Елімізде, соның ішінде астаналық ағайын қоғамдық көлікті жиі пайдаланады. Алайда, күткен автобусың кейде уақытында келмей, ызаңды келтіреді. Оны айтасыз, елордада бір жерге жетуіңнің өзі кәдімгідей мұң. Жо-жоқ, обалы не керек, автобустар ағылып жүріп жатыр. Бір қызығы, қоғамдық көлік көп болғанымен, дәл сен баратын көшеге әлгі автобустардың бірі де қатынамайды. Мысал керек пе?
Сол жағалауға жеткенше...
Мәселен, елордадағы Абай даңғылымен қиылысатын Жұбанов, Брусиловский, Бейсекбаев, Сембинов көшелерінің тұсынан, құдды келісіп алғандай-ақ, сол жағалауға ешқандай автобус жүрмейді. Тек Кенесары көшесімен сол жағалауға жалғыз №40 автобус қатынайды. Алайда, қаланы түгел аралап, шамамен 1 сағатта әрең жетесің немесе №70 автобусқа мінесің. Ол үшін Уәлиханов көшесіне жетіп алу керек. Қос бағыттағы қоғамдық көліктердің ескі екені, тұрғындарға қолайсыз екені бөлек әңгіме.
Ал №40 автобустың «тасбақа жүрісіне» шыдамайтын, №70 автобусқа жете алмайтын кей тұрғын не істейді? Амалының жоқтығынан №60 автобусқа жүгіреді. Оның өзіне жоғарыда аталған көшелерден «Отырар кітапханасы» орналасқан Пушкин көшесіне жаяулап бару керек. Әйтпесе «әкелерінің құнын сұрап» жүретін таксиге жүгінесің. Олар сол жағалауға 1000 теңгеден төмен бағаға апармайды.
Сондай-ақ «Жастар», «Целинный» аудандары мен Уәлиханов көшесінен Абай-Брусиловский, Абай-Жұбанов көшелеріне ешқандай қоғамдық көлік жүрмейді. Бұл үшін бірнеше автобусқа мініп жету керек.
Жылы аялдаманы жылдап күтесің
Автобусты ауызға алған соң, аялдама туралы айтпай кете алмайсың. Бүрсең қаққан жолаушылар елорда әкімдігінің «жылы аялдама салып береміз» деген уәдесін күткеніне аз болған жоқ. Енді, міне, көктеммен көрісіп жатыр. Обалы не керек, сол жағалау көшелеріне жылы аялдамаларды жайнатып қойған. Ал оң жағалау тұрғындары, әдеттегідей, бүрсең қағып жүр.
Былтыр қазан айында Астана әкімдігінің өкілі Руслан Әбдуәлиев бірнеше миллион теңге тұратын жылы аялдамалардың қолданысқа қашан берілетіні туралы айта келе: «Қазіргі таңда құрылыс-монтаждау жұмыстары жүргізіліп жатыр. Электр тоғы әлі тартылмағандықтан, ол аялдамаларда әзірге жылу жоқ. Дәл қазір оны іске қосу турасында «Энергосбыт» және АРЭК-пен келісіп жатырмыз. Қажетті жұмыстар жүзеге асырылғаннан кейін павильондар ашылатын болады», - деген-ді.
Ұзын сөздің қысқасы, қаланың жоғарыда мысалға келтірген көшелері орналасқан Байқоңыр ауданының автобус бағыттарын қайта қарайтын кез жеткен секілді. Әйтпесе әлгі ауданнан сол жағалауға баратын тұрғындарға қолайсыз екені анық.
Ғанибет ҒАЛЫМБЕКҰЛЫ,
«Egemen Qazaqstan»
