«Бұл іс-шараны өткізудегі басты мақсатымыз – Елбасы Н.Ә.Назарбаевтың «Ұлы даланың жеті қыры» мақаласында көтерілген түркі әлемінің генезисі, ұлы даланың ұлы есімдері, дала өркениеті, ұлттық бірегейлік сынды ұлттық-рухани тұрғысындағы маңызды мәселелер талқылау. Мақалада айтылған құндылықтарды қазіргі қоғам санасына оңтайлы сіңіру, жас ұрпақ тәлім-тәрбиесі өзегіне айналдырудың ұтымды жолдарын зерделеу», деді жиынға модераторлық еткен Астана қаласы әкімдігі «Руханият» коммуналдық мемлекеттік мекемесінің басшысы Ержан Еңсебай.
Жиында сөз алған Астана қаласы Оқушылар сарайының директоры, Қазақстан Республикасы Білім беру ісінің құрметті қызметкері Ербол Іргебай Ұлы даланың ұлы тұлғаларын жас ұрпаққа насихаттау төңірегінде ой қозғап, оқушылар сарайында жасалып жатқан жұмыстарға тоқталса, Ш.Шаяхметов атындағы «Тіл-Қазына» ұлттық ғылыми-практикалық орталығының атқарушы директоры, филология ғылымдарының кандидаты Ербол Тілешов Ұлттық бірегейлікті сақтаудағы әліпби маңызы туралы айтты. «Кеше ғана «Egemen Qazaqstan» газетінде ұлттық комиссия мақұлдаған «жаңа әліпби негізіндегі қазақ тілі емлесінің ережелері» жарық көрді. Енді осы нұсқаны қолдана беруге болады. Бұйырса, көктемде Қазақстан Республикасының Тіл туралы заңына өзгерістер мен толықтырулар енеді, сол кезде арнайы қаулымен немесе жарлықпен бекітілетін болады», деді.
Бұдан өзге Л.Н.Гумилев атындағы Еуразия ұлттық университетінің профессоры, тарих ғылымдарының докторы, жазушы Тұрсынхан Зәкенұлы «Түркі әлемінің генезисі Қытай деректерінде» атты баяндама жасаса, тарих ғылымдарының докторы Марат Әбсеметов «Алаш арыстарының мұрасы және мұрағат ісі», Қазақ ұлттық өнер университетінің профессоры, Қазақстанның еңбек сіңірген қайраткері, өнертанушы, күйші Жанғали Жүзбай «Ұлы дала фольклорының мыңжылдық мұрасы: отандық өнертану ғылымының мақсаты мен міндеті» тақырыбында баяндама жасады. Л.Н.Гумилев атындағы ЕҰУ Еуразиялық зерттеулер кафедрасының профессоры, тарих ғылымдарының докторы Мақсат Алпысбес «Шежіре және Ұлы даланың ұлы есімдері» жайында, argymaq.kz ұлттық танымдық порталының бас редакторы Ержан Жаубай «Ұлы дала және атқа міну мәдениеті» тақырыбында баяндады.
Іс-шараға зиялы қауым өкілдері, Астана қаласы білім беру мекемелерінің басшылары мен ұстаздары, жас ғалымдар мен қаламгерлер, руханият және мәдениет саласының өкілдері, қоғам белсенділері қатысты.
Ұларбек НҰРҒАЛЫМҰЛЫ,
«Egemen Qazaqstan»
