Кеңес отырысына ҚХА төрағасының орынбасары – Хатшылық меңгерушісі Леонид Прокопенко, Сыртқы істер министрінің орынбасары Ғалымжан Қойшыбаев және Парламент Мәжілісінің депутаттары, Ғылыми-сарапшылық кеңес пен этномәдени бірлестіктердің мүшелері және Қазақстан, Өзбекстан, Қырғызстан, Тәжікстан және Еуропа елдерінің сарапшылары қатысты.
Бүгінгі таңда Орталық Азияда 75 млн адам өмір сүріп жатыр. Әртүрлі этнос өкілдерінің арасында тұрақтылықты сақтау – өзекті мәселе. Осы орайда пленарлық отырыс жұмысын ашқан Леонид Прокопенко әлемдегі және біздің өңіріміздегі қарқынды этнодемографиялық, этномәдени әрі миграциялық процестерге тоқталды. «Қазіргі кезде ең ауқымды қоныс аудару жағдайы байқалуда. 2016 жылдың соңында барша әлемде 65 миллионнан астам адам қақтығыстар мен қудалау салдарынан өз үйлерін тастап кетуге мәжбүр болды. 2017 жылы олардың саны тағы да 2 миллион адамға артты. Көптеген өңір үшін діни экстремизм өзекті проблемаға айналғаны белгілі. Осы үрдістердің барлығы біздің өңірде тұрақтылықты сақтаудың маңыздылығын тағы да көрсетіп отыр», деді Л.Прокопенко.
Шара барысында «Қоғамдық пікір» зерттеу институтының директоры Ботагөз Рақышева Түркі тілдес елдердің әлеуметтік-мәдени байланысы тұрғысында баяндама оқып, «Түркі барометрі» жобасын таныстырды. Түркі Академиясының бастамасымен «Қоғамдық пікір» ғылыми-зерттеу институты жүргізген жобаның мақсаты – түркі мемлекеттері тұрғындарының Түркі кеңесі тарапынан жүргізілетін интеграциялық процестерге қатысты көзқарастарын, экономикалық, мәдени аспектілерге байланысты ой-пікірлерін бағамдау.
Жиында Парламент Мәжілісі Төрағасының орынбасары, ҚХА-дан сайланған Мәжіліс депутаты Владимир Божко елді дамытудағы этномәдени үдерістердің маңыздылығына тоқталды.
«Президент қаулылары мен үндеулерінде қашанда өзінің саяси бағдарына негіз болатын басты мәселені атап өтеді. Бейбітшілік пен келісім, этностық үндестік болмаған жерде экономиканы дамыту, қуатты мемлекет құру, оны нығайту мүмкін емес. Мұны тарихтың өзі дәлелдеп отыр», деді ол.
Сонымен қатар ҚХА төрағасының орынбасары Л.Прокопенко сөз арасында Қазақстанда мемлекеттермен ынтымақтастық құрудағы маңызды іс-шаралардың өтіп жатқанын тілге тиек етті.
«Жуырда «Видергебурт» неміс қоғамының төрағасы, Мәжіліс депутаты Альберт Раумен бірге Германия агротехникалық форумын ұйымдастырдық. Онда Германия агротехника саласындағы өнім әзірлеу жаңа технологиясын таныстырды. Екі елдің өкілдері арасында ауыл шаруашылығына қатысты технологияны енгізу бойынша қызықты диалог орнықты. Аграрлық өндіріс – Елбасы Жолдауының маңызды бөлігі. Осыған байланысты «Ауыл – ел бесігі» бағдарламасы әзірленіп жатыр. Оған Ассамблея да атсалысады. Бұл біздің Жолдау міндеттерін орындауға қосатын үлесіміздің бір бөлігі болмақ», деді ол.
Жиын соңында сарапшылар өңірдегі этномәдени байланыс пен келісімнің негізгі тұжырымдамаларын анықтап, қарар қабылдады. Орталық Азия елдері үшін келісім мен жақындасуға ықпал ететін жалпы жобаларды жасақтады.
Ақмарал АҒЗАМҚЫЗЫ,
«Егемен Қазақстан»
