің даналығы мен сөзінің беріктігіне, көреген саясатына сенеді.
Жолдау мемлекеттің қазіргі жағдайын, экономикалық және әлеуметтік-саяси өмірдегі негізгі өзгерістерді талдаудан басталады. Ұлт жоспары жүзеге асырылып жатыр, Қазақстанның үшінші жаңғыруы басталды, Индустрияландыру бағдарламасы орындалуда, «Цифрлы Қазақстан» бағдарламасы қабылданды. Сонымен қатар Қазақстанның барлық азаматтары үшін ең бастысы мемлекеттік саясаттың беріктігі мен ұзақмерзімді жоспардың өзгермеуі.
Бүгінде бүкіл әлем мойындап, сенетін әрі құрметтейтін тәуелсіз Қазақстан құрылды. Қазақстан БҰҰ Қауіпсіздік Кеңесінің тұрақты емес мүшелігіне сайланды, ЭКСПО-2017 халықаралық мамандандырылған көрмесін сәтті өткізді. Мұнда нарықтық экономиканың моделі сәтті жұмыс істейді. Орташа топ қалыптасты, кедейшілік айтарлықтай төмендеді, жұмыссыздық деңгейі азайды. Көптеген посткеңестік мемлекеттерден, тіпті қазіргі Еуропадан айырмашылығы Қазақстанда азаматтық бейбітшілік, этносаралық және конфессиялық келісім бар. Бұның бәрі Мемлекет басшысының маңызды және жаһандық жетістіктерге қол жеткізіп, жаңа міндеттер қоюға мүмкіндік береді. Бұл мақсатқа жету үшін индустрияландыру, ресурстық әлеуетті одан әрі дамыту, агроөнеркәсіптік кешенді дамытудың құрамдас бөлігі ретінде «Ақылды технологияларды» жетілдіру, көлік-логистикалық инфрақұрылымның тиімділігін арттыру, мемлекеттің қоғамдық құрылысында заманауи технологиялар қолдану, қаржы секторын дамыту және сапасын көтеру, адам капиталын ел экономикасын дамытуға тиімді пайдалану қажет.
Адам капиталына ерекше көңіл бөлу – әбден зерделенген мемлекеттік саясаттың үлгісі. Яғни, қазақ тілін үйренудің тәсілдері, орта мектептегі оқушыларға жүктемені реттеу, қазақ тілін жаңғыртудың қажеттілігі, мектеп оқушыларының ағылшын тілін еркін меңгеруі, цифрлы білім беру ресурстарын дамыту, университеттерде ғылымды дамытуға басымдық беру айтылады. Осы мәселелерді орындаған жағдайда қазақ қоғамы өз тарихын, тілін, мәдениетін білетін, шет тілдерін меңгерген, озық және жаһандық көзқарастары бар заманауи ортаға айналады.
Бұдан бөлек, Жолдауда мемлекеттік басқаруды тиімді жүргізу, сыбайлас жемқорлықпен күрес және заңның үстемдігі, «Ақылды ұлт» үшін «ақылды қалалар» мәселелері айтылған.
Аталған міндеттер Қазақстанның ішкі тұрақтылығын қамтамасыз етіп, халықаралық аренада беделін одан әрі нығайтатынына сенімдіміз. Қазақстан Еуропадағы, Азиядағы және Латын Америкадағы көптеген елдерге Сингапур тәрізді үлгі бола алады. «Ақылды» халықтың «ақылды» мемлекеті қандай екенін көрсетеді.
Мен Қазақстанның өркендеуін, тыныштықта болуын, жоспарланған реформаларды батыл жүзеге асыруын, гүлденуін тілеймін.
Николай КОРЕЦКИЙ,
Мемлекеттік басқару ғылымдарының докторы, профессор, Украина ғылымы мен техникасының құрметті қызметкері, «Константин Ипсиланти» атындағы Киев қаласы гректер қоғамдастығының» төрағасы