![Жастарды жігерлендірген Жолдау](/article_photo/1538970072_article_b.jpeg)
Шараның басты мақсаты – ел жастарын Президент Н.Назарбаев Жолдауын талқылап, мемлекеттік жастар саясатын жүзеге асыруға белсене қатысуға шақыру. Қоғамдық даму министрлігінің Жастар және отбасы істері комитеті мен ЕҰУ ұйымдастырған форумда елорда жастарының 700-ге жуық белсенді өкілдері қатысты. Ашық диалогтық алаңда бас қосқан жастар бүгінгі күннің проблемалары мен өзекті тақырыптарды ортаға салды.
«Еуразия ұлттық университеті − 24 мыңдық ұжым. Бұл ұжым студенттерге білім арқылы отаншылдық һәм азаматтық позицияны үйретуге жұмылып отыр. Өйткені тәуелсіздіктен бергі ширек ғасырдан астам уақыт белесінде біз өзімізге баға беріп, өлшемдерді анықтауымыз керек. Бүгінгі жастардың міндеті − жеке жауапкершілік қана емес, мемлекеттің, елдің жауапкершілігін қоса сезіну. Біз өмірдің, қоғамның, әлемнің айнасына қарайтындай кезеңге келдік. Ол айна бізден сәт сайын жетілуді және жауапкершілікті талап етеді. Ал енді жастар біздің қоғамымызда қандай қажеттіліктер болса, соған сай жауап беруі тиіс. Ол жауапкершілікті атқарушы билікке артып қоймай, қоғамның әрбір мүшесі сезінуі тиіс», деді ЕҰУ проректоры Диқан Қамзабекұлы.
Ал Жастар және отбасы істері комитетінің төрағасы қызметін атқарушы Асхат Раздықұлы «2015 жыл «Қазақстан халқы Ассамблеясының» жылы болғанда әр аймақта Достық үйлері ашылды. 2019 жылы Қазақстанның әр аймағында Жастар үйлері ашылса деген үміт бар» дей келе, ауыл және қала жастарына арналған арнайы жобаларға қатысты ұсыныстарды қабылдауға әзір екенін жеткізді.
Форум барысында сөз алған кезекті спикер Парламент Мәжілісінің ең жас депутаты – Геннадий Шиповских. «Біз Парламенттің ғана емес, халықтың өкіліміз. Халықтан шыққан үнге үнсіздікпен жауап беру дұрыс емес. Сондықтан осындай ашық диалогтық алаңдарда жиі бас қосып, өзекті проблемаларға бәріміз бірге атсалысайық», деді ол. Сондай-ақ Мәжіліс депутаты балалық шағына шолу жасап, өткен күннің естеліктерімен бөлісті. Бүгінгі күнге үлкен еңбекпен жеткенін тілге тиек етті. Форумға жиналған жастарды ынталандырып, үлкен өмірге табандылықпен қадам басу хақында ой тастады. Форумның өзге спикерлері «Жас Отан» жастар қанатының атқарушы хатшысы Дәулет Кәрібек, «Нұр-медиа» холдингі директорының орынбасары Максим Споткай, Еуразия гуманитарлық институтының Жастар ісі жөніндегі комитетінің төрайымы Нұргүл Тырнахан шара барысында ой-пікірлерін ортаға салып, бұл Жолдауды жастар жүзеге асыруы тиіс екенін ерекше атап өтті.
Шара барысында «Оратор» пікір-сайыс клубының президенті Иса Тоқтыбаев «Замандастарымның халықаралық деңгейде мол тәжірибе алып, әлем студенттерімен етене араласса деген тілегім бар. Маслоу пирамидасындағы ең төменгі қажеттіліктің барлығы қамтылатын болса, жастар Маслоудың келесі деңгейіне өтіп, рухани дамудың алғышарттарын игереді деген ойдамын», деді.
Форумның келесі қатысушысы «Жас Ұлан» балалар мен жасөспірімдер ұйымы» төрайымының орынбасары Бекарыстан Аманжолов. Бекарыстанның айтуынша, әрбір адам өз басындағы жауапкершілікті өзгеге артудан аулақ болуы керек. Қазіргі таңда әлеуметтік желіге әртүрлі мәселені көтеріп пост жазғаннан бөлек, сол мәселеге мен де жауаптымын деп қарауы тиіс. «Адамдардың көкейінде «Азаматтық жауапкершілік» деген түсінік толық қалыптасқанда ғана біз мәселеге бейжай қарауды доғарамыз. Одан өзге жастардың шәкіртақы мәселесін қарастыру керек. Ізденушілер оқу процесі кезінде жұмыс жасау сынды өзге мәселелермен бас қатырып жүреді. Демек ең төменгі жалақыдан да төмен шәкіртақы алатын студенттің қаншалықты білімді болатыны өзекті сұрақ», деді Бекарыстан. «Жастар жылында» инновациялық жаңалықтардан құр қалмай, зерттеу нысандарына күш салу керек. Сондай-ақ Скандинавия, Норвегия елдеріндегі «әлеуметтік кәсіпкерлікті» мысал етіп, жастардың тың жобаларын жүзеге асыру жайында сөз қозғады.
Форум соңында студенттер сұрақ қойып, ой-пікірлерін ортаға салды. «Бой емес, ой жарыстыратын» заманда жастардың сын тұрғысынан ойлау қабілеті мен бәсекелестікке деген ынтасы жоғары болуы шарт. Бойда жастық жалын мен жігер барда, Елбасымыз діттеген жолда нәтижелі жұмыс атқарылады деген үміт басым. Елбасының Жолдауын жас ұрпақ қолдап, екі аяғына нық тұрған мүмкіндігі мығым мемлекеттің болашағы жарқын боларына сенім зор.
Ақмарал АҒЗАМҚЫЗЫ,
«Егемен Қазақстан»