Жайық жағасында үш күн бойы күй күмбірледі. Қырғызстан, Өзбекстан, Ресей мемлекеттерінен және еліміздің түкпір-түкпірінен жиналған 600 өнерпаз Құрманғазы рухын асқақтатты. Ұлы күйші-композитор Құрманғазы Сағырбайұлының шығармашылығын насихаттауға арналған халықаралық оркестрлер фестивалі Атырау облысы әкімінің тапсырмасымен облыстық мәдениет, мұрағаттар және құжаттама басқармасының ұйымдастыруымен өтті. «Бәрі өте жоғары деңгейде жасалған, Атырауға табанымыз тигеннен бастап құрмет пен қошеметтің құшағында болдық. Қазақ аспаптарының өзіндік ерекше үні бар. Өнердің тілі бір, осындай ауқымды шараға қатысқанымызға қуаныштымыз», дейді Ресейден келген «Скиф» квартетінің көркемдік жетекшісі Александр Мостыканов.
Фестивальдың алғашқы екі күні «Жастар» мәдениет үйінде өтті. Өнер мерекесіне 15 оркестр ұжымы қатысты. Шара шымылдығын Атыраудағы Дина Нұрпейісова атындағы академиялық ұлт аспаптар оркестрі ашты. Одан кейін сахнаға көтерілген көкшетаулық К.Күмісбеков атындағы ұлт аспаптар оркестрі, ақтөбелік А.Жұбанов атындағы ұлт аспаптар оркестрі, Павлодардан келген Р.Омаров атындағы ұлт аспаптар оркестрінің өнерін Қырғызстаннан келген қонақтар «Мөлмөл» қомызшылар ансамблі жалғады. Ресейдің «Скиф» квартеті, Ақтау, Қостанай, Астана қалаларынан келген өнер ұжымдары да Құрманғазы күйлерімен бірге өзге де композиторлардың шығармаларын орындап, көрермен қошеметіне бөленді.
Өзбекстанның «Согдиана» халық аспаптар оркестрі, атыраулық «Нарын», Алматыдан келген Құрманғазы атындағы мемлекеттік академиялық ұлт аспаптар оркестрі фестивальдың екінші күнінде өнер көрсетіп, Жайық жағасында құдіретті күй өнері салтанат құрды. Бұл қатарда талдықорғандық М.Төлебаев атындағы, оралдық Дәулеткерей атындағы, қызылордалық Тұрмағамбет атындағы халық аспаптары оркестрлері де бар.
Фестивальдың гала-концертін 2000-ға жуық көрермен тамашалады. Құрметті қонақтар қатарында Асанәлі Әшімов, Ұлықбек Есдәулет, Қатимолла Бердіғалиев, Жүрсін Ерман, Айтқали Жайымов, Ермек Қазиев, Айгүл Үлкенбаевалардың болуы да шараның маңызын арттыра түсті. Гала-концертте облыс әкімі Нұрлан Ноғаев: «Елбасы бағдарламалық мақаласында «Әркім өзінің туған жерін, өлкесін жетік білуі керек. Туған жерден елге деген маxаббат оянады, елге қызмет ету намысы оянады» деген болатын. Әр үйдің төрінде тұратын домбыраның арқасында еліміздің өнері, дәстүрі, мәдениеті бүгінге дейін жетіп отыр. Өнеріміз берік кезде мәдениетімізді, дәстүрімізді тани біліп, дәріптеп, әлемдік жаһандану заманындағы жастарымыздың бойына руx сіңіре отырып, елін, жерін қорғайтын азаматты өсіруде сіздердің атқарып жүрген еңбектеріңіз зор. Біз өзімізге жүктелген лауазымдық міндетке сәйкес осы шараларды ұйымдастырамыз. Сонымен қатар әр адам азаматтық ұстанымына сәйкес бұл істердің қосшысы, жаршысы болуы ләзім», деп атап өтті.
Гала-концерттің ерекшелігі – сахна төрінде 15 оркестр ұжымының бірігіп өнер көрсетуі болды. Еліміздегі ең белгілі дирижерлер Айтқали Жайымов, Талғат Кәрімов, Назымбек Молдахметов, Гүлфара Ізбанова, Абылай Тілепбергенов, Еркін Оралбеков, Арман Аманжолов, Қабира Қабижанова, Рахат Мадреев, Рахила Ерғалиева, Сая Жұмашевалар кезек-кезек сахна төріне көтерілді.
Астана қаласы Мемлекеттік академиялық филармониясы қазақ оркестрінің көркемдік жетекшісі Айтқали Жайымов: «Атырау топырағында домбыра ұстаған дүлдүлдердің бас қосуы – Құрманғазы бабамыздың ұлылығына құрмет. Домбырашылар қай жерде бас қосса да, Құрманғазының күйі күмбірлейді. Бұл да өнер құдіреті», дейді. Ұлы даланың мәңгілік үні осылайша Атырау аспанында салтанат құрды. Елбасы «Ұлттық домбыра күнін» жариялаған жылда бұл да бір жақсы бастама болғаны анық.
Бақытгүл БАБАШ,
«Егемен Қазақстан»
АТЫРАУ
