Форум жұмысына министрлік өкілдері, Парламент депутаттары, мемлекеттік органдардың, жергілікті атқарушы органдардың, квазимемлекеттік секторлардың, ғылым және бизнестің өкілдері қатысып, пайымды пікірлері мен орамды ойларын ортаға салды.Брокерлік оқиға форматында өткен маңызды мәслихаттың мақсаты ғылыми және ғылыми-техникалық қызмет нәтижелерін коммерцияландыруға мүдделі әлеуетті серіктестерді іздеу және олармен байланыс орнату болды. Осы мақсатта Форум шеңберінде ғылыми және ғылыми-техникалық қызмет нәтижелерін коммерцияландыру жобаларының көрмесі ұйымдастырылып, түрлі жобалар таныстырылды.
Әлемдік деңгейде қарайтын болсақ, ғылымға бөлінетін қаржы бюджеттің 1 процентінен төмен болса, ғылым дамымайды. Сондықтан Елбасы кезінде ғылымды қаржыландыруды 1 процентке жеткізу керек деген тапсырма берген. Бірақ ол әлі күнге дейін орындалмай келе жатыр. Сондықтан бүгінгі форумда да ғалымдардың көтеріп жатқан сұрағы осы қаржының аздығы. Бұл – бірінші мәселе.
Екінші мәселе «Ғылым туралы» Заңға сәйкес жылда конкурс өткізіледі. Ал коммерцияландыру заңына байланысты бұл конкурстарда жаңа жоба келіп түсіп жатса, конкурсты өткізе беру керек.
Бұрын ғылымды қаржыландыруға тек бюджеттен ақша қосылып жатқан болса, қазір аталған саланың қаржысына бизнес өкілдері өз үлестерін қосу үстінде. Бұл біздің егемендік алғаннан бергі жақсы тәжірибеміз екенін атап өткен абзал», деді Сенат депутаты Бақытжан Жұмағұлов.
Бұдан басқа форум шеңберінде коммерцияландыруды қолдау құралдары, ғылым, техника және инновация бойынша халықаралық гранттық бағдарламаларға қатысу механизмдері, технологиялық кәсіпкерлік, жетекші отандық және халықаралық сарапшылардың қатысуымен стартап компанияларды дамыту бойынша тренингтер өткізілді.
«Ғылым қоры» АҚ басқарма төрағасы Әнуарбек Сұлтанғазин форумға қатысушыларға ғылыми және ғылыми-техникалық қызмет нәтижелерін коммерцияландырылған жобаларды гранттық қаржыландыруды жүзеге асыру нәтижелерін және Қазақстанда коммерцияландыруды дамыту бойынша стратегиялық жоспарлар туралы баяндап берді.
Негізі бұл шара Мемлекет басшысы Нұрсұлтан Назарбаевтың 2015 жылдың мамыр айында ұсынған «100 нақты қадам» Ұлт жоспары бағдарламасының 64-қадамының негізінде ұйымдастырылды. «Үстіміздегі жылда «Ғылым қорымен» 12 жаңа инновациялық өнімдер өндірісі іске қосылды. Жақында «Сколково» Қорымен ынтымақтастық болжамдар турасында түрлі мәселелер талқыланды. Кездесудің нәтижесінде коммерцияландыру жобаларын қолдау және оларды Қазақстан мен Ресей нарығына шығаруға бағытталған бірлескен жұмыс туралы келісімге қол қойылды», деді ол.
Рауан ҚАЙДАР,
«Егемен Қазақстан»
