Ауылды жаңғырту − ғалымдардың басты міндеті. Осы бағытта білім ордасы алдымен аудан және ауылдық округтердің әкімдеріне арнайы курс ұйымдастыруда.
Бүгінгі таңда ауылдық жерлердегі кәсіпкерлер мен шаруа қожалықтары жетекшілерінің назарын ғылымға аудару өте өзекті. Әкімдер курс барысында жинақтаған тәжірибесін ауылдағы шаруа қожалықтарымен бөліседі. Осылайша шаруа қожалықтары өкілдерін ауыл шаруашылығындағы жаңа технологияның мүмкіндігіне көз жеткізу, қажет болған жағдайда қожалық басшылары мен мамандарын университетте біліктілігін арттыруына мүмкіндік беру көзделіп отыр.
ҚазАТУ ректоры Ақылбек Күрішбаев арнайы курсқа қатысып жатқан әкімдермен кездесуде осы мәселелерді әңгімеледі. «Егер ауылдың жағдайы жақсы болса, елдің де жағдайы жақсарады. Бүгінде ауыл шаруашылығының ғылымсыз алға жылжуы мүмкін емес. Жүйедегі жаңашылдықтарды алдымен сіздерге көрсеткіміз келді, сол себепті арнайы курс ұйымдастырдық. Қажет болса, шаруа қожалықтарының басшыларын шақырып курстар ұйымдастыруға дайынбыз. Бұл үшін сіздер алдымен ауылдағы шаруа қожалықтарына қозғау салуларыңыз қажет», деді А.Күрішбаев.
С.Сейфуллин атындағы Қазақ агротехникалық университеті келесіде шаруа қожалықтарының басшылары мен мамандарын оқытуды көздеп отыр. Бүгінде ауыл шаруашылығында заманауи техниканың тілін меңгермесеңіз мол мүмкіндікті жіберіп аласыз. Өйткені қазіргі таңда егін егетін алқаптың топырағына талдау жасау үшін ғарыштық түсірілімдерге жүгіну қажет, алқаптарды бақылауда ұстау үшін электронды карта қажет. Тағы сондай жаңа технология толып жатыр.
Шынар Абеуова,
Біліктілікті арттыру және қашықтықтан оқыту институтының директоры:
– Қазір кез келген салада инновациялық теxнологиялардың дамуы байқалады. Қарағанды, Ақмола, Қостанай облыстарынан келген әкімдерге «Ауыл шаруашылығының тұрақты дамуы» тақырыбындағы біліктілікті арттыру курстары университет қабырғасында алғаш өтуде. Университет ғалымдары дәлме-дәл егіншілік, геоақпараттық жүйелер теxнологияларын пайдалану, басқарудың шағын нысандарын дамыту, жалпы ауыл шаруашылығын қаржыландыру және тұрақты басқару мәселелері бойынша кеңес берді.
Жаңа теxнологиялар ауылдық жерлерге де баруы керек. Ауылды оқшауламау қажет. Бұл үшін ғылым мен ауыл шаруашылығы арасында байланыс болуы тиіс. Сондықтан әкімдердің біліктілікті арттыру курстарын үнемі өткізсек деп жоспарлап отырмыз.
Қанат Мұқанов,
Ақмола облысы, Ерейментау ауданы, Бозтал ауылының әкімі:
– Мен 1984 жылы Целиноград ауыл шаруашылығы институтының агрономия факультетін бітірдім. Содан бері ауылымда еңбек етіп келемін. Бірнеше күннен бері ауыл шаруашылығындағы тың өзгерістерді көріп таңғалып отырмын. Біз оқыған замандағы ғылыми үрдіс мүлде өзгеріп кетіпті. Өзім агроном болғаннан кейін дәлме-дәл егіншілік жүйесіне үлкен мән беріп отырмын. Біз жаңашылдыққа ұмтылуымыз, заман талабына сай болуымыз қажет. Университет жақсы бастаманы қолға алып отыр. Ауыл әкімдерін оқыту бұрын болмаған үрдіс.
Мадияр Аманжолов,
Қарағанды облысы, Нұра ауданы, Тассуат ауылының әкімі:
– Мамандығым заңгер болғандықтан дәрісте Жер кодексінің түрлі ұтымды тұстарының бар екендігіне мән бердім. Бүгінде пайдаға аспай немесе заңсыз пайдаланылып жатқан жер учаскелері бар. Сол алқаптарды заң тұрғысында пайдаланудағы өзгешеліктер бізге аса қажет. Дәлме-дәл егіншілік туралы берілген дәріс өте маңызды. Ауылда фермерлер егіншіліктің бүгінгі жаңа тәсілдерін біле бермейді. Жас маман ретінде барлығын зерделеп алуға тырысамын.
Наталья Милюк,
Ақмола облысы, Есіл ауданы, Заречное ауылының әкімі:
– «Ауыл − ел бесігі» деп Елбасы атап көрсеткендей, ауылды көтеру − барлығымыздың парызымыз. Білім ордасының бастамасына қуанып отырмын. Себебі ауылды сақтап қалсақ, Отанымыздың іргесін бекемдей түсеміз. Сол себепті ауыл әкімдері үшін өткізілген семинар өте маңызды әрі өзекті. Бүгінде жастарды оқыту, үйрету оңай. Алдымен әкімдердің санасына жаңашылдықты сіңірсек, өзгелерін технологияға бейімдеу жеңілірек болмақ. Біз білімімізді міндетті түрде ауылымызды көркейтуге жұмсаймыз. Осы ретте семинар университет қабырғасында ғана емес, қожалықтардың басында ұйымдастырылса деп ойлаймын.
Бердібек ХАБАЙ
