Ақтау қаласының тұрғыны, алтыншы сынып оқушысы Орынгүл Арыстан ментальды арифметика бойынша әлемдік рекорд орнатқан команда құрамында болған. 26 минут, 26 секунд және 12 миллисекундта балалар 30 мың есеп шешкен. Сайыс екінші Еуразиялық әйелдер форумы аясында Ресейде өткен, әлемнің шартарапынан 150 оқушы қатысқан.
Орынгүл Арыстан ментальды математикамен бірнеше жыл бойы шұғылданып жүр. Арифметикалық есептерді тез шешу қабілетіне байланысты Орынгүлді жанындағылар «калькулятор қыз» деп атап кеткен. Байқауға қатысу үшін бір ай бойы күніне екі сағаттан дайындалған. «Сайыс бірнеше кезеңнен тұрды. Эстафета кезінде бір-бірімізге қарындаш бере отырып мысалдарды орындадық», дейді О.Арыстан.
Ментальды арифметика бойынша оқытушы Қарлығаш Әбдірайымова тарихтағы ең ұзақ математикалық эстафета Әлемдік және Азиялық рекордтар кітаптарына жазылғанын айтады.
Ал Орынгүл болашақта математик емес, дәрігер болуды армандайды. Болашақ дәрігер үшін жан-жақты болу ешқандай кедергі келтірмейді деп ойлаймыз.
Бағашар ТҰРСЫНБАЙҰЛЫ,
«Егемен Қазақстан»