Бірлігі жарасқан ауыл бар
Сенбі, 28 сәуір 2012 1:05
Облыстағы Ақтоғай ауданында тұратын өзге ұлт өкілдері қай салада болмасын белсенді. Өздері туып-өскен ауылдары үшін еңбек етуде. Мысалы, орыс Игорь Головашов басқаратын «Ақтоғай-Агро» фирмасын, украиндар Анатолий және Владимир Филипишиндердің «Надежда» және «Весна», неміс Николай Видикердің «Қазақстан», ингуш Декало Мержоевтың «Алға», чешен Эльмах Алисултановтың «Бейбіт» қожалықтарын үлгі етіп айтуға болады.
Сенбі, 28 сәуір 2012 1:05
Облыстағы Ақтоғай ауданында тұратын өзге ұлт өкілдері қай салада болмасын белсенді. Өздері туып-өскен ауылдары үшін еңбек етуде. Мысалы, орыс Игорь Головашов басқаратын «Ақтоғай-Агро» фирмасын, украиндар Анатолий және Владимир Филипишиндердің «Надежда» және «Весна», неміс Николай Видикердің «Қазақстан», ингуш Декало Мержоевтың «Алға», чешен Эльмах Алисултановтың «Бейбіт» қожалықтарын үлгі етіп айтуға болады.
Сонымен қатар, татар, орыс, чешен-ингуш, украин, болгар этномәдени бірлестіктері достық, бірлік жолында бірлесе қызмет жасауда. Тіпті, аудандағы бір ғана Разумов деп аталып жүрген ауылдық аумақта тұратын төмендегі отбасыларды атап өтсек, достық, өзара келісім дегеніміз осы деп ойлайсыз.
Ертіс өзені жағасындағы бұл ауыл, атының өзі айтып тұрғандай, отарлау саясаты кезінде алғашқы қоныс аударушыларды қарсы алған ауыл. Осы күнгі тұрғындары алғашқы қоныстанушылардың ұрпақтары саналады.
Екіншіден, Разумов ауылдық аумағына шетел асқан өз қандастарымыздың қайта оралып, қазақы ортаны толтырып, осы жерге қоныстанғаны да құт-береке. Разумов ауылын болгар халқының өкілдері алғаш келген кезден бастап, яғни қазіргі Петр Ангеловтың аталары да мекендепті. Ал Петрдің өзі тың игеру жылдары – 1954 жылы осы ауылда өмірге келіпті. Жұбайы – Зағипа Темірғалиқызы қазақ қызы. Екеуі үш баланың ата-анасы, немерелері бар. Петр ағай мектепте күзетші болса, Зағипа үй шаруасында. Ерлі-зайыпты Ангеловтардың жеке аула шаруашылығында малдары, құстары бар, бау-бақша өсіреді.
Екінші отбасы орыс Виктор Геннадьевичтің әйелі Айгүл Төлегенқызы да қазақ, екеуінің 6 баласы қазақ сыныбында оқиды, қазақша-орысша ағып тұр. Виктор ағай мектепте шаруашылық ісінің меңгерушісі. Ал қазақ Жомарт Әріповтің зайыбы Светлана Геннадьевна – орыс қызы. Ол кісі қазақ шаңырағына келін болып түскенін қатты қадірлеп, ұлтымыздың салт-дәстүрін жақсы үйреніп алыпты. Отбасында 4 бала бар.
Бұл ауылда сондай-ақ сонау алыстағы Қап тауындағы халықтардың бірі – чешен ұлтының өкілі Анзоровтар тұрады. Отағасы Баматгири Анзоров әр этнос өз ата-баба мекеніне кете бастаған кезеңде біздің елімізден басқа жаққа кетуді ойларына да алмаған екен. Өйткені, туған жері – Қазақстан. Отаны да Қазақстан. Разумов ауылында 3 баласы мен 9 немересі туды. Бәрі өсіп-өнді. Зейнеткерлік жасқа жетсе де Баматгири ағай ауыл шаруашылығымен айналысып, мал өсіреді. Ауыл тұрмыс-тіршілігіне дән риза. «Тыныштық бесігі – еліміздің қара шаңырағы аман болсын, қазақ халқының кең пейіліне, Елбасына алғысымыз шексіз», дейді ол.
Фарида БЫҚАЙ.
Павлодар облысы, Ақтоғай ауданы.