«Ел Президенті Н.Ә.Назарбаевтың кезекті Жолдауы – төртінші өнеркәсіптік революция жағдайындағы Қазақстанды жүйелі жаңғырту шараларының нақты бағдарламасы. Денсаулық сақтау саласы бойынша Елбасы бірқатар басым бағыттарды анықтады, оның ішінде медициналық көмектің қолжетімділігі мен тиімділігін арттыру, әсіресе ауылдық жерлерде, аурулардың алдын алу және емдеуде жаңа технологияларды қолдану мәселесіне басымдықтар берілуде», деді ол.
Мемлекет үшін тиімділігі аз және шығыны көп диспансерлік ем қолданудан, негізгі созылмалы ауруларға қашықтан диагностика жасап, сондай-ақ осы саланы амбулаториялық емдеу арқылы басқаруға көшу қажеттігі пайда болуда.
Заманауи денсаулық сақтау қызметі қымбат стационарлық емделуге емес, аурулардың алдын алуға көп көңіл бөлуі керек. Саламатты өмір салтын насихаттай отырып, қоғамдық денсаулық сақтауды басқаруды заман талабына сай жетілдіруге, жастардың репродукциялық денсаулығын қорғау мен күшейтуге ерекше назар аударылмақ.
«Алдын алу медицинасы – ХХІ ғасырдағы денсаулық сақтаудың негізгі тренді. Ақпараттық жүйелерді, мобильді цифрлы қосымшаларды біріктіру, электронды денсаулық паспортын енгізу, медициналық құжаттаманы қағазсыз жүргізуге көшуді қолдана отырып, денсаулық сақтау саласындағы қызметтерді барынша жақсартуымыз қажет», деді ол.
Елімізде мемлекеттің және жұмыс берушінің ортақ жауапкершілігіне негізделген Міндетті әлеуметтік медициналық сақтандыру (МӘМС) жүйесіне кезең-кезеңімен көшу жалғасуда. Оны енгізу қажеттілігі заманауи шындыққа сәйкес келіп отыр және әлемдік озық тәжірибелер арқылы дәлелденуде.
Халық санының өсуі және өмір сүру ұзақтығын қамтамасыз ету шаралары медициналық қызметті тұтыну көлемінің артуына әкелді. Сондықтан Мемлекет басшысы өз Жолдауында денсаулық сақтауға жұмсалатын шығындарды ІЖӨ-нің 7 пайызынан 10 пайызына дейін көтеру туралы нақты тапсырма берді. Осыған орай халыққа қызмет көрсетудің сапасы айтарлықтай артуы тиіс.
«Халыққа қызмет көрсетудің сапасын айтарлықтай арттыру және медицина қызметкерлерін осы іске ынталандырудың жолдары белгіленді. Осының бір шарасы ретінде 2019 жылдың 1 қаңтарынан бастап ауруларды басқарудың жаңа әдістерін енгізген учаскелік медицина қызметкерлерінің жалақысы 20 пайызға кезең-кезеңімен өсірілмек. Бұл үшін биыл 5 млрд теңге бөлінеді», деді Ш.Баймағамбетов.
Сұңғат ӘЛІПБАЙ,
«Егемен Қазақстан»
