![Қолдауға лайық бағдарлама](/article_photo/1531802136_article_b.jpeg)
Бағдарламаның мақсаты – аймақтардағы мектеп оқушыларын қолдау мен ұлттық және шетелдік жоғары оқу орындарында білім алуға ынталандыру. IQanat тұңғыш рет осындай ірі деңгейде өткізілуде. Олимпиаданың іріктеу кезеңі жыл бойы жүзеге асырылды. 9, 10-сынып оқушыларының ішінде ең үздік деп танылғандары елордадағы олимпиаданың ақтық мәресіне жолдама алған. Грант иегерлерінің Кипр, Литва, Қытай, Ресей, Қазақстандағы 10 жоғары оқу орнында білім алуға мүмкіндіктері бар.
Олимпиадаға Шығыс Қазақстан облысының 6 ауданынан мектеп оқушылары қатысты. Сайыс 5 түрлі бағытта өтті: математика, физика, ағылшын тілі, «Эрудит» эссе жазу конкурсы, жеңіл атлетика. Бақ сынаған 1500 үміткердің ішінен суырылып шыққан 177 оқушы Астанаға келді.
Бағдарламаның бастамашысы Айдын Рахимбаев:
«Бұл бағдарламаға қазақстандық бизнесмендер қолдау көрсетеді. Бұл жерге ең мықты, ең қабілетті балалар жиналды. Біз Білім және ғылым министрлігімен және «Болашақ» бағдарламасымен келісім жасадық. Оқушылар сертификаттар мен дипломдарға қол жеткізген соң, мектепті тәмамдағанша екі жыл арнайы бағдарлама аясында дайындықтан өтетін болады», деп атап өтті.
Бірінші орын иеленген оқушылар гранттан бөлек, өзі білім алып жатқан мектепті жабдықтауға 2 млн теңге ұтып алды. IQanat бағдарламасының ұйымдастырушылары бұл қаржыға Fab Lab құрылғысын орнатпақ. Бұл – робот-техника бойынша құрылғылар мен 3D-принтерлер.
Финалистер елордада уақыттарын тиімді өткізді. Жаңа достар тауып, елорданың көрікті жерлерін, мұражайларын тамашалады, табысты адамдардың тренингтеріне қатысты. Зайсан ауданынан келген Қаламқас Сейтпакова Астананы ерекше ұнатқанын айтты.
«Астанада болған 5 күнде керемет әсерге бөлендім. Барлық ұйымдастырушыға зор алғысымды білдіремін. Олимпиадаға келген жолымның өзі қызық пен қиыншылыққа толы болды. Олимпиада басталмастан біраз уақыт бұрын жол апатына ұшырадым. Балдақпен жүрсем де сайысқа міндетті түрде қатысамын деп бекіндім. Өзгелерге қарағанда маған қиынырақ болса да қазір өзімді нағыз жеңімпаз сезінемін. Олимпиадаға ағылшын тілі пәнінен қатысып, шетелдік университетке грант және мектепті жабдықтауға 3 млн теңге ұтып алдым», дейді ол.
Биылғы жылы ақтық бәсекеге тек Шығыс Қазақстан облысының аудандарынан оқушылар қатысса, келесі жылдан бастап Қостанай, Ақмола, Ақтөбе, Түркістан облыстарының оқушылары да қатысады деп жоспарлануда. Ұйымдастырушылар өзге де меценаттар мен оқу орындарын IQanat бағдарламасын қолдауға шақырады. Бүгінгі таңда оны Дәурен Жақсыбек, Айдын Рахымбаев, Бауыржан Исабаев, Арманжан Байтасов, Исламбек Салжанов, Серік Төлбасов, Рүстем Итемиров, Сержан Жұмашов есімді азаматтар қолдады.
Самал МҰРАТ