![Назарда – аграрлық сала](/article_photo/1538625018_article_b.jpeg)
Аталған палата комитетінің төрағасы Жеңіс Нұрғалиевтің төрағалығымен облыс орталығында комитеттің «Жер және жер қойнауын пайдалану туралы» кодексті іске асыру мәселелері бойынша көшпелі отырысы болды. Комитет төрағасы Ж.Нұрғалиев Ақтөбе облысы жер қойнауын пайдалану бойынша жоғарғы деңгейдегі ірі аймақтардың бірі екенін айта келіп, комитет отырысын өндірісті аймақта өткізудің маңызына тоқталды.
Ақтөбе облысының әкімі Бердібек Сапарбаев пайдалы қазбаларды өндіруші компаниялардың Ақтөбе облысының экономикасына қосқан үлесі туралы сенаторларды хабардар етті. Облыста осы кодексті іске асыру және жер қойнауын пайдаланушылар барлық келісімшарт міндеттемелерін орындауды қамтамасыз ету бойынша белсенді жұмыс жүргізіліп келеді. Сондай-ақ облыс басшысы аймақтың әлеуметтік-экономикалық дамуының көрсеткіштері туралы әңгімеледі.
Парламент Сенатының депутаты Мұхтар Жұмағазиев «Жер қойнауын пайдалану қызметін ынталандырудың құқықтық тетіктері» туралы баяндама жасады. Баяндамада жер қойнауын пайдалану мәселелері жөніндегі заңнаманың негізгі мәселелері қамтылды. Депутат 2017 жылғы 27 желтоқсандағы «Жер және жер қойнауын пайдалану туралы» кодекстің тұжырымдамасына және осы мәселе бойынша заңнамаға енгізілген негізгі құқықтық жаңалықтарға кеңінен тоқталды. Сондай-ақ кодексті және ілеспе заңды іске асыру бойынша алдағы қабылданатын шаралар туралы айтылды.
Энергетика министрінің орынбасары Махамбет Досмұхамбетов, Инвестициялар және даму министрлігінің жер қойнауын пайдалану департаментінің директоры Руслан Баймишев тақырып бойынша бағынышты мекемелердің қағидалары туралы баяндады.
Парламентшілер облыс орталығында ауылшаруашылық өнімдерін өндірушілермен де кездесіп, аймақтың аграрлық саласының жетістіктерімен жан-жақты танысты.
Парламент Сенатының депутаты Дүйсенғазы Мусин кездесуде баяндама жасап, Президент Нұрсұлтан Әбішұлы Назарбаев алтыншы шақырылымдағы Парламенттің төртінші сессиясының ашылуындағы сөйлеген сөзінде сақтандыру, аграрлық міндеттеме, несиелік серіктестіктерді дамыту, сондай-ақ ветеринариялық бақылау жүйесін жетілдіру мәселелері бойынша агроөнеркәсіп саласындағы заңнаманы одан әрі жетілдіру міндетін алға қойғанын атап өтті.
Бұдан соң депутаттар Алға ауданындағы «АМК» ет комбинаты, «АкТеп» мал шаруашылығы кешені мен «Парижская Коммуна-ХХІ» серіктестіктерінің жұмысымен танысты. Сондай-ақ Ақтөбедегі «Айбек» ӘКК және «Гринхаус Казахстан» жылыжай кешенінде болды. Қарғалы ауданындағы «Ардағым» мекемесінде депутаттарға жергілікті тоған шаруашылығында уылдырық өндіруде заманауи технологиялардың пайдаланылуы көрсетілді.
Темір ҚҰСАЙЫН,
«Егемен Қазақстан»
Ақтөбе облысы