Арыстанбаб пен Отырартөбені жалғап тұрған 17 гектар жерде этноорталық, жоғары дәрежелі қонақүй, гүлзар сынды нысандар салынбақ. Құрылысқа бюджет қаржысымен қатар жеке инвесторлар да тартылмақ. Нысандар пайдалануға берілгенде туристердің Отырар тарихымен толық танысуына мүмкіндіктер молаяды.
Сөзімізді киелі Арыстанбаб пен Отырартөбеден бастауымыздың өзіндік себебі де бар. Өткен апта соңында «Ұлы Дала Eліне саяхат» жобасының «Жаңа Жібек жолы» бағдары бойынша қатысушылары Түркістан облысындағы тарихи орынға келіп жетті. Сондай-ақ Мәдениет және спорт министрі Арыстанбек Мұхамедиұлы Отырар ауданына арнайы ат басын бұрып, тарихи орындардың бүгіні мен ертеңі жөнінде мағлұмат алды. Елбасының «Болашаққа бағдар: рухани жаңғыру» атты бағдарламалық мақаласы аясында салынғалы жатқан «Отырар қалажұртының сапар-орталығына» «аманат хат» капсуласын салу рәсіміне қатысты. Министрдің мәлімдеуінше, сапар орталығын салудағы мақсат – еліміздің мәдени мұрасын шетелдерге насихаттаумен қатар тарихи мәдени нысандарды қорғау және оларды сақтап қалу. Бұл жолғы шара Ұлы Жібек жолы бойында жатқан тарихи өлкені шетелдіктерге танытудың бастамасы. Сондай-ақ министр Отырартөбедегі қазба жұмыстарымен танысып, қайта жаңғырған Отырар мемлекеттік археологиялық қорық-музейін аралады. Жергілікті және «Ұлы Дала Еліне саяхат» экспедициясының журналистеріне арнап сұхбат берді.
Отырар бұған дейін Алматы және Жамбыл облыстарындағы көрікті және тарихи орындарды аралап өткен «Ұлы Дала Еліне саяхат» экспедициясы қатысушыларының соңғы нүктесі. Экспедиция елордамыз – Астана қаласының 20 жылдығы шеңберінде өткізілгенін айта кетейік. Ұйымдастырушысы – «Kazakh Tourism» ұлттық компаниясы. «Жаңа Жібек жолы» экспедициясының бағдарын «QazaqGeography» республикалық қоғамдық бірлестігі іске асырған. Экспедиция қатысушыларының құрамында тәжірибелі саяхатшылар, туроператорлардың өкілдері, шетелдік және қазақстандық тревел-блогерлер, сонымен қатар «National Geographic Россия» командасының өкілдері бар. Қатысушыларды экспедицияның аяқталуымен құттықтаған министр өңірлерде ішкі туризмді дамыту жұмысын жалғастыру қажеттігін атап өтті. Экспедиция жұмысын өскелең ұрпаққа көрсету, шетелдік туристерге таныстыру да маңызды. Айта кетелік, «Жаңа Жібек жолы» экспедициясы бағдарының қорытынды нүктесі, яғни көне Отырар қаласының орны ашық аспан астындағы археологиялық ескерткіш ретінде ЮНЕСКО қорғауына алынған. Қала қирандылары арасынан көне сарай, мешіттер мен үйлерді көруге болады, олар қаланың ауқымы мен маңыздылығын көрсетеді. Отырарға таяу әзіз Арыстан-баб сопының мазары орналасқан. Бұл жерге күн сайын Қазақстанның түкпір-түкпірінен және шетелдерден зияратшылар мен жай туристер көптеп келеді. 1982 жылдан бастап мазар мемлекеттің қорғауына алынған.
Экспедиция қатысушыларының Түркістан облысымен танысуы Орталық Азиядағы ең ертедегі қорықтардың бірі Ақсу-Жабағылыдан басталыпты. Қорықтың жалпы ауданы 12 гектарды құрайды. Адамдардың ең көп баратын жерлерінің бірі – Ақсу шатқалының тереңдігі 1800 метр. Батыс Тянь-Шаньның шығыс бөлігінде орналасқан Сайрам-Өгем мемлекеттік табиғи паркінде бағдар қатысушылары 2350 метр биіктіктегі Сайрамсу көліне тоқтапты. Сондай-ақ олар Ұлы Жібек жолындағы тағы бір әйгілі қала – Сауранның орнын көрген. Экспедиция қатысушыларының айтуынша, 6 бағдардың қорытындылары бойынша фотобейне банкі, жолкөрсеткіш және жаңа туристік бағдарлар жасалмақ.
Ғалымжан ЕЛШІБАЙ,
«Егемен Қазақстан»
Түркістан облысы
