Бүгінде Алматыда бір күнде 200-ге дейін дөнер-кәуап жасайтын мақтаулы маман. Әрине келушілер саны құбылып тұратыны бар.
– Түс мезгілінен түн ауғанша ыстық леп ұрған электр пештің түбінде тұрып дәм даярлау оңай емес. Бірақ етім үйренді, – дейді кейіпкеріміз күлімсіреп.
Қатырма нанға сиыр еті мен тауық етін, басқа да он-сан түрлі дәмдеуіш қосып 3-5 минутта дайын болған дөнер-кәуапты тұтынушыға ұсына қою керек. Еңбекке бала кезден етене жақын Мұратқа мұның қиындығы жоқ.
Алаулаған жасқа қатар-құрбылары секілді кешкісін әсем Алматының демалыс орындарын қыдыруға уақыт тапшы. Дәмхананың өзі де қаланың қақ ортасында, кешкісін келушілер көбейіп кетеді. Қолы-қолына жұқпай дөнер-кәуап жасап беруші жігіт әрбір жанның жылы сөзінен, ілтипатынан қанаттанады.
Аптасына бір-ақ күн демалады. Айлығы орта есеппен 200 мың теңге. Қала маңындағы Үшқоңыр ауылынан қатынайды. Мұраттың шеберлігіне тәнті болған қаладағы бірқатар дәмханалар ұсыныс жасаған. Бас тартты. Жанына жақын әрі жаңа кәсіпке демеуші болған «Бедобай» дәмханасын қимады.
Мұраттың көптен бергі арманы – әлемде орнын тапқан түріктің дөнер-кәуабы стиліндегі қазақ тамағын өмірге әкелу.
«Болашақты жоспарлау өзім үздік оқыған физмат мектебінен және ата-анамның тәрбиесінен қалыптасқан ғой» деген сенімді жастың жігері мен талабына сүйсініп, сәттілік тіледік.
Талғат СҮЙІНБАЙ,
«Егемен Қазақстан»
Алматы
